ស្ត្រីម្នាក់ បង្កើតបណ្តាល័យចំនួន២ ក្នុងសហគមន៍របស់ខ្លួនដើម្បីផ្តល់ឱកាស និងទម្លាប់អានសៀវភៅដល់ក្មេងៗ

កញ្ញា គីម សុខងីម បានបង្កើតបណ្ណាល័យចំនួន២ ក្នុងសហគមន៍របស់ខ្លួន នៅស្រុកកៀនស្វាយ ខេត្តកណ្តាល ដើម្បីផ្តល់ឱកាសដល់ក្មេងៗនៅក្នុងសហគមន៍មានឱកាសបានអានសៀវភៅ ព្រមទាំងបង្កើតជាទម្លាប់អានសៀវភៅដ៏ល្អមួយ ដើម្បីបង្កើនចំណេះដឹងដល់ពួកគេ និងអាចឱ្យពួកគេចាប់កាន់សៀវភៅបានច្រើនជាងការប្រើប្រាស់ទូរសព្ទដៃ។

កញ្ញា គីម សុខងីម បានប្រាប់មកកាន់ កម្ពុជាថ្មី ថា បណ្ណាល័យទី១ ដែលបានបង្កើតមានឈ្មោះថា បណ្ណាល័យសាធារណៈ ពោធិព្រឹក្ស ត្រូវបានបង្កើតនៅខែវិច្ឆិកា ឆ្នាំ២០២២ ដែលមានទីតាំងស្ថិតនៅក្នុងសាលាបឋមសិក្សាពោធិព្រឹក្ស តែម្តង ដែលនៅស្រុកកៀនស្វាយ ខេត្តកណ្តាល។ បណ្ណាល័យទី១នេះ ត្រូវបានបង្កើតដោយ ខ្លួន និងមិត្តភក្តិជាច្រើនទៀត ដើម្បីផ្តល់ឱកាសដល់សិស្សនៅទីនោះបានអានសៀវភៅ។ ចំណែកបណ្ណាល័យទី២ មានឈ្មោះថា បណ្ណាល័យសាធារណៈភូមិ ដែលកញ្ញាបានបង្កើតអំឡុងខែមេសា ដែលស្ថិតនៅក្នុងភូមិព្រែកប៉ុល ឃុំបន្ទាយដែក ស្រុកកៀនស្វាយ ខេត្តកណ្តាល ដើម្បីឱ្យក្មេងៗ នៅក្នុងសហគមន៍អាចអានសៀវភៅដោយភាពរីករាយ។ ចំពោះបណ្ណាល័យទី២នេះ សុខងីម ប្រាប់ថា ទទួលបានការគាំទ្រពីក្រុមគ្រួសារ មិត្តភក្តិ និងគ្រូបង្រៀននៅសាលាបឋមសិក្សាពោធិព្រឹក្ស។

មូលហេតុដែលបណ្តុះគំនិតឱ្យកញ្ញាបង្កើតបណ្ណាល័យទាំង២ឡើងមក ព្រោះខ្លួនចង់ឱ្យក្មេងៗមានឱកាសអាន និងបង្កើនទម្លាប់អានរបស់ពួកគេឱ្យបានច្រើន។ ទន្ទឹមនោះ សុខងីម យល់ឃើញថា ការអានជួយកុមារយ៉ាងច្រើន ក្នុងការបង្កើនចំណេះដឹង ការគិត និងកាត់បន្ថយពេលវេលារបស់ពួកគេជាមួយទូរសព្ទ។ កញ្ញា បញ្ជាក់ថា៖ “ខ្ញុំចង់ឱ្យក្មេងៗមានឱកាសអាន និងបង្កើនទម្លាប់អាន។ ខ្ញុំទទួលបានការគាំទ្រពីក្រុមគ្រួសារ មិត្តភក្តិ និងលោកគ្រូ អ្នកគ្រូ”។ សុខងីម បានបន្ថែមពីអ្វីដែលខ្លួនចង់ឃើញនោះគឺ ៖ “ខ្ញុំចង់ឱ្យគ្រប់ភូមិទាំងអស់ មានបណ្ណាល័យយ៉ាងហោចណាស់ ១”។

បណ្ណាល័យទាំង២ មានសៀវភៅជាច្រើនក្បាល ដូចជាសៀវភៅប្រភេទរឿងនិទាន សៀវភៅចំណេះដឹងទូទៅអំពីធម្មជាតិ វប្បធម៌ មនុស្ស និងសៀវភៅភាសាអង់គ្លេសជាដើម។ សម្រាប់កុមារដែលចូលអានសៀវភៅភាគច្រើន មានអាយុចន្លោះពី ៨ឆ្នាំ ទៅ១២ ឆ្នាំ។ ចំណែគសៀវភៅនៅក្នុងបណ្ណាល័យ មួយចំនួន គឺទទួលបានពីការបរិច្ចាគពីសប្បុរសជន រីឯ មួយចំនួនទៀត គឺ សុខងីម បានទិញដាក់ក្នុងបណ្ណាល័យដោយខ្លួនឯង។ នេះបើតាមការបញ្ជាក់ពី កញ្ញា គីម សុខងីម៕

អត្ថបទ៖ អុន ស្រីមាន