អភិបាលស្រុកបន្ទាយស្រី ឱ្យអាណាព្យាបាលជំរុញកូនរៀនអង់គ្លេស និងកំព្យូទ័រ ដើម្បីងាយរកការងារ និងរកចំណូលពីទេសចរណ៍បរទេស

អភិបាលស្រុកបន្ទាយស្រី  លោក រិន ឡូត ប្រាប់ឱ្យអាណាព្យាបាលក្នុងសហគមន៍ ភូមិកកោះជ្រុំ ឃុំខ្នារសណ្ដាយ   ជំរុញកូនៗឲ្យចូលរៀនភាសាអង់គ្លេសនិងជំជំនាញកុំព្យូទ័រ  ដើម្បីទទួលបាននូវលទ្ធផលនៃសិក្សាបានល្អប្រសើរ ងាយស្រួលរកការងារធ្វើ និងអាចរកប្រាក់ចំណូលពីភ្ញៀវទេសចរណ៍បរទេស ដែលទៅកម្សាន្តនៅប្រាសាទបន្ទាយស្រី។ លោកអភិបាលស្រុក ជំរុញបែបនេះ ស្របពេល ដែលភូមិកកោះជ្រុំ  ក្នុងឃុំខ្នារសណ្តាយ ស្រុកបន្ទាយស្រី ទទួលបានសាលារៀនពី ក្រុមហ៊ុន គូឡារ៉ា វ៉ធើរ  ដែលសាលានេះ នឹងផ្ដល់កម្មវិធីសិក្សាភាសាអង់គ្លេស និងកុំព្យូទ័រដោយឥតគិតថ្លៃដល់កុមារនៅក្នុងតំបន់ផ្ទាល់ និងបណ្ដាតំបន់ដែលនៅជុំវិញ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពីពិធីសម្ពោធសាលារៀននៅថ្ងៃទី២២ ខែឧសភានេះ លោកអភិបាលស្រុកបន្ទាយស្រី រិន ឡូត ប្រាប់លោកគ្រូ អ្នកគ្រូ នៅសាលារៀន អូគូលែន ហ្រ្វីស្គូល (EAU KULEN FREE SCHOOL) ត្រូវធ្វើបែបណាកុំឲ្យម៉ោងសិក្សារបស់សាលាជាន់គ្នាទៅនឹងម៉ោងសិក្សារបស់សាលារៀនរដ្ឋ ព្រោះឃើញមានម៉ោងសិក្សាមួយចំនួនជាន់គ្នា។

លោក រិន ឡូត អភិបាលស្រុកបន្ទាយស្រី អរគុណយ៉ាងខ្លាំង ចំពោះការឧបត្ថម្ភ និងវិនិយោគជាបន្តបន្ទាប់របស់ក្រុមហ៊ុន គូឡារ៉ា វ៉ធើរ ដើម្បីការអភិវឌ្ឍន៍សហគមន៍ ជាពិសេសសម្រាប់ស្រុកបន្ទាយស្រី។ លោកចាត់ទុកការផ្ដល់សាលានេះ ថាជាការចូលរួមអភិវឌ្ឍជំនាញស្របទៅនឹងសង្គមបច្ចុប្បន្ន ហើយស្របនឹងយុទ្ធសាស្ត្របញ្ចកោណ របស់រាជរដ្ឋាភិបាលនីតិកាលទី៧ ដែលផ្ដោតលើការអភិវឌ្ឍធនធានមនុស្ស និងបច្ចេកវិទ្យា។

អភិបាលស្រុកបន្ទាយស្រី សង្កត់ធ្ងន់ដូច្នេះ÷”ក្រៅពីនេះក្នុងស្រុកយើងក៏មានសក្តានុពលខ្លាំងផ្នែកទេសចរណ៍ផងដែរ ព្រោះភ្ញៀវទេសចរអន្តរជាតិមកទស្សនា ប្រាសាទបន្ទាយស្រីកើនឡើងខ្លាំង។ ដូច្នេះ អាជ្ញាធរគួរតែផ្តល់អាទិភាពដល់ការអភិវឌ្ឍធនធានមនុស្ស ដើម្បីឲ្យយុវជន អាចរកការងារធ្វើ និងអាចសន្ទនាជាមួយភ្ញៀវបរទេសបាន។ ពួកគេអាចប្រើជំនាញពីសាលា អូគូលែន ហ្វ្រីស្គូលដើម្បី ធ្វើការងារ ផ្សេងទៀតផងដែរ។”។

ទន្ទឹមនឹងការណែនាំ ឱ្យរៀនភាសាអង់គ្លេស និងកំព្យូទ័រ ដើម្បីមានចំណេះដឹង  ងាយស្រួលរកការងារធ្វើ និងសន្ទនា រកចំណូលពីភ្ញៀវបរទេស លោកអភិបាលស្រុក ប្រាប់កុមារដែលចូលរួមកម្មវិធីថា “ចេះប្រាកដ ប្រាក់រត់តាមហៅ”។

រាជរដ្ឋាភិបាល នីតិកាលទី ៧ នៃរដ្ឋសភា បានកំណត់យកអាទិភាព គន្លឹះចំនួន ៥ «មនុស្ស ផ្លូវ ទឹក ភ្លើង និងបច្ចេកវិទ្យា» ក្នុង យុទ្ធសាស្ត្របញ្ចកោណ ដំណាក់កាលទី១ ដោយមានបញ្ចកោណយុទ្ធសាស្ត្រទី ១ ផ្តោតជាចម្បងលើការអភិវឌ្ឍមូលធនមនុស្ស ដែលជាមូលដ្ឋានចាំបាច់មិនអាចខ្វះបាន សម្រាប់ជំរុញពិពិធ-កម្ម, កំណើនសេដ្ឋកិច្ច និងការអភិវឌ្ឍសង្គម-សេដ្ឋកិច្ចជាតិ ប្រកបដោយបរិយាបន្ន និង ភាពធន់ ។

គួរឱ្យដឹងថា គម្រោងសាងសង់សាលារៀនឥតគិតថ្លៃនេះ កើតពីការប្តេជ្ញាចិត្តយ៉ាងមុតមាំនៃក្រុមហ៊ុន គូឡារ៉ា វ៉ធើរ ក្នុងការជួយជ្រោមជ្រែងអនាគតរបស់យុវជនកម្ពុជាតាមរយៈការអប់រំ ហើយនៅឆ្នាំ ២០២៤កន្លងទៅ សាលាប្រភេទនេះ ក៏បានបើកដំណើរការនៅស្រុកស្រយង់ ខេត្តព្រះវិហារ ដែលបច្ចុប្បន្នមានសិស្សច្រើនជាង ២០០នាក់កំពុងរៀនភាសាអង់គ្លេស និងជំនាញកុំព្យូទ័រដោយឥតគិតថ្លៃ។ 

អ្នកនាង Anouchka Forey នាយិកាក្រុមហ៊ុន គូឡារ៉ា វ៉ធើរ គូសបញ្ជាក់ដូច្នេះ  “ការអប់រំ គឺជាធាតុដ៏មានឥទ្ធិពលដែលអាចជម្រុញឱ្យមានការអភិវឌ្ឍន៍”។ អ្នកបន្តថាហើយក្រុមហ៊ុន  ជឿជាក់ថា កុមារគ្រប់ៗគ្នាគួរតែទទួលបានឱកាសក្នុងការសិក្សារៀនសូត្រ បង្កើនចំណេះដឹងដើម្បីបើកទ្វារទៅរកឱកាសដ៏ប្រពៃនៃជីវិត។ សាលារៀនគិតថ្លៃ អូ គូលែន បង្កើតឡើងដើម្បីបញ្ជាក់ពីការប្តេជ្ញាចិត្តយ៉ាងជ្រាលជ្រៅរបស់ក្រុមហ៊ុន ចំពោះការអភិវឌ្ឍន៍ដែលប្រកបដោយចីរភាព និងសមភាពសង្គមនៅកម្ពុជា៕