ពូទីន បញ្ជូនដ្រូន ៣៥៥គ្រឿង បាញ់សន្ធាប់អ៊ុយក្រែនចាស់ដៃធំបំផុតមិនធ្លាប់មាន អត់ខ្វល់សម្តីត្រាំ 

មិនខ្វល់នឹងពាក្យសម្តីរបស់ប្រធានាធិបតីអាមេរិក ដូណាល់ ត្រាំ ឡើយ, មេដឹកនាំរុស្ស៊ី វ្ល៉ាឌីមៀរ ពូទីន នៅតែផ្គើនបញ្ជូនដ្រូន៣៥៥គ្រឿង វាយប្រហារប្រទេសអ៊ុយក្រែន ដោយនេះគឺជាការបាញ់សន្ធាប់ដោយប្រើដ្រូនទ្រង់ទ្រាយធំបំផុតមិនធ្លាប់មានសោះ ក្នុងសង្គ្រាមអាយុកាលជាង៣ឆ្នាំមួយនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃចន្ទទី២៦ខែឧសភាឆ្នាំ២០២៥, ការវាយប្រហារចុងក្រោយនេះ គឺជាការបាញ់ស្រោច ៣យប់ជាប់គ្នារបស់រុស្ស៊ី លើប្រទេសអ៊ុយក្រែន ហើយក្រៅពីដ្រូន ទីក្រុងមូស្គូក៏បាញ់មីស៊ីលចំនួន៩គ្រាប់ផងដែរ។

ជុំវិញរឿងនេះ កងទ័ពអាកាសអ៊ុយក្រែន អះអាងថា ខ្លួនបានបាញ់ទម្លាក់មីស៊ីលទាំងអស់ ចំណែកដ្រូនចំនួន២៨៨គ្រឿង ត្រូវស្ទាក់ចាប់បាន។ យ៉ាងណា ភ្លាមៗមិនទាន់មានសេចក្តីរាយការណ៍អំពីជនរងគ្រោះនិងការខូចខាតនោះទេ។

ពាក់ព័ន្ធការវាយប្រហារថ្មីនេះដែរ ប្រទេសប៉ូឡូញឯណោះ បានដាក់ពង្រាយយន្តហោះចម្បាំង ដើម្បីការពារដែនអាកាសរបស់ខ្លួន និងកំពុងតាមដានស្ថានការណ៍ យ៉ាងយកចិត្តទុកដាក់។

ការវាយប្រហារកើតឡើងប៉ុន្មានម៉ោងប៉ុណ្ណោះ បន្ទាប់ពីលោកត្រាំ និយាយថា មេដឹកនាំវិមានក្រឹមឡាំង វ្ល៉ាឌីមៀរ ពូទីន ឆ្កួតមែនទែនហើយ ព្រោះតែគាត់មិនព្រមឈប់បាញ់អ៊ុយក្រែនសោះ។ 

តាមរយៈសារបង្ហោះលើបណ្តាញសង្គម Truth Social កាលពីថ្ងៃអាទិត្យទី២៥ខែឧសភាឆ្នាំ២០២៥ (ពេលវេលានៅអាមេរិក), លោកត្រាំ សរសេរថា៖ «ខ្ញុំមានទំនាក់ទំនងល្អជាមួយលោកពូទីននៃប្រទេសរុស្ស៊ីជានិច្ច ប៉ុន្តែមានអ្វីកើតឡើងចំពោះគាត់។ គាត់កំពុងសម្លាប់ជនមិនដឹងអីជាច្រើននាក់ មិនមែនត្រឹមតែទាហាននោះទេ។ មីស៊ីលនិងត្រូវដ្រូនបានបាញ់ស្រោចលើទីក្រុងនានាក្នុងប្រទេសអ៊ុយក្រែន ទាំងដែលគ្មានហេតុផលអ្វីសោះ»។ 

ទន្ទឹមនោះ លោក ត្រាំ បានបញ្ជាក់យ៉ាងច្បាស់ថា ប្រសិនបើ ពូទីន ចង់លេបយកប្រទេសអ៊ុយក្រែនទាំងមូលមែននោះ រុស្ស៊ីនឹងដួលរលំ ជាក់ជាមិនខាន៕

អត្ថបទ៖ សុខ សុវណ្ណ

ចុចអាន៖ ត្រាំ ព្រមានថា បើ ពូទីន ចង់លេបយកប្រទេសអ៊ុយក្រែនទាំងមូល រុស្ស៊ីនឹងដួលរលំ