ព័ត៌មានជាតិ
តើគួរបង្កើតម៉ាកយីហោអាជីវកម្មដោយខ្លួនឯង ឫនាំចូលពីខាងក្រៅ?
អាជីវកម្មម្ហូបអាហារ និងភេសជ្ជៈនៅក្នុងរាជធានីភ្នំពេញបាននឹងកំពុងរីកដុះដាលយ៉ាងឆាប់រហ័សនៅក្នុងរយៈពេលប៉ុន្មានឆ្នាំចុងក្រោយនេះ ដោយសារតែកំណើនសេដ្ឋកិច្ច និងការកើនឡើងប្រាក់ចំណូលរបស់ប្រជាពលរដ្ឋដែលធ្វើឱ្យពួកគាត់មានអំណាចនៃការទិញខ្លាំងជាងមុន។

លោក គួច សុខលី គឺជាប្រធានក្រុមហ៊ុន Cambodia Best Meal (CBM) ដែលជាក្រុមហ៊ុនបំរើសេវាកម្មម្ហូបអាហារ និងភេសជ្ជៈឈានមុខគេមួយនៅក្នុងប្រទេសកម្ពុជា។ បច្ចុប្បន្ន ក្រុមហ៊ុន CBM ដែលត្រូវបានបង្កើតឡើងតាំងពីឆ្នាំ២០០២ មានម៉ាកយីហោល្បីៗជាច្រើន ក្នុងនោះមានទាំងម៉ាកនាំចូលពីបរទេសដូចជា Tous Les Jours និង Domino’s Pizza និងម៉ាកដែលបង្កើតឡើងក្នុងស្រុកដោយខ្លួនឯងដូចជា The Asian Kitchen។
ទាក់ទងនឹងសំណួរដែលថាតើការបង្កើតម៉ាកយីហោដោយខ្លួនឯង ឫការនាំចូលម៉ាកយីហោពីខាងក្រៅមួយណាល្អជាង លោក គួច សុខលី មានប្រសាសន៍ថា៖ «វាអាស្រ័យទៅលើថាតើពួកគាត់ចង់ធ្វើវាធំប៉ុណ្ណាសម្រាប់គោលដៅអាជីវកម្មថ្ងៃអនាគត។ ប្រសិនបើពួកគាត់ចង់បង្កើតក្រុមហ៊ុនម្ហូបអាហារមួយធំល្មមដើម្បីទទួលបានចំណូលសមរម្យ និងចង់សោយសុខខ្លះ ពួកគាត់អាចបង្កើតម៉ាកយីហោដោយខ្លួនឯង ប៉ុន្តែត្រូវចំណាយពេលសិក្សា និងបង្កើតប្រព័ន្ធគ្រប់គ្រងឱ្យបានច្បាស់លាស់ដើម្បីឱ្យវាដំណើរការល្អ និងមានស្ថេរភាព។»

លោក គួច សុខលី បានបន្តទៀតថា «ផ្ទុយទៅវិញ ប្រសិនបើពួកគាត់ចង់ពង្រីកខ្លួនឯងឱ្យធំដើម្បីដើរទៅមុខបានលឿន និងមិនចំណាយពេលច្រើនដើម្បីសិក្សា ពួកគាត់គួរនាំចូលម៉ាកយីហោពីក្រៅ។ ការនាំចូលម៉ាកយីហោពីក្រៅអាចល្អជាង ដោយសារយើងមិនចាំបាច់ចំណាយពេលច្រើនទៅសិក្សា ពីព្រោះគេមានគម្ពីរហើយស្រាប់ដែលផ្ដល់អ្វីៗទាំងអស់មកឱ្យយើង។»
ទោះជាយ៉ាងណា ការបង្កើតម៉ាកយីហោអាជីវកម្មដោយខ្លួនឯងក្ដី ឫការនាំចូលម៉ាកយីហោពីខាងក្រៅក្ដីគឺសុទ្ធតែមានបញ្ហាប្រឈមមួយចំនួន ដែលទាមទារឱ្យម្ចាស់អាជីវកម្មត្រូវចេះដោះស្រាយឱ្យបានល្អ ដើម្បីឱ្យអាជីវកម្មដំណើរការទៅមុខបានដោយរលូន។

អំពីបញ្ហាប្រឈមនៅក្នុងអាជីវកម្មនេះ លោក គួច សុខលី បានរៀបរាប់ថា បញ្ហាប្រឈមមុនគេគឺបុគ្គលិក ដោយយើងត្រូវប្រាកដថាបុគ្គលិករបស់យើងត្រូវបានបណ្ដុះបណ្ដាលត្រឹមត្រូវ យល់់ពីវប្បធម៌របស់ក្រុមហ៊ុន និងយល់ពីម៉ាកយីហោនីមួយៗបានច្បាស់លាស់។ មិនតែប៉ុណ្ណោះ យើងត្រូវព្យាយាមបណ្ដុះបណ្ដាល និងបង្កើតវប្បធម៌ឱ្យបុគ្គលិកចេះស្រលាញ់ក្រុមហ៊ុន និងចាត់ទុកថាម៉ាកយីហោនីមួយៗគឺជារបស់ខ្លួនឯង។
លោក គួច សុខលី បានបន្តថា បញ្ហាប្រឈមបន្ទាប់គឺការប្រកួតប្រជែងលើទីផ្សារ។ ដោយសារទីផ្សារយើងនៅតូចនៅឡើយ យើងត្រូវធានាថាតើធ្វើយ៉ាងដូចម្ដេចដើម្បីអាចឈរជើងនៅលើទីផ្សារបានយូរអង្វែងដើម្បីទទួលបានប្រាក់ចំណេញ។ យើងមិនប្រកួតប្រជែងលើតម្លៃទេ តែយើងប្រកួតប្រជែងលើសេវាកម្ម និងគុណភាព ដោយផ្ដល់ឱ្យអតិថិជនរបស់យើងនូវអ្វីដែលល្អបំផុតសម្រាប់ពួកគាត់។ លើសពីនេះ យើងក៏មានការបញ្ចុះតម្លៃខ្លះដើម្បីឱ្យអតិថិជនរបស់យើងសប្បាយចិត្ត និងដើម្បីឱ្យពួកគាត់មានភក្ដីភាពចំពោះម៉ាកយីហោរបស់យើង។

គួរបញ្ជាក់ថា ក្រុមហ៊ុន CBM មានសាខានៅទូទាំងប្រទេសសរុបជាង៤០ ដូចជានៅរាជធានីភ្នំពេញ បាត់ដំបង និងសៀមរាប ដែលមានអតិថិជនខ្ទង់ពាន់នាក់ក្នុងមួយថ្ងៃ។ ទោះបីជាស្ថិតនៅក្នុងស្ថានភាពនៃការរីករាលដាលនៃជំងឺកូវីដ១៩ក្ដី ក្រុមហ៊ុន CBM នៅតែបន្តដំណើរការអាជីវកម្មជាធម្មតាដើម្បីបម្រើដល់អតិថិជនរបស់ខ្លួន ជាពិសេសតាមរយៈការដឹកជញ្ជូនម្ហូបអាហារដល់កន្លែង។
អត្ថបទ៖ វ៉ាត វិន

-
ព័ត៌មានអន្ដរជាតិ១ ថ្ងៃ ago
កម្មករសំណង់ ៤៣នាក់ ជាប់ក្រោមគំនរបាក់បែកនៃអគារ ដែលរលំក្នុងគ្រោះរញ្ជួយដីនៅ បាងកក
-
សន្តិសុខសង្គម៣ ថ្ងៃ ago
ករណីបាត់មាសជាង៣តម្លឹងនៅឃុំចំបក់ ស្រុកបាទី ហាក់គ្មានតម្រុយ ខណៈបទល្មើសចោរកម្មនៅតែកើតមានជាបន្តបន្ទាប់
-
ព័ត៌មានអន្ដរជាតិ៥ ថ្ងៃ ago
រដ្ឋបាល ត្រាំ ច្រឡំដៃ Add អ្នកកាសែតចូល Group Chat ធ្វើឲ្យបែកធ្លាយផែនការសង្គ្រាម នៅយេម៉ែន
-
ព័ត៌មានជាតិ២ ថ្ងៃ ago
បងប្រុសរបស់សម្ដេចតេជោ គឺអ្នកឧកញ៉ាឧត្តមមេត្រីវិសិដ្ឋ ហ៊ុន សាន បានទទួលមរណភាព
-
ព័ត៌មានជាតិ៥ ថ្ងៃ ago
សត្វមាន់ចំនួន ១០៧ ក្បាល ដុតកម្ទេចចោល ក្រោយផ្ទុះផ្ដាសាយបក្សី បណ្តាលកុមារម្នាក់ស្លាប់
-
ព័ត៌មានអន្ដរជាតិ៦ ថ្ងៃ ago
ពូទីន ឲ្យពលរដ្ឋអ៊ុយក្រែនក្នុងទឹកដីខ្លួនកាន់កាប់ ចុះសញ្ជាតិរុស្ស៊ី ឬប្រឈមនឹងការនិរទេស
-
សន្តិសុខសង្គម១ ថ្ងៃ ago
ការដ្ឋានសំណង់អគារខ្ពស់ៗមួយចំនួនក្នុងក្រុងប៉ោយប៉ែតត្រូវបានផ្អាក និងជម្លៀសកម្មករចេញក្រៅ
-
សន្តិសុខសង្គម១៤ ម៉ោង ago
ជនសង្ស័យប្លន់រថយន្តលើផ្លូវល្បឿនលឿន ត្រូវសមត្ថកិច្ចស្រុកអង្គស្នួលឃាត់ខ្លួនបានហើយ