នាយករដ្ឋមន្ត្រីកម្ពុជា-បារ៉ែន ជំរុញឱ្យមានយន្តការពិគ្រោះយោបល់រវាងក្រសួងការបរទេស

នាយករដ្ឋមន្ត្រីកម្ពុជា និងនាយករដ្ឋមន្ត្រីបារ៉ែន បានឯកភាពជំរុញឱ្យមានយន្តការពិគ្រោះយោបល់រវាងក្រសួងការបរទេសនៃប្រទេសទាំងពីរ ដើម្បីជាចំណែកដល់ការពង្រឹងពង្រីកកិច្ចសហប្រតិបត្តិការឱ្យកាន់តែរីកចម្រេីន និងរឹងមាំបន្ថែមទៀត។

បើតាមសម្ដេចធិបតី ហ៊ុន ម៉ាណែត ដែលបានគូសបញ្ជាក់នៅក្នុងជំនួបពិភាក្សាការងារជាមួយព្រះអង្គម្ចាស់ Salman bin Hamad Al Khalifa រជ្ជទាយាទ និងជានាយករដ្ឋមន្ត្រីបារ៉ែន ក្នុងទីក្រុងគូឡាឡាំពួ គឺប្រទេសទាំងពីរ កម្ពុជា-បារ៉ែន កំពុងចរចាគ្នា ដើម្បីបង្កើតយន្តការពិគ្រោះយោបល់ទ្វេភាគីរវាងក្រសួងការបរទេសនៃប្រទេសទាំងពីរ។ សម្ដេចធិបតី ថា យន្តការនេះ នឹងរួមចំណែកដល់ការពង្រឹងពង្រីកកិច្ចសហប្រតិបត្តិការរវាងប្រទេសទាំងពីរឱ្យកាន់តែរីកចម្រេីន និងរឹងមាំបន្ថែមទៀត។

គំនិតផ្ដួចផ្ដើមបង្កើតយន្តការពិគ្រោះយោបល់ទ្វេភាគីរវាងក្រសួងការបរទេសនេះ ត្រូវបានព្រះអង្គម្ចាស់ Salman bin Hamad Al Khalifa នាយករដ្ឋមន្ត្រីនៃប្រទេសបារ៉ែន បង្ហាញការគាំទ្រ ដើម្បីរួមចំណែកជំរុញកិច្ចសហប្រតិបត្តិការទ្វេភាគី កម្ពុជា-បារ៉ែន។

ជំនួបទ្វេភាគីដែលបានធ្វើឡើងលើទឹកដីប្រទេសម៉ាឡេស៊ី ក្នុងឱកាសទៅចូលរួមនូវកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ នៅទីនោះ សម្តេចធិបតី ហ៊ុន ម៉ាណែត ក៏បានជម្រាបជូនព្រះអង្គម្ចាស់ នាយករដ្ឋមន្ត្រីបារ៉ែន អំពីការធ្វើពិពិធកម្មដៃគូពាណិជ្ជកម្មរបស់កម្ពុជា រួមទាំងតំបន់មជ្ឈិមបូព៌ាផងដែរ។ សម្ដេចធិបតី បានបន្ថែមថា កម្ពុជាកំពុងពង្រីកការតភ្ជាប់ និងប្រព័ន្ធឡូជីស្ទីករបស់ខ្លួនតាមរយៈការកសាងហេដ្ឋារចនាសម្ព័ន្ធសំខាន់ៗដូចជាអាកាសយានដ្ឋានអន្តរជាតិ ផ្លូវល្បឿនលឿន និងការអភិវឌ្ឍសមត្ថភាពកំពង់ផែស្វយ័តក្រុងព្រះសីហនុ ឱ្យក្លាយជាមជ្ឈមណ្ឌលឡូជីស្ទីក ដែលមានសមត្ថភាពទទួលនាវាដឹកទំនិញពីទូទាំងពិភពលោក។

ត្រង់ចំណុចនេះ ព្រះអង្គម្ចាស់ Salman bin Hamad Al Khalifa បានលេីកឡេីងថា ប្រទេសបារ៉ែនកំពុងស្វែងរកកិច្ចសហប្រតិបត្តិការជាមួយជាមួយប្រទេសផ្សេងៗ ក្នុងនោះរួមមាន វិស័យថាមពល បច្ចេកវិទ្យាហិរញ្ញវត្ថុ (FinTech) ធនាគារ និងបញ្ញាសិប្បនិម្មិត (AI) ហើយព្រះអង្គម្ចាស់ បានគូសបញ្ជាក់ថា បារ៉ែនក៏ជាមជ្ឈមណ្ឌលឡូជីស្ទីកដ៏សំខាន់មួយ ដែលបម្រើដល់វិស័យនាំចេញក្នុងតំបន់ និងពិភពលោក។

បន្ថែមពីនេះ ថ្នាក់ដឹកនាំទាំងពីរ បានឯកភាពថា ប្រទេសទាំងពីរ មានលក្ខណៈបំពេញបន្ថែមគ្នាទៅវិញទៅមកលើវិស័យជាច្រើន ក្នុងនោះរួមមានការផ្គត់ផ្គង់អាលុយមីញ៉ូមសម្រាប់វិស័យសំណង់៕