អាល្លឺម៉ង់ បើកដៃឲ្យអ៊ុយក្រែន យកអាវុធណាតូ វាយប្រហារចូលជ្រៅក្នុងដីរុស្ស៊ី

មេដឹកនាំវិមានក្រឹមឡាំង វ្ល៉ាឌីមៀរ ពូទីន ក្តៅស្លឹកត្រចៀករឹតតែខ្លាំងហើយ បន្ទាប់ពីអាល្លឺម៉ង់ បើកដៃឲ្យអ៊ុយក្រែន យកអាវុធរបស់អង្គការណាតូ ទៅបាញ់ចូលជ្រៅក្នុងទឹកដីរុស្ស៊ី ខណៈការសម្រេចចិត្តបែបនេះ ត្រូវគេមើលឃើញថា នឹងធ្វើឲ្យភ្លើងសង្គ្រាមកាន់តែឆាបឆេះសន្ធោសន្ធៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីប្រកាសរបស់អធិកាបតីអាល្លឺម៉ង់ Friedrich Merz កាលពីថ្ងៃចន្ទទី២៦ខែឧសភាឆ្នាំ២០២៥, ពេលនេះទីក្រុងបែរឡាំងនិងខ្នងបង្អែកលោកខាងលិចផ្សេងទៀតរបស់អ៊ុយក្រែន លែងដាក់កំហិតទីក្រុងកៀវ លើការប្រើប្រាស់សព្វាវុធដែលពួកគេជួយទៀតហើយ។ អ៊ុយក្រែនអាចការពារខ្លួនតាមរយៈការវាយប្រហារទីតាំងយោធាក្នុងប្រទេសរុស្ស៊ី ដោយប្រើបានទាំងមីស៊ីលអង់គ្លេស បារាំង អាល្លឺម៉ង់ ឬសហរដ្ឋអាមេរិក។

គ្រាន់តែប្រកាសរឿងនេះមិនបានប៉ុន្មានម៉ោងផង ស្រាប់តែភាគីរុស្ស៊ីបញ្ចេញប្រតិកម្មខ្លាំងៗ ដោយអ្នកនាំពាក្យវិមានក្រឹមឡាំង Dmitry Peskov និយាយថា ការសម្រេចចិត្តនេះ គឺផ្ទុយទៅនឹងកិច្ចខិតខំប្រឹងប្រែងរបស់រុស្ស៊ី ឆ្ពោះទៅដំណោះស្រាយជម្លោះដោយសន្តិវិធី។

ទន្ទឹមនោះដែរ លោក Peskov ព្រមានថា «នេះពិតជាការ​សម្រេច​ចិត្ត​ដ៏​គ្រោះ​ថ្នាក់ ​ម្តង​ទៀតហើយ ប្រសិនបើពួកគេពិតជាធ្វើមែន»។

ទីក្រុងមូស្គូតែងខឹងសម្បាចំពោះការដែលប្រទេសលោកខាងលិច បើកដៃឲ្យអ៊ុយក្រែន ប្រើអាវុធរបស់ខ្លួន បាញ់ចូលជ្រៅក្នុងដីរុស្ស៊ី ហើយព្រមានថា ការសម្រេចចិត្តបែបនេះ អាចធ្វើឲ្យប្លុកយោធាណាតូ ក្លាយជាភាគីចូលរួមដោយផ្ទាល់នៅក្នុងជម្លោះ។

អ្វីដែលគេចាប់អារម្មណ៍ខ្លាំង គឺកាលពីខែវិច្ឆិកាឆ្នាំមុន នៅពេលទីក្រុងមូស្គូ ធ្វើបច្ចុប្បន្នភាពគោលលទ្ធិនុយក្លេអ៊ែររបស់ខ្លួន ដោយសារតែស្ថានការណ៍កាន់តែមិនស្រួលពីមួយថ្ងៃទៅមួយថ្ងៃ៕

អត្ថបទ៖ សុខ សុវណ្ណ

ចុចអាន៖ ពូទីន បញ្ជូនដ្រូន ៣៥៥គ្រឿង បាញ់សន្ធាប់អ៊ុយក្រែនចាស់ដៃធំបំផុតមិនធ្លាប់មាន អត់ខ្វល់សម្តីត្រាំ