តើប្រទេស និងវិស័យអ្វីខ្លះរបស់ EU ងាយរងគ្រោះខ្លាំងជាងគេដោយសារពន្ធ ត្រាំ?

ប្រធានាធិបតីសហរដ្ឋអាមេរិក លោក​ ដូណាល់ ត្រាំ កាលពីសប្ដាហ៍មុន បាន​ប្រកាសដំឡើងពន្ធ ៥០ ភាគរយ លើទំនិញនាំចូលពីសហភាពអឺរ៉ុប (EU) ចាប់ពីដើមខែមិថុនា មុនប្ដូរកាលបរិច្ឆេទនេះទៅថ្ងៃ ៩ កក្កដា វិញ ដោយសំអាងថា ប្លុកសេដ្ឋកិច្ចដ៏ធំមួយនេះពិបាក​ចរចាគ្នា។

នេះបង្កក្ដីបារម្ភកាន់តែធំសម្រាប់ EU ដែលនាំចេញទំនិញប្រមាណ ៥៣០ ប៊ីលាន​អឺរ៉ូ ទៅសហរដ្ឋអាមេរិកកាលពីឆ្នាំ ២០២៤។ អ្នកវិភាគភាគច្រើនយល់ស្របថា ពន្ធ ៥០ ភាគរយ ពិតជានឹងនាំឱ្យមានវិបត្តិសេដ្ឋកិច្ចនៅក្នុងតំបន់ចាយប្រាក់អឺរ៉ូ ដែលជំរុញឱ្យធនាគារកណ្តាលអឺរ៉ុប ត្រូវកាត់បន្ថយអត្រាការប្រាក់សំខាន់ៗលើសពីការរំពឹងទុកពីមុន។

​ប្រសិនបើ​អាមេរិកដាក់ពន្ធខ្ពស់លើទំនិញរបស់ EU ផលិតកម្មស្ថិតក្នុងចំណោមវិស័យសំខាន់ៗដែលងាយរងគ្រោះ ដោយសារតែការនាំចេញខ្ពស់ទៅសហរដ្ឋអាមេរិក។ យោងតាមរបាយការណ៍​របស់ភ្នាក់ងាររបស់ប្លុក Eurostat ទំនិញនាំចេញសំខាន់ៗបំផុត​ EU ​ទៅអាមេរិក ​គឺផលិតផលវេជ្ជសាស្ត្រ និងឱសថ​។

+ មុខបញ្ជីនៃ​ទំនិញរបស់ EU ទៅសហរដ្ឋអាមេរិក ឆ្នាំ ២០២៤ ផ្អែកលើទិន្នន័យ Eurostat

+ តើប្រទេស EU ណាខ្លះដែលទំនងរងផលប៉ះពាល់ខ្លាំងបំផុត ដោយពន្ធ​របស់សហរដ្ឋអាមេរិក?

ប្រទេស EU ដែលនាំចេញច្រើនជាងគេទៅ​អាមេរិក ទំនងងាយរងគ្រោះបំផុតចំពោះការដំឡើងពន្ធខ្ពស់របស់លោក ត្រាំ ​រួមមាន អាល្លឺម៉ង់ អៀរឡង់ អ៊ីតាលី និងបារាំង។

អាឡឺម៉ង់ គឺជាប្រទេសនាំចេញទំនិញធំបំផុតទៅ​អាមេរិកក្នុងឆ្នាំ ២០២៤ ដោយសារតែបរិមាណច្រើននៃការនាំចេញយានយន្ត និងផលិតផលឱសថ​។

អៀរឡង់​ក៏ដូចគ្នា ដោយសារ​ប្រទេសនេះសម្បូររោងចក្រផលិតកម្មរបស់ក្រុមហ៊ុនឱសថ។ អ៊ីតាលីឯណោះវិញ ក៏ស្ថិតក្នុងចំណោមរដ្ឋសមាជិកដែលងាយរងគ្រោះផងដែរ ដោយមានការប៉ះពាល់ខ្លាំង​ក្នុងឧបករណ៍ដឹកជញ្ជូន ការផលិតរថយន្ត ម៉ូដ (Fashion) និងឱសថ។