ជ្រោះថ្មតយ ក្លាយជាតំបន់ទេសចរណ៍ធម្មជាតិដ៏ទាក់ទាញ ក្នុងខេត្តរតនគិរី

ជ្រោះថ្មតយ ជាតំបន់ទេសចរណ៍ធម្មជាតិដ៏ស្រស់បំព្រងក្នុងខេត្តរតនគិរី មានផ្ទាំងថ្មធំៗរៀបជាជួរៗ តាមមាត់អូរ ដោយមានទឹកហូរ ហ៊ុំព័ទ្ធដោយដើមឈើខៀវខ្ចីទាំងសងខាង និងមានខ្យល់អាកាសត្រជាក់ស្រស់ស្រាយ។ កន្លែងដ៏ស្រស់ស្អាតនេះ បានក្លាយជាគោលដៅពេញនិយមសម្រាប់អ្នកស្រឡាញ់ធម្មជាតិ និងភ្ញៀវទេសចរ។

អ្នកធ្វើដំណើរអាចទៅដល់ជ្រោះថ្មតយ ដោយធ្វើដំណើរពីទីក្រុង ឆ្ពោះទៅស្រុកវើនសៃ ឆ្លងកាត់សាឡាង វើនសៃ ហើយឆ្លងកាត់ភូមិកងណក និងភូមិរ៉ក។ ការ​ធ្វើ​ដំណើរ​នេះ​មាន​ចម្ងាយ​ប្រមាណ​១០​គីឡូម៉ែត្រ​មុន​ពេល​មក​ទៅ​រមណីយដ្ឋាន​ថ្មតយ ស្ថិតនៅក្នុងភូមិ ឡាឡៃ ឃុំកុកឡាក់ ស្រុកវើនសៃ ខេត្តរតនគិរី ។

នៅផ្នែកខាងលើជ្រោះថ្មតយ ក៏ផ្ទះសំណាក់បែបជនជាតិដើមភាគតិច  ហើយនៅជិតមាត់អូរនោះ ក៏មានរោងមួយធ្វើពីឬស្សី ដែលមានទទឹងប្រវែង ៥ ម៉ែត្រ និងបណ្តោយ ៧ ម៉ែត្រ អាចសម្រាកដោយមិនប្រាក់នោះទេ។ នៅជិតផ្ទះសំណាក់ ក៏មានលក់នំចំណី បុកល្ហុង និងភេសជ្ជៈស្រស់ស្រាយ ដែលធ្វើឱ្យការទស្សនាប្រកបដោយផាសុកភាព និងមិនអាចបំភ្លេចបាន។

លោក សើម កេ ដែលមានតួនាទីជាគណៈកម្មាធិការគ្រប់គ្រងតំបន់នោះ បានប្រាប់ថា ជួរថ្មនេះលេចរូបរាង ស្ថិតនៅត្រង់អូរឡាឡៃ នារដូវប្រាំង ចាប់ពីខែ ធ្នូ  រហូតដល់ មករា ហើយ ខែវស្សានឹងបាត់ទៅវិញដោយសារទឹកហូរ ពីព្រោះដោយសារទឹកភ្លៀងក្នុងខែ កក្កដា។ លោកថា៖«ភ្ញៀវជាច្រើនដែលមកលេង ទីនេះគឺសម្រុកមកលេង តែនៅពេលមានបុណ្យជាតិ ដូចជាបុណ្យចូលឆ្នាំជាដើម  មិនខុសពីរមណីយដ្ឋាន ដដៃទៀតនោះទេ» ។

លោក សើម កេ បានឱ្យដឹងថា ជារៀងរាល់ឆ្នាំក្រុមការងារ តែងតែនាំគ្នាធ្វើកញ្ចុះនៅមាត់អូរក្រោមដើមឬ
ស្សី ដើម្បីទុកឱ្យភ្ញៀវទេសចរដែលមកកម្សាន្ត បានអង្គុយលេង និងគយគន់ទេសភាពដ៏ស្រស់បំព្រង។
រមណីយដ្ឋានបែបធម្មជាតិនេះ ត្រូវបានរៀបចំដោយសហគមន៍ ជាទីកន្លែងសម្រាប់ សម្រាកលំហែអារម្មណ៍ ស្រូបយកខ្យល់អាកាសបរិសុទ្ធ និងងូតទឹកលេងកម្សាន្ត ។ សម្រស់ធម្មជាតិនេះ បានទាក់ទាញភ្ញៀវដែលនៅក្នុងមូលដ្ឋាន និងក្រៅស្រុក មកលេងកម្សាន្ត មិនសូវអាក់ខាន់នោះទេ ។

បើតាមលោក សើម កេ ៖«ថ្មតយនេះ នៅតែជាការពេញនិយម របស់យុវជនសិស្សសាលា និងជនជាតិដើមភាគតិចជាច្រើន ដែលទៅលេងទស្សនា មិនដែលអាក់ខាន ពីព្រោះតែសម្រស់ធម្មជាតិ បែបធម្មជាតិជាតិទាំងនោះ»៕