សម្ដេចធិបតីលើកឡើងពីគោលបំណងចង់ឱ្យមានទឹកគ្រប់គ្រាន់គ្រប់រដូវកាល

នាយករដ្ឋមន្ត្រី សម្ដេចធិបតី ហ៊ុន ម៉ាណែត បានប្រាប់ទៅក្រុងហ៊ុនសាជីវកម្មធនធានទឹកកូរ៉េ (K-Water) ពីបំណងរបស់រដ្ឋាភិបាលចង់ឱ្យមានធនធានទឹកគ្រប់គ្រាន់ទាំងរដូវប្រាំង និងវស្សា សម្រាប់ជាប្រយោជន៍ដល់ប្រជាពលរដ្ឋ​។

ថ្លែងក្នុងជំនួបជាមួយនាយកប្រតិបត្តិសាជីវកម្មធនធានទឹកកូរ៉េ (K-water) នៃក្រសួងបរិស្ថានរបស់សាធារណរដ្ឋកូរ៉េ និងជាប្រធានក្រុមប្រឹក្សាទឹកអាស៊ី (AWC)លោក  Yun Seogdae នៅព្រឹកថ្ងៃទី២៨ ខែកុម្ភៈ ឆ្នាំ២០២៥នេះ សម្ដេចធិបតី ហ៊ុន ម៉ាណែត បានលើកទឹកចិត្តឱ្យក្រុមហ៊ុនធ្វើការជាមួយក្រសួង-ស្ថាប័នពាក់ព័ន្ធ ដើម្បីសិក្សាលើការគ្រប់គ្រងធនធានទឹកនៅកម្ពុជា ដោយផ្ដោតទៅលើការវាយតម្លៃឱ្យបានគ្រប់ជ្រុងជ្រោយអំពីភាពខ្លាំង ក៏ដូចជាផលប៉ះពាល់នៃគម្រោងនេះលើសង្គម-សេដ្ឋកិច្ច និងបរិស្ថាន។

សម្ដេចបានលើកឡើងពីបំណងរបស់រដ្ឋាភិបាលដែល ចង់ឱ្យមានធនធានទឹកគ្រប់គ្រាន់ទាំងរដូវប្រាំង និងវស្សា សម្រាប់ជាប្រយោជន៍ដល់ប្រជាពលរដ្ឋ ក៏ដូចជាការរៀបចំចេញជាប្រព័ន្ធអេកូឡូស៊ីបម្រើដល់វិស័យកសិកម្ម និងកសិ-ឧស្សាហកម្ម និងគ្រប់គ្រងហានិភ័យនៃគ្រោះទឹកជំនន់ក្នុងរដូវវស្សា និងគ្រោះរាំងស្ងួត នៅរដូវប្រាំង។

លោក Yun Seogdae បានលើកឡើងថាការចូលរួមក្នុងវិស័យគ្រប់គ្រងធនធានទឹកនៅកម្ពុជាគឺជាគោលបំណងរបស់ក្រុមហ៊ុនលោកមកកម្ពុជាស្វែងរកឱកាសវិនិយោគនាពេលនេះ ខណៈកន្លងទៅ​ក៏មានកិច្ចសហប្រតិបត្តិការប្រកបដោយផ្លែផ្កាកន្លងមក រវាងក្រុមហ៊ុន និងក្រសួង-ស្ថាប័នពាក់ព័ន្ធនៃរាជរដ្ឋាភិបាលកម្ពុជាផងដែរ។

គួរឱ្យដឹងថាថ្មីៗនេះ រដ្ឋបាលរាជធានីខេត្តជាបន្តបន្ទាប់បានបង្កើតគណៈកម្មការគ្រប់គ្រងស្ទឹង ព្រែក អូ ប្រឡាយ បឹងបួរ និងអាងទឹកនៅក្នុងដែនគ្រប់គ្រងរបស់ខ្លួន ការបង្កើតនេះគឺឆ្លើយតបតាមអនុក្រឹត្យនៃការបង្កើតគណៈកម្មាជាតិគ្រប់គ្រងអាងទន្លេ ដែលមានតួនាទីក្នុងការធ្វើការអន្តរវិស័យដើម្បីគ្រប់គ្រងធនធានទឹក ទប់ស្កាត់ការរំលោភបំពានស្ទឹង បឹង អូ ប្រឡាយជាដើម្បី៕

អត្ថបទដោយ ហ៊ុន សិរីវឌ្ឍន៍