ព័ត៌មានជាតិ

មន្ត្រីជាង ១០០នាក់បានលប់ឈ្មោះ ដាក់ឱ្យចូលនិវត្តន៍ និងលាឈប់ក្រោយសភាធ្វើកំណែទម្រង់អភិបាលកិច្ច

បានផុស

១ year មុន

នៅ

ថ្ងៃអង្គារ ២៩ មេសា ២០២៥

ដោយ

ប្រធានសភា សម្ដេចសភាធិបតី ឃួន សុដារី បានឱ្យដឹងថាក្នុងរយៈពេល២០ខែមកនេះបន្ទាប់ពីសភាធ្វើកំណែទម្រង់ និងលើកម្ពស់អភិបាលកិច្ចល្អមានមន្ត្រីជាង១០០នាក់ត្រូវបានលប់ឈ្មោះចេញពីក្របខណ្ឌការងារ ដាក់ឱ្យចូលនិវត្តន៍ ឬស្នើលាឈប់ដោយខ្លួនឯង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងពិធីបើកសិក្ខាសាលាផ្សព្វផ្សាយស្ដីពីការត្រួតពិនិត្យឡើងវិញ និងការវិភាគមុខងារ និងរចនាសម្ព័ន្ធក្រសួងស្ថាប័ន នៅព្រឹកថ្ងៃទី២៩ ខែមេសា ឆ្នាំ២០២៥នេះ នៅសាលប្រជុំអាគាររដ្ឋបាលសភាថ្មី សម្ដេចសភាធិបតី ឃួន សុដារី ថាក្នុងចំណោមមនុស្សជាង១០០នាក់នោះមានឈ្មោះខ្មោច២០នាក់ និងក្រៅពីនោះមានមួយចំនួនរកឃើញថាទៅធ្វើការងារផ្សេងពីការការងារនៅអគ្គលេខាធិការដ្ឋានសភា។

សម្ដេចថា៖ «អ្នកខ្លះពេលដែលវិភាគមុខងារទៅរកឃើញ។ កាលមុនស្រួលត្រង់ថាមានឈ្មោះក្របខណ្ឌទៅតែទៅធ្វើការងារផ្សេងទៅដើម្បីបង្គ្រប់ចំណាយឬអីផ្សេងទៅខ្ញុំអត់ដឹងទេតែឥឡូវអត់បាន។ ដល់អត់បានចឹងខ្ចិលគាត់សុំឈប់តែម្ដង អ្នកខ្លះគាត់សុំព្យួរការងារ»។

សម្ដេចបន្ថែមថាវិធាននេះបានចូលរួមចំណែកដ៏សំខាន់ក្នុងការសន្សំថវិការជាតិ ពង្រឹងប្រសិទ្ធភាពការងារ ការលើកកម្ពស់គោលការណ៍ជ្រើសរើសមន្ត្រីដោយផ្អែកលើស្នាដៃនិងសមត្ថភាព ភាពយុត្តិធម៌ គណនេយ្យភាព តម្លាភាព ឱកាសស្មើគ្នាក្នុងការទទួលបានការលើកទឹកចិត្ត និងជំរុញកំណែទម្រង់ឱ្យកាន់តែមានប្រសិទ្ធភាពដោយមិនមានការរើសអើង៕