អំពូលសូឡា៥០០ឈុត ត្រូវបានប្រគល់ជូនកងកម្លាំង អាជ្ញាធរ និងពលរដ្ឋស្រុកសៀមប៉ាង ខេត្តស្ទឹងត្រែង

អំពូលសូឡាបំភ្លឺចំនួន២០០ឈុត អមជាមួយអំពូលសូឡារបស់សប្បុរសជនមួយចំនួនទៀត សរុបប្រមាណ៥០០ឈុត ត្រូវបានគណៈប្រតិភូដឹកនាំដោយអ្នកឧកញ៉ា ម៉ៅ ចំណាន គិតម៉េង ប្រធានសមាគមសិល្បករខ្មែរ នាំយកទៅប្រគល់ជូនដល់ក្រុមគ្រួសារយុទ្ធជន អតីតយុទ្ធជន និងនគរបាលឈរជើងតាមខ្សែបន្ទាត់ព្រំដែលកម្ពុជា-ឡាវ និងប្រជាពលរដ្ឋក្នុងភូមិសាស្ត្រស្រុកសៀមប៉ាង ខេត្តស្ទឹងត្រែង កាលពីរសៀលថ្ងៃទី១៧ ខែកុម្ភៈឆ្នាំ២០២៥នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីប្រគល់អំណោយជាអំពូលសូឡាទាំង៥០០ឈុត ក៏មានការអញ្ជើញចូលរួមពីសំណាក់លោកស្រីឡុង ភិរម្យ រដ្ឋលេខាធិការទេសចរណ៍ និងជាក្រុមប្រឹក្សាភិបាលនៃសមាគមសិល្បករខ្មែរ, និងជាសហស្ថាបនិកមូលនិធិសូឡា លោក សរ សុពុត្រា អភិបាលនៃគណៈអភិបាលខេត្តស្ទឹងត្រែង សិល្បករ សិល្បការនី សប្បុរសជន អាជ្ញាធរស្រុក និងបណ្តាមន្ទីរអង្គភាពពាក់ព័ន្ធមួយចំនួនផងដែរ។

អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ មានប្រសាសន៍ថា នេះជាការចូលរួមចំណែកជាមួយរាជរដ្ឋាភិបាល ក្នុងការសម្រាលទុក្ខលំបាក របស់ប្រជាពលរដ្ឋ ក៏ដូចជាក្រុមគ្រួសារយុទ្ធជន អតីតយុទ្ធជន និងនគរបាល ឈរជើងនៅតាមបណ្តោយព្រំដែនកម្ពុជា-ឡាវ។ នេះក៏ដើម្បីជាការលើកទឹកចិត្ត និងការកោតសរសើរអំពីការតស៊ូលះបង់របស់បងប្អូនដែលរស់នៅទីនេះ ដើម្បីជាផ្នែកមួយរួមចំណែកជាបង្គោលព្រំដែនក្នុងការការពារជាតិ និងកំពុងខ្វះខាតអំពូលសូឡាដើម្បីផ្គត់ផ្គង់នូវតំរូវការចាំបាច់ និងបន្ទាន់សំរាប់ជួយសម្រួលការរស់នៅរបស់ពួកគាត់។

គួររម្លឹកថា កាលពីថ្ងៃទី៤ ខែធ្នូឆ្នាំ២០២៤ លោក ទិត ថាវរិទ្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ ជាប្រធានក្រុមប្រឹក្សាភិបាលសមាគមសិល្បករខ្មែរ និងលោកជំទាវ ឡុង ភិរម្យ រដ្ឋលេខាធិការក្រសួងទេសចរណ៍សមាជិក្រុមប្រឹក្សាភិបាលសមាគម បាននាំយកអំពូលសូឡា ២៩៣ ប្រគល់ជូនដល់គ្រួសារយុទ្ធជន អតីតយុទ្ធជន និងនគរបាល ឈរជើងនៅតាមបណ្តោយព្រំដែនកម្ពុជា-ឡាវ ម្ដងរួចមកហើយ ក្រោមមានវត្តមានលោក សរ សុពុត្រា អភិបាលខេត្តស្ទឹងត្រែង សិល្បករ សិល្បការនី សប្បុរសជន អាជ្ញាធរស្រុក និងបណ្តាមន្ទីរអង្គភាពពាក់ព័ន្ធមួយចំនួនផងដែរ៕