លោក ជា សុផារ៉ា  ជាឥស្សរជនកម្ពុជាតែម្នាក់គត់ ក្នុងចំណោមបុគ្គល១០៧នាក់ ដែលជប៉ុន ផ្ដល់គ្រឿងឥស្សរិយយស

ឧត្ដមប្រឹក្សាផ្ទាល់ព្រះមហាក្សត្រកម្ពុជា លោក ជា សុផារ៉ា គឺជាឥស្សរជនកម្ពុជាតែម្នាក់គត់ ក្នុងចំណោមមនុស្ស១០៧នាក់ ដែលត្រូវបានទីស្តីការគណៈរដ្ឋមន្រ្តីរដ្ឋាភិបាលជប៉ុនប្រកាសផ្ដល់ជូនគ្រឿងឥស្សរិយយសសម្រាប់និទាឃរដូវឆ្នាំ២០២៥។ ជប៉ុន ផ្ដល់គ្រឿងឥស្សរិយយសនេះ ដល់លោក ជា សុផារ៉ា គឺតែមើលឃើញថា លោក បានរួមចំណែកក្នុងកិច្ចការដែលជាផ្ដល់ប្រយោជន៍រួម ក្នុងកិច្ចការងារសង្គម។ នេះបើតាមសេចក្ដីប្រកាសព័ត៌មានរបស់ស្ថានទូតជប៉ុនប្រចាំកម្ពុជា ចេញនៅថ្ងៃទី២៩ ខែមេសា ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​​សេចក្ដីប្រកាសព័ត៌មានរបស់ស្ថានទូតជប៉ុនប្រចាំកម្ពុជា សរសេរដូច្នេះ៖«នៅថ្ងៃទី ២៩ ខែមេសា ឆ្នាំ២០២៥ ទីស្តីការគណៈរដ្ឋមន្រ្តីរដ្ឋាភិបាលជប៉ុនបានប្រកាសឈ្មោះអ្នកដែលត្រូវទទួលគ្រឿងឥស្សរិយយសសម្រាប់សរទររដូវឆ្នាំ២០២៥។ ឯកឧត្តម ជា សុផារ៉ា គឺជាបុគ្គលម្នាក់ ក្នុងចំណោមបុគ្គលឆ្នើ​ម ១០៧រូបជាជនបរទេស ដែលត្រូវទទួលគ្រឿងឥស្សរិយយស ហើយឯកឧត្ដម ជា សុផារ៉ា ទទួលគ្រឿងឥស្សរិយយស The Grand Cordon of the Order of the Rising Sun ជាការទទួលស្គាល់ការរួមចំណែករបស់ឯកឧត្តម ក្នុងការពង្រឹងទំនាក់ទំនងនិងមិត្តភាពរវាងជប៉ុន និងកម្ពុជា។ »។

លោក ជា សុផារ៉ា កើតថ្ងៃទី ២០ ខែមីនា ឆ្នាំ១៩៥៣ នៅភូមិរការខ្មែរ ឃុំរការខ្នុរ ស្រុកក្រូចឆ្មារ ខេត្តកំពង់ចាម។ លោក គឺជាបុគ្គលឆ្នើមមួយរូបមានកេរិ៍ឈ្មោះល្បីល្បាញជំនាញដោះស្រាយបញ្ហាដីធ្លីនៅកម្ពុជា។ ក្នុងបទពិសោធសិក្សា លោកជា សុផារ៉ា បានឆ្លងកាត់វគ្គសិក្សានយោបាយជាច្រើននៅទីក្រុងហូជីមិញ ប្រទេសវៀតណាម។ លោកបានបញ្ចប់វគ្គសិក្សានយោបាយ ជំនាន់ទី១ នៅសាលានយោបាយរដ្ឋធានី វគ្គសិក្សានយោបាយបច្ចេកទេស នៅសាលារដ្ឋបាលនីតិវិធី វគ្គសិក្សាទ្រឹស្តីនយោបាយ ជំនាន់ទី៤ នៅសាលាង្វៀនអាយតួក។

លោកធ្លាប់កាន់តំណែងចាប់ពីអនុប្រធានតំបន់៤ក្រុងភ្នំពេញចាប់ពីឆ្នាំ ១៩៧៩ និងកាន់តំណែងជាអនុប្រធានគណៈកម្មាធិការប្រជាជនសង្កាត់លេខ៤ ក្រុងភ្នំពេញ, ប្រធានគណៈកម្មាធិការប្រជាជនខណ្ឌទួលគោក,អនុប្រធានគណៈកម្មាធិការប្រជាជនក្រុងភ្នំពេញ, អភិបាលរងរាជធានី, អភិបាលរងទី១ រាជធានី, ប្រតិភូរាជរដ្ឋាភិបាលទទួលបន្ទុកអភិបាលរងទី១ រាជធានី,ប្រតិភូរាជរដ្ឋាភិបាលទទួលបន្ទុកអភិបាលរាជធានី, ឯកអគ្គរាជទូតកម្ពុជាប្រចាំមីយ៉ាន់ម៉ា,ទីប្រឹក្សាសម្ដេចតេជោ ហ៊ុន សែន, រដ្ឋលេខាធិការក្រសួងរៀបចំដែនដី, រដ្ឋមន្ត្រីក្រសួងអភិវឌ្ឍន៍ជនបទ។

លោក ឡើងកាន់តំណែងជាទេសរដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម ពីខែមេសា២០១៦ ដល់ខែកញ្ញា ឆ្នាំ២០១៨, នៅខែកញ្ញា ឆ្នាំ២០១៨ រដ្ឋាភិបាលនីតិកាលទី៦ ចាប់ផ្ដើមឡើង លោកត្រូវបានតែងតាំងឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់។ នៅថ្ងៃទី១២ខែតុលា ឆ្នាំ២០២៣ ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រកម្ពុជា តែងតាំងលោក ជា សុផារ៉ា ជាឧត្ដមប្រឹក្សាផ្ទាល់ព្រះមហាក្សត្រ ឋានៈស្មើឧបនាយករដ្ឋមន្ត្រី។ ក្រៅពីលោក ជា សុផារ៉ា ក៏ជាសមាជិករដ្ឋសភានីតិកាលទី៧ផងដែរ៕

ដោយ៖ ង៉ិល ណារ៉ាត់