ថ្ងៃកំណើតនគរបាលជាតិ ឆ្នាំនេះ នឹងរៀបចំឡើងទ្រង់ទ្រាយធំជាងមុន ដោយមានទាំងក្បួនព្យុះហយាត្រា

ខួបអនុស្សាវរីយ៍លើកទី៨០ នៃថ្ងៃកំណើតនគរបាលជាតិ ឆ្នាំ២០២៥នេះ នឹងរៀបចំឡើងទ្រង់ទ្រាយធំជាងបណ្ដាឆ្នាំកន្លងទៅ ក្រោមអធិបតីភាពរបស់សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ដោយមានភ្ជាប់ជាមួយនឹងការហែរក្បួនព្យុះហយាត្រារបស់កងកម្លាំងនគរបាលជាតិ។ នេះជាការថ្លែងគូសបញ្ជាក់ឱ្យដឹងរបស់នាយឧត្តមសេនីយ៍ ស ថេត អគ្គស្នងការនគរបាលជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដើម្បីធានាទៅដោយរលូននូវការហែរក្បួនព្យុះហយាត្រា នាយឧត្តមសេនីយ៍ ស ថេត អគ្គស្នងការនគរបាលជាតិ នៅព្រឹកថ្ងៃទី៣ ខែមេសា ឆ្នាំ២០២៥នេះ បានចុះពិនិត្យផ្ទាល់ និងសំណេះសំណាលជាមួយកងកម្លាំងនគរបាល ដែលកំពុងហ្វឹកហាត់សម ដើម្បីត្រៀមអបអរសាទរខួបអនុស្សាវរីយ៍លើកទី៨០ ថ្ងៃកំណើតនគរបាលជាតិ នៅកោះនរា រាជធានីភ្នំពេញ។

តាមការបញ្ជាក់របស់នាយឧត្តមសេនីយ៍ អគ្គស្នងការនគរបាលជាតិ កម្លាំងហ្វឹកហាត់សមនេះ ត្រូវបានបែងចែកជាក្រុម ដែលក្នុងនោះ មានផែនឈរ និងផែនព្យុះហយាត្រា។ ដូច្នេះដើម្បីឱ្យកម្មវិធីប្រព្រឹត្តទៅដោយរលូនកម្លាំងទាំងអស់ ត្រូវពង្រឹងស្មារតីក្នុងការហ្វឹកហាត់សម ព្រោះនៅថ្ងៃកម្មវិធីជាក់ស្ដែងនឹងត្រូវប្រើប្រាស់ពេលវេលាយូរម៉ោង។

នាយឧត្តមសេនីយ៍ ស ថេត បានកោតសរសើរ និងវាយតម្លៃខ្ពស់ចំពោះសកម្មភាពហ្វឹកហាត់សមនាពេលកន្លងទៅ ដោយមើលឃើញថា កម្លាំងទាំងអស់បានខិតខំប្រឹងប្រែងក្រោមកម្ដៅថ្ងៃ ដោយមិនរុញរាឡើយ។

គួរជម្រាបថា នាថ្ងៃទី១៦ ខែឧសភា ឆ្នាំ២០២៥ខាងមុខ គឺជាខួបអនុស្សាវរីយ៍លើកទី៨០ ថ្ងៃកំណើតនគរបាលជាតិកម្ពុជា ដែលជារៀងរាល់ឆ្នាំ រដ្ឋាភិបាលតែងប្រារព្ធទិវាជាប្រវត្តិសាស្ត្រនេះ ក្នុងគោលបំណង ដើម្បីសម្តែងកត្តញ្ញុតាធម៌ចំពោះព្រះមហាករុណាទិគុណដ៏ឧត្តុង្គឧត្តមរបស់ព្រះករុណា ព្រះមហាវីរក្សត្រ ព្រះបាទសម្តេច ព្រះនរោត្តម សីហនុ «ព្រះបរមរតនកោដ្ឋ» ដែលបានបង្កើតកងកម្លាំងនគរបាលជាតិ។

ម្យ៉ាង គឺដើម្បីរំឭកឡើងវិញនូវការធ្វើពលិកម្មដ៏ធំធេងរបស់បុព្វបុរស រៀមច្បងនគរបាលជាតិគ្រប់ជំនាន់ ដែលបានតស៊ូប្រឈមមុខ ឆ្លងកាត់រាល់ការប្រែប្រួលស្មុគស្មាញគ្រប់និន្នាការសង្គម បង្កើតបាននូវស្នាដៃ និងសមិទ្ធផលឥតគណនា បន្សល់ទុកនូវគំរូវីរភាពសម្រាប់កងកម្លាំងនគរបាលជាតិជំនាន់ក្រោយ យកមកសិក្សារៀនសូត្រ ដើម្បីអភិវឌ្ឍអង្គភាពឱ្យកាន់តែមានភាពរីកចម្រើន៕