អគ្គនាយកដ្ឋានអន្តោប្រវេសន៍ ព្រមានប្រើវិធានការច្បាប់ចំពោះជនក្លែងគេហទំព័រ Cambodia e-Arrival

អគ្គនាយកដ្ឋានអន្តោប្រវេសន៍ បានប្រកាសបដិសេធចំពោះគេហទំព័រ ដែលមានអាសយដ្ឋាន https://cambodia-e-arrival.com គឺមិនមែនជាគេហទំព័រស្របច្បាប់ ដែលត្រូវបង្កើតឡើងដោយអគ្គនាយកដ្ឋានអន្តោប្រវេសន៍ សម្រាប់ប្រើប្រាស់ក្នុងការបំពេញព័ត៌មានតាមប្រព័ន្ធអេឡិចត្រូនិកសលាកបត្រចូលកម្ពុជានោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការអះអាងរបស់អគ្គនាយកដ្ឋានអន្តោប្រវេសន៍ គឺគេហទំព័រផ្លូវការនៃប្រព័ន្ធអេឡិចត្រូនិកសលាកបត្រចូលកម្ពុជា ទទួលការអនុញ្ញាតដោយរាជរដ្ឋាភិបាលកម្ពុជាមានតែមួយគត់ ដែលមានអាសយដ្ឋាន www.arrival.gov.kh ឬកម្មវិធី Cambodia e-Arrival។

ការអះអាងជាថ្មីម្តងទៀតរបស់អគ្គនាយកដ្ឋានអន្តោប្រវេសន៍ គឺដើម្បីឱ្យអ្នកធ្វើដំណើរចូលកម្ពុជាតាមអាកាសយានដ្ឋានអន្តរជាតិត្រូវប្រុងប្រយ័ត្នខ្ពស់ក្នុងការចូលទៅគេហទំព័រសម្រាប់ការបំពេញព័ត៌មានសលាកបត្រតាមប្រព័ន្ធអេឡិចត្រូនិក ដោយពិនិត្យឱ្យបានច្បាស់លាស់ ជៀសវាងការចូលទៅគេហទំព័រក្លែងបន្លំ ដែលនាំឱ្យខាតបង់ថវិកា ឬលួចយកព័ត៌មានផ្ទាល់ខ្លួនផ្សេងៗរបស់អ្នកប្រើប្រាស់ដោយខុសច្បាប់។

អគ្គនាយកដ្ឋានអន្តោប្រវេសន៍ បញ្ជាក់ថា សម្រាប់ការបំពេញព័ត៌មានតាមប្រព័ន្ធអេឡិចត្រូនិកសលាកបត្រចូលកម្ពុជា តាមរយៈតំណភ្ជាប់ www.arrival.gov.kh ឬកម្មវិធី Cambodia e-Arrival ពុំតម្រូវឱ្យបង់ថ្លៃសេវានោះទេ លើកលែងតែថ្លៃកម្រៃទិដ្ឋាការប៉ុណ្ណោះ។

ទន្ទឹមនោះ ជនណាដែលបង្កើតគេហទំព័រ ឬ កម្មវិធីក្លែងបន្លំនានាក្នុងរូបភាពដើម្បីបោកប្រាស់ជាប្រយោជន៍ផ្ទាល់ខ្លួន នឹងត្រូវចាត់វិធានការច្បាប់ជាធរមាន។ នេះជាការព្រមានរបស់អគ្គនាយកដ្ឋានអន្តោប្រវេសន៍ តាមរយៈសេចក្ដីបំភ្លឺ នាថ្ងៃទី០៨ ខែមេសា ឆ្នាំ២០២៥៕