មេឃុំ ចៅសង្កាត់ជាស្ត្រី៣រូបឈ្នះពានរង្វាន់ស្ត្រីឆ្នើមក្នុងការ​ដឹកនាំមូលដ្ឋាន

មេឃុំ ចៅសង្កាត់ជាស្ត្រី​៣រូប​បាន​ឈ្នះពានរង្វាន់​ស្ត្រី​ឆ្នើម​ក្នុង​ការ​ដឹក​នាំ​មូលដ្ឋានក្នុង​មហាសន្និបាតលើក​ទី​៤ របស់សម្ព័ន្ធ​ភាពជាតិ​សមាគម​ក្រុមប្រឹក្សា​ថ្នាក់​មូលដ្ឋាន។ ការ​ប្រកាសជ័យ​លាភី​ធ្វើឡើង​កាលពី​ថ្ងៃទី​២២ ខែ​ឧសភា ឆ្នាំ២០២៥ថ្មីៗនេះ។

ពានរង្វាន់ស្ត្រីឆ្នើម​ក្នុង​ការ​ដឹក​នាំមូលដ្ឋាននេះបាន​អញ្ជើញ​អភិបាល​ក្រុង ស្រុកខណ្ឌ និងមេឃុំ ចៅសង្កាត់ជាស្ត្រីទាំង​អស់ចូលរួម។

ម្ចាស់ជ័យលាភីលេខ១នេះ​ការវប្រកួត​នេះគឺ​មេឃុំចំរើន ស្រុកសង្គមថ្មី ខេត្តព្រះវិហារលោកស្រី សោម សុខុម ដែលមាន​ស្នាដៃក្នុងការអនុវត្តគម្រោងស្តីពីការអប់រំអភិវឌ្ឍន៍ កុមារតូច និងមត្តេយ្យសហគមន៍ ដោយទទួលបានពានរង្វាន់កិត្តិយសមួយ និងសម្ភារគាំទ្រសរុបចំនួន ១០០០ដុល្លារ និងដំណើរទស្សនកិច្ចសិក្សាទៅកាន់ប្រទេសកាណាដារយៈពេលពីរសប្តាហ៍។

ដោយឡែង​ម្ចាស់​ជ័យលាភីលេខ២បាន​ទៅ​លើចៅសង្កាត់ ចេក ក្រុងស្វាយរៀង ខេត្តស្វាយរៀង លោកស្រី យួន សោភ័ណ្ឌ ដែលមានស្នាដៃក្នុងការអនុវត្តគម្រោងស្តីពីគោលនយោបាយភូមិ ឃុំ សង្កាត់ មានសុវត្ថិភាព និងបរិស្ថានល្អ និងលេខ៣បាន​ទៅ​លើចៅសង្កាត់ស្រះចក ខណ្ឌដូនពេញ រាជធានីភ្នំពេញ លោកស្រី អ៊ុន សាជន ដែលមានស្នាដៃក្នុងការអនុវត្តគម្រោង ស្តីពីសេវាសង្គម។

គួរឱ្យដឹង​ដែរថាកម្មវិធីពានរង្វាន់​ស្ត្រីឆ្នើមក្នុងការ​ដឹក​នាំនៅ​មូលដ្ឋាននេះ​ទទួល​បាន​ការ​គាំទ្រហិរញ្ញវត្ថុពីរាជរដ្ឋាភិបាលប្រទេសកាណាដា និងសហព័ន្ធទីក្រុងនៃប្រទេសកាណាដា (FCM) ដែលមានគោលបំណង បង្កើនភាពជា​អ្នកដឹកនាំរបស់ស្ត្រី អនុវត្តអភិបាលកិច្ច និងវិមជ្ឈការ។ ជ្រើសរើសនិងទទួលស្គាល់ស្ត្រីឆ្នើមក្នុងភាពជាអ្នកដឹកនាំឈានមុខគេនៅមូលដ្ឋានដែលផ្តល់ផលវិជ្ជមានដល់ការរស់នៅរបស់ប្រជាពលរដ្ឋ និងចង់​លើកទឹកចិត្តការចម្លងការអនុវត្តល្អ ក្នុងភាពជាអ្នកដឹកនាំរបស់ស្ត្រីទៅកាន់រដ្ឋបាលមូលដ្ឋានផ្សេងទៀត ដោយប្រែក្លាយគំរូម៉ូ ដែលទៅជាឧបករណ៍សិក្សាក៏ដូចជាព្រឹត្តការណ៍រៀនសូត្រ៕

អត្ថបទដោយ ហ៊ុន សិរីវឌ្ឍន៍