កម្ពុជា-ហ្វីលីពីន កំពុងស្វែងរកឱកាសបន្ថែមទៀតដើម្បីពង្រីកការធ្វើពាណិជ្ជកម្មទ្វេភាគី

កម្ពុជា និងហ្វីលីពីន បានបង្ហាញការប្ដេជ្ញាចិត្តដើម្បីស្វែងរកកាលានុវត្តភាពថ្មីៗបន្ថែមទៀត សំដៅពង្រឹងពង្រីកកិច្ចសហប្រតិបត្តិការនៃប្រទេសទាំងពីរ ពិសេសនោះគឺការធ្វើពាណិជ្ជកម្មទ្វេភាគី។

ប្រធានាធិបតីហ្វីលីពីន លោក ហ្វឺឌីណាន់ ម៉ាកូស (Ferdinand R. Marcos Jr.) បានសម្ដែងនូវការពេញចិត្តចំពោះទំនាក់ទំនងដ៍ល្អប្រសើរនៃប្រទេសទាំងពីរ និងបានគូសបញ្ជាក់អំពីបំណងពង្រឹង និងពង្រីកទំនាក់ទំនងផ្នែកពាណិជ្ជកម្មបន្ថែមទៀត។

ការបញ្ជាក់របស់ប្រធានាធិបតីហ្វីលីពីន បានធ្វើឡើងនៅក្នុងជំនួបទ្វេភាគីជាមួយនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត នាព្រឹកថ្ងៃទី២៧ ខែឧសភា ឆ្នាំ២០២៥ ក្នុងឱកាសដែលថ្នាក់ដឹកនាំទាំងពីរបានចូលរួមកិច្ចប្រជុំកំពូលអាស៊ាន នៅគូឡាឡាំពួ ប្រទេសម៉ាឡេស៊ី។

ស្របនឹងការលើកឡើងរបស់ប្រធានាធិបតីហ្វីលីពីន នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត ក៏បានសម្ដែងនូវការពេញចិត្តចំពោះភាពរីកចម្រើននៃទំនាក់ទំនងកម្ពុជា-ហ្វីលីពីន ព្រមទាំងបានស្វាគមន៍ចំពោះការបន្តស្វែងរកកាលានុវត្តភាពថ្មីៗថែមទៀត ដើម្បីបន្តពង្រឹង និងពង្រីកទំហំពាណិជ្ជកម្មទ្វេភាគីនៃប្រទេសទាំងពីរ។

វិស័យឌីជីថល បច្ចេកវិទ្យា និងបញ្ញាសិប្បនិម្មិត (AI), សហគ្រាសធុនមីក្រូ តូច និងមធ្យម (MSMEs), ពាណិជ្ជកម្មតាមប្រព័ន្ធអេឡិចត្រូនិក, សេវាកម្មថែទាំសុខភាព, ទេសចរណ៍, ព្រមទាំងសន្តិសុខ និងការពារជាតិ ក៏ជាវិស័យដ៏មានសក្តានុពល ដែលថ្នាក់ដឹកនាំទាំងពីរបានលើកមកពិភាក្សាគ្នាផងដែរ។ ថ្នាក់ដឹកទាំងពីរបានឯកភាពប្រគល់ភារកិច្ចដល់ក្រសួង-ស្ថាប័នពាក់ព័ន្ធនៃប្រទេសទាំងពីរ បន្តកិច្ចពិភាក្សាលម្អិតលើវិស័យសក្តានុពលទាំងនេះ ដើម្បីជំរុញឱ្យចេញជាសកម្មភាពជាក់ស្ដែង៕