អ៊ិចស្ការវ៉ាទ័រ មួយគ្រឿងឈូសឆាយលើដីសម្បទានសង្គមកិច្ច ត្រូវរដ្ឋបាលស្រុកពេជ្រាដា ឃាត់និងធ្វើកិច្ចសន្យា

នៅថ្ងៃទី២៥ ខែមីនា ឆ្នាំ២០២៥ រដ្ឋបាលស្រុកពេជ្រាដា សហការជាមួយមន្ត្រីជំនាញបានឃាត់ (អ៊ិចស្ការវ៉ាទ័រ) មួយគ្រឿងដោយបានឈូសឆាយនៅលើដីសម្បទានសង្គមកិច្ចដោយខុសច្បាប់។ ក្នុងប្រតិបត្តិការនោះ រដ្ឋបាលស្រុកនិងមន្ត្រីជំនាញមិនបានអនុវត្តច្បាប់នោះទេគ្រាន់តែអប់រំណែនាំនិងព្រមាន ដល់ម្ចាស់ អេស្កាវ៉ាទ័រនោះបើសិនជាមានសកម្មភាពចូលមកឆាយ នៅលើដីសម្បទានសង្គមកិច្ចជាលើកទី២នឹងអនុវត្តទៅតាមផ្លូវច្បាប់ជាដាច់ខាត។

តាមប្រភពបានឲ្យដឹងថា ម្ចាស់គ្រឿងចក្រមានឈ្មោះ ស្ងួន ពិសាល ភេទប្រុសអាយុ៤៥ឆ្នាំមានទីលំនៅបច្ចុប្បន្ន ភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី បើកបរគ្រឿងចក្រម៉ាក(kumaisu)ពណ៍លឿង។ នៅក្នុងកិច្ចសន្យានោះ ម្ចាស់គ្រឿងចក្រ បានទទួលនូវកំហុសហើយបានអះអាងមុខសមត្ថកិច្ចថា បញ្ឈប់សកម្មភាពឈូសឆាយវ៉ៃជ្រួយដី នៅលើដីសម្បទានសង្គមកិច្ច ទៀតហើយ។ បន្ថែមពីនេះ ថា នឹងយកអេស្កាវ៉ាទ័រទៅវិញមិនទុកនៅតំបន់ហាមឃាត់ទៀតទេ ហើយក៏មិនធ្វើសកម្មភាពដោយយកគ្រឿងចក្រទៅឈូសឆាយ ដោយមិនមានលិខិតអនុញ្ញាតទៅតាមនីតិវិធីច្បាប់នោះដែរ។

ក្រោយមានការព្រមាននិងធ្វើកិច្ចសន្យាជាបន្តបន្ទាប់ទៅលើគ្រឿងចក្រដែល ចូលដល់តំបន់ហាមឃាត់បច្ចុប្បន្ន រដ្ឋបាលស្រុកពេជ្រាដាក៏ដូចជាសមត្ថកិច្ចជំនាញកំពុងព្យាយាមឃ្លាំមើលជាបន្តទៀត បើសិនជាមាន គ្រឿងចក្រណា ចូលទៅតំបន់ហាមឃាត់ នៅលើដីសម្បទានសង្គមកិច្ចជាពិសេស តំបន់គម្របព្រៃឈើ ដែនអភិរក្សដែនជម្រកសត្វព្រៃបរិស្ថាន។ អាជ្ញាធរមានសមត្ថកិច្ចនឹងចាត់វិធានការផ្លូវច្បាប់ ឲ្យទាន់ពេលវេលាដោយមិនមានការលើកលែងនោះឡើយ៕

អត្ថបទ៖រៀម សុខហេង