ទៅដល់ស្ទឹងត្រែង កុំរំលងកោះតាមបណ្តោយដងទន្លេ ព្រោះវេលាទឹកស្រកនេះ ជាឱកាសមាស សម្រាប់កម្សាន្ត

នៅរដូវធ្លាក់ខ្យល់អំឡុងខែកត្តិកនេះ ជាវេលាអំណោយផលមួយសម្រាប់ដំណើរកម្សាន្តជិះទូកគយគន់ទេសភាព និងបោះតង់លំហែកាយលើឆ្នេរទន្លេដ៏ស្រស់ស្អាត ក្នុងទឹកដីនៃខេត្តស្ទឹងត្រែង។ បើនិយាយពីតំបន់ទេសចរណ៍ទាក់ទាញបំផុតសម្រាប់ខេត្តស្ទឹងត្រែង គឺតំបន់រ៉ាមសារ ព្រោះសម្បូរដោយធនធានធម្មជាតិ ព្រៃលិចទឹក និងជាជម្រកសត្វដ៏សំខាន់មួយនៃប្រទេសកម្ពុជា។

តំបន់ដីសើមមួយនេះ ជាតំបន់កម្សាន្តបោះតង់ដ៏ពេញនិយមបំផុតរបស់អ្នកទេចរ ដែលមានកោះសរុបជាង៥០ ហើយក្នុងនោះ កោះចំនួន៧ មានប្រជាសហគមន៍រស់នៅ និងប្រកបរបរកសិកម្មនៅទីនោះផងដែរ។ អ្វី​ដែល​ពិសេស​នៅ​ទីនោះ​ តំបន់នេះ គឺពោរពេញ​​ដោយ​តំបន់​​ទេសចរណ៍​ដែល​មាន​សក្ដានុពល​សំខាន់​ៗ​ដូចជា ព្រៃ​អ្នកតា កោះ​សំបូរ ក្បាល​កោះ​ស្នែង ក្បាល​កោះ​ទន្លេ​មួយ ភ្នំ​ត្រងើល អន្លង់​ថ្ម​កំបោរ វាល​ព្រលាន ក្បាលកោះ និង​កោះហាន ដែលជាឋានសួគ៌បៃតង លើដែនទឹកតំបន់អភិរក្សជីវចម្រុះតាមដងទន្លេមេគង្គលើ​ នៃតំបន់រ៉ាមសារ។

មកកាន់តំបន់នេះ ទេសចរអាចជិះកាយ៉ាកទស្សនាព្រៃលិចទឹកបៃតងខ្ចី ជាមួយនឹងឆ្នេរ​ខ្សាច់​សក្បុស ភ្លក់អាហារឆ្ងាញ់ ត្រីស្រស់ៗ ដែលចំអិនដោយប្រជាសហគមន៍នៅទីនោះ និងអ្វីដែលកាន់តែពិសេសជាងនេះទៀត គឺអាចទស្សនាសត្វស្លាបតំបន់ថ្មកំបោរនៃតំបន់រ៉ាមសារផងដែរ។

ទេសចរអាចជិះកាយ៉ាក ទស្សនាព្រៃលិចទឹកបៃតងខ្ចី ជាមួយនឹងឆ្នេរ​ខ្សាច់​សក្បុស ភ្លក់អាហារឆ្ងាញ់ ត្រីស្រស់ៗ ដែលចំអិនដោយសហគមន៍ ហើយអ្វីដែលកាន់តែពិសេសទៀតនោះ យើងអាចជិះទស្សនា សត្វស្លាប តំបន់ថ្មកំបោរនៃតំបន់រ៉ាមសារផងដែរ៕

អានបន្ថែម៖​ បើនិយាយដល់តំបន់ទេសចរណ៍ក្នុងខេត្តស្ទឹងត្រែង តើអ្នកនឹងនឹកឃើញកន្លែងណាខ្លះ?