សប្ដាហ៍នេះ រដ្ឋមន្ត្រីការបរទេសតូហ្គោ ដែលជាប្រទេសនៅតំបន់អាហ្វ្រិក នឹងមកទស្សនកិច្ចនៅកម្ពុជា

សប្ដាហ៍នេះ រដ្ឋមន្ត្រីការបរទេសនៃប្រទេសតូហ្គោ ដែលជាប្រទេសមួយស្ថិតនៅតំបន់អាហ្វ្រិកខាងលិច នឹងមកធ្វើទស្សនកិច្ចផ្លូវការនៅកម្ពុជា ក្នុងគោលបំណងជួបជាមួយភាគីកម្ពុជា ដើម្បីជជែកគ្នាពីការស្វែងរកការពង្រឹងពង្រីកទំនាក់ទំនងជាមិត្តភាពរវាងប្រទេសទាំងពីរ កម្ពុជា និងតូហ្គោ។

ដំណើរទស្សនកិច្ចនេះ គឺតបតាមការអញ្ជើញរបស់ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជា ដែលនឹងអញ្ជើញមកបំពេញទស្សនកិច្ចផ្លូវការនៅកម្ពុជា ពីថ្ងៃទី១៨ ដល់ទី២០ ខែមីនា ឆ្នាំ២០២៥។ នេះបើតាមសេចក្ដីប្រកាសព័ត៌មានរបស់ក្រសួងការបរទេសកម្ពុជា។

លោក Robert DUSSEY រដ្ឋមន្ត្រីការបរទេស សមាហរណកម្មតំបន់ និងប្រជាជនតូហ្គោនៅបរទេស និងសមភាគីកម្ពុជា គឺលោកឧបនាយករដ្ឋមន្ត្រី ប្រាក់ សុខុន នឹងមានជំនួបទ្វេភាគី ដើម្បីពិភាក្សាអំពីការពង្រឹង និងពង្រីកកិច្ចសហប្រតិបត្តិការ ដែលបម្រើឱ្យផលប្រយោជន៍ទៅវិញទៅមករវាងប្រទេស និងប្រជាជនទាំងពីរ។

ក្នុងអំឡុងពេលស្នាក់នៅទីក្រុងភ្នំពេញ លោក Robert DUSSEY ក៏នឹងអញ្ជើញចូលជួបសម្តែងការគួរសមជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ព្រមទាំងនឹងមានជំនួបដាច់ដោយឡែកជាមួយរដ្ឋមន្ត្រីកម្ពុជាមួយចំនួន ផងដែរ។

បើតាមក្រសួងការបរទេសកម្ពុជា ដំណើរទស្សនកិច្ចនេះ គឺកើតមានឡើងចំពេលប្រទេសទាំងពីរប្រារព្ធខួបលើកទី១៥ នៃការបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋតូហ្គោ ដោយបានចាត់ទុកថា គឺជាឱកាសល្អសម្រាប់ប្រទេសទាំងពីរ ក្នុងការស្វែងយល់ពីវិស័យនានា ដែលមានសក្តានុពលសម្រាប់ធ្វើកិច្ចសហប្រតិបត្តិការ៕