ប.ស.ស ដាក់ចេញវិធានការទប់ស្កាត់ករណីឆបោកសមាជិក ប.ស.ស តាមរយៈការបង់ភាគទាន

បេឡា​ជាតិ​សន្តិសុខ​សង្គម (​ប​.​ស​.​ស​.) នៃ​ក្រសួង​ការងារ និង​បណ្ដុះបណ្ដាល​វិជ្ជាជីវៈ បាន​ដាក់​ចេញ​វិធានការ​មួយ​ចំនួន​ទប់ស្កាត់​ករណី​ឆបោក​សមាជិក ប.ស.ស តាមរយៈ​ការ​បង់​ភាគទាន ដើម្បី​ជៀសវាង​នូវ​ការ​ខាតបង់​ប្រាក់កាក់ និង​ធនធាន​ផ្សេងៗ។

ការ​ដាក់​វិធានការ​នេះ​បាន​ធ្វើឡើង​បន្ទាប់ពី​នា​ពេល​ថ្មីៗ នេះ មាន​ករណី​ឆបោក​សមាជិក ប.ស.ស តាម​ប្រព័ន្ធ​អន​ឡាញ ដោយ​ការបន្លំ​ខ្លួន​ជា​មន្ត្រី ប.ស.ស ប្រើប្រាស់​រូបថត និង​និមិត្តសញ្ញា ប.ស.ស ឬ​ ក្លែងបន្លំ​លិខិត​ជូនដំណឹង​បង់​ភាគទាន ដោយ​ប្តូរ​លេខ​គណនី​ធនាគារ​ដែល​បាន​ចុះ​កិច្ចព្រមព្រៀង​ជាមួយ ប.ស.ស ទៅ​ជា​លេខ​គណនី​ធនាគារ ឬ QR Code ផ្ទេរ​ប្រាក់​គណនី​ផ្ទាល់ខ្លួន និង​បាន​ទាក់ទង​ទៅកាន់​សមាជិក​ដោយ​ផ្ទាល់​តាម​តេ​ឡេ​ក្រាម ឬ​ប្រើប្រាស់​ប្រព័ន្ធ​ផ្សព្វផ្សាយ​ផ្សេងៗ ទៀត ដើម្បី​ណែនាំ​ឱ្យ​រដ្ឋបាល​សហគ្រាស គ្រឹះស្ថាន និង​សមាជិក ប.ស.ស ធ្វើការ​បង់​ភាគទាន​តាម​លេខ​គណនី ឬ QR Code ក្លែងបន្លំ​នោះ។

នៅក្នុង​សេចក្ដីជូនដំណឹង​របស់ ប.ស.ស ដែល​ទើប​ទទួល​បាន​នៅ​ថ្ងៃទី​ ២៨ ​កុម្ភៈ​នេះ បាន​ជម្រាប​ជូន លោក​លោកស្រី​និយោជក ឬ​ម្ចាស់​សហគ្រាស គ្រឹះស្ថាន សាធារណជន និង​សមាជិក ប.ស.ស ឱ្យបាន​ជ្រាបថា ១.ប​.​ស​.​ស​. មិនមាន​គោលការណ៍​ឱ្យ​ម្ចាស់​សហគ្រាស គ្រឹះស្ថាន និង​សមាជិក ប​.​ស​.​ស​. បង់​ភាគទាន​ទៅ​គណនី ដែលមាន​ឈ្មោះ​ផ្ទាល់ខ្លួន​របស់​ជនណាម្នាក់​ឡើយ​។ ២.ការបង់​ភាគទាន​តាម​របប​ភាគទាន​ដោយ​ស្ម័គ្រចិត្ត​សម្រាប់​បុគ្គល​ស្វ័យ​និ​យោជន៍ និង​អ្នក​ក្នុងបន្ទុក​សមាជិក ប​.​ស​.​ស​. ត្រូវអនុវត្ត​តាមរយៈ​មុខងារ​បង់ប្រាក់​លើ​កម្មវិធី​ទូរ​សព្ទ​ដៃ​របស់​ធនាគារ​ដៃគូ​ចំនួន ៤ រួមមាន ៖ ធនាគារ CANADIA, ACLEDA, ABA និង FTB) ឬ​អញ្ជើញ​ទៅកាន់​ធនាគារ​ដៃគូ​ដោយផ្ទាល់។ ៣. ការ​បង់​ភាគទាន​តាម​របប​ភាគទាន​ជា​កាតព្វកិច្ច​របស់​សហ​គ្រាស គ្រឹះស្ថាន ត្រូវអនុវត្ត​តាមរយៈ​មុខងារ​បង់ប្រាក់​លើ​កម្មវិធី​ទូរ​សព្ទ​ដៃ​របស់​ធនាគារ​ដៃគូ ប​.​ស​.​ស​. ឬ​លេខ​គណនី ប​.​ស​.​ស​. នៅ​ធនាគារ​ដៃគូ​ទាំង​ ១១ ដែល​មាននៅ​ក្នុង​សេចក្ដីជូនដំណឹង​លេខ​ ០១១/២៥ ប​.​ស​.​ស​. ចុះ​ថ្ងៃទី​ ២៤ ខែ​កុម្ភៈ ឆ្នាំ ​២០២៥ ឬ​អញ្ជើញ​ទៅកាន់​ធនាគារ​ដៃគូ​ដោយ​ផ្ទាល់។ ៤.ប​.​ស​.​ស បាននិងកំពុង​សហការ​ជាមួយ​អាជ្ញា​ធរមាន​សមត្ថកិច្ច ដើម្បី​ស្រាវជ្រាវ វែកមុខ​ជន​ឆបោក ដើម្បី​នាំ​យក​មក​ទទួលខុស​ត្រូវ​ចំពោះ​មុខ​ច្បាប់​ជា​ធរមាន។ ៥.ករណី​សង្ស័យ ឬ​ត្រូវការ​ព័ត៌មាន​បន្ថែម សូម​ទាក់ទង​មក Call Center លេខ ១២៨៦ ឬ ១២៩៧ ឬ​ក្រុម​តេ​ឡេ​ក្រាម “​បេឡា​ជាតិ​សន្តិសុខ​សង្គម​_Chat”https://t.me/nssfcambodia_Chat ឬ “​ប្រអប់​បណ្ដឹង​អនាមិក https://feedback.mlvt.gov.kh/feedback ដើម្បី​ដាក់ពាក្យ​បណ្ដឹង។

ប​.​ស​.​ស​. បានស្នើ​ឱ្យ​លោក​លោកស្រី​និយោជក ឬ​ម្ចាស់​សហគ្រាស គ្រឹះស្ថាន សាធារណជន និង​សមាជិក ប​.​ស​.​ស សូម​បង្កើន​ការ​ប្រុងប្រយ័ត្ន​ខ្ពស់​ចំពោះ​ករណី​ឆបោក​ខាង​លើ​នេះ៕

អត្ថបទ ៖ សំអឿន