ឆ្នាំ ២០២៥ មន្ទីរសាធារណការ​ខេត្តក្រចេះ ដាក់​ផែនការ​កែលម្អ​លើកកម្ពស់កម្រិតគុណភាព​ផ្លូវ​ជាតិ​សំខាន់ៗ

សម្រាប់ឆ្នាំ២០២៥ មន្ទីរសាធាធារណការ និងដឹកជញ្ជូនខេត្តក្រចេះ បាន​ដាក់ទិសដៅដល់ក្រុមមន្រ្តីបច្ចេកទេសចុះអនុវត្តការងារថែទាំនៅតាមកំណាត់ផ្លូវជាតិសំខាន់ៗក្នុងខេត្ត ដើម្បីលើកម្ពស់កម្រិតគុណភាពផ្លូវ និងសម្រួលដល់ការធ្វើចរាចរណ៍របស់ប្រជាពលរដ្ឋ បញ្ជ្រៀសគ្រោះថ្នាក់ជាយថាហេតុ។

លោក សាំង ប៊ុនថេន ប្រធាន​មន្ទីរសាធាធារណការ និងដឹកជញ្ជូនខេត្តក្រចេះបានឲ្យដឹងថា បច្ចុប្បន្ននេះក្រុមមន្រ្តីបច្ចេកទេស​​នៃមន្ទីរបានចុះអនុវត្តការងារថែទាំនៅកំណាត់ផ្លូវជាតិលេខ 73 ស្ថិតនៅភូមិដីថ្មី ឃុំព្រែកសាម៉ាន់ ស្រុកឆ្លូង និង​​កំពុងអនុវត្តដោយក្រាលកៅស៊ូប្រភេទ DBST ដែលមានប្រវែង 2050 ម ទទឹង 10ម។ ក្នុងនោះ​ក៏​មានការគូសគំនូស​ចរាចរណ៍ បំពាក់ផ្លាកសញ្ញាចរាចរណ៍ ដាំចំណាំងអក្ស័ផ្លូវ នឹងសុវត្ថិភាពចរាចរណ ចាប់ពីគីឡូម៉ែត្រ60+650 ដល់គីឡូម៉ែត្រ 62+700 ដែលមកដល់ពេលនេះសម្រេចបាន 27%។

លោកបន្តថា ចំពោះការងារស្ថាបនាលើកកម្រិតកំណាត់ផ្លូវខេត្តលេខ 371 ស្ថិតក្នុងភូមិព្រែកសំរោង១ ឃុំខ្សាច់អណ្តែត ស្រុកឆ្លូង ក៏កំពុងអនុវត្តការកសាងដោយក្រាលកោស៊ូប្រភេទ DBST ដែលមានប្រវែង 2300ម ទទឹង 7ម ក្នុងនោះមានចិញ្ចើមដីល្បាយថ្មទទឹង 1,5ម សងខាង មានគូសគំនូសចរាចរណ៍ទំហំ 1252 m2 ព្រមមានទាំងបំពាក់នូវផ្លាកសញ្ញាចរាចរណ៍ 10 ផ្លាក ចាប់ពីគ.ម 77+363 ដល់គ.ម 79+663 ហើយមកដល់ពេលនេះសម្រេចបាន 34%។

ជាមួយ​គ្នានេះ​ដែរ មន្ទីរសាធារណការ និងដឹកជញ្ជូនខេត្តបានស្នើសុំដល់បងប្អូនអ្នកធ្វើដំណើរបញ្ជារថយន្តទាំងតូចធំ រួមនិងម៉ូតូ ដែលឆ្លងកាត់នៅទីតាំងការដ្ឋាន មានគ្រឿងចក្រកំពុងមមាញឹកអនុវត្តការងារ សូមមានការប្រុងប្រយត្ន័ខ្ពស់ និងបន្ថយល្បឿន ដើម្បីការពារពីការគ្រោះថ្នាក់ជាយថាហេតុ៕

អត្ថបទ៖ ប្រុញ វិធិន