រដ្ឋបាលខេត្តបាត់ដំបងដោះស្រាយវិវាទរបស់ពលរដ្ឋសរុប៤៤២ករណី ក្នុងរយៈពេល ២ ឆ្នាំ

ករណីវិវាទដីធ្លីរបស់ប្រជាពលរដ្ឋនៅតាមមូលដ្ឋាន ជាកត្តាចាំបាច់បំផុត ដែលត្រូវមានដំណោះស្រាយពីអាជ្ញាធរខេត្ត ដើម្បី​​រកច្រកចេញរវាងភាគីទាំងសងខាងឲ្យទទួលយកបានដោយរលូនក្រៅប្រព័ន្ធតុលាការ និងបានបញ្ចប់នូវបញ្ហារាំរ៉ៃរហូតឈានដល់ការប្តឹងផ្តល់គ្នាទៅតុលាការ ធ្វើឲ្យភាគីទាំងសងខាងខាតពេលវេលា បាត់បង់ប្រាក់ចំណូលគ្រួសារព្រោះ​តែចង់ឈ្នះរៀងខ្លួន ខ្វះការយោគយល់គ្នា ខណៈអាជ្ញាធរមូលដ្ឋានស្រុក ឃុំ ខ្វះបច្ចេកទេសក្នុងការសម្របសម្រួល រកមូលហេតុបញ្ចប់មិនឃើញ។

ករណីវិវាទខាងលើនេះ អាជ្ញាធរនៅតាមមូលដ្ឋានបានឲ្យដឹងប្រហាក់ប្រហែលគ្នាថា រាល់ករណីវិវាទដីធ្លី សង្កេតឃើញថា ភាគី ទាំងសងខាង តែងមិនសូវទទួលយកការសម្របសម្រួលពីអាជ្ញាធរមូលដ្ឋាននោះទេ តែងរកឈ្នះរៀងខ្លួន ទើបអាជ្ញាធរមូលដ្ឋា នចងក្រងជាសំណុំរឿងទៅថ្នាក់ខេត្ត មុននិងភាគីរងគ្រោះប្តឹងផ្តល់គ្នាទៅតុលាការ។

ផ្ទុយពីការលើកឡើងពីអាជ្ញាធរតាមមូល ប្រជាពលរដ្ឋ និងមតិមហាជនបានសង្កេតឃើញថា ករណីវិវាទដីធ្លីរបស់ប្រជាពលរដ្ឋ កម្ររមានអាជ្ញាធរថ្នាក់ស្រុក/ឃុំរកដំណោះស្រាយបានដោយការសម្របសម្រួលសមស្របណាមួយនោះទេ។ ប្រភពដដែល បន្តថា បើទោះបីភាគីរងគ្រោះទៅប្តឹងជាច្រើនឡើកច្រើនសារ ក៏គ្មានលទ្ធផលដែរទើបពលរដ្ឋយកសំណុំរឿងដាក់ទៅថ្នាក់ខេត្ត ដើម្បីរកច្រកចេញដោយសមហេតុផល ជាងទៅរកប្រព័ន្ធតុលាការ ធ្វើឲ្យប៉ះពាល់ដល់សេដ្ឋកិច្ចគ្រួសាររបស់ពួកគាត់។

មន្ត្រីរដ្ឋបាលខេត្ត បានឲ្យដឹងថា រាល់ករណីវិវាទដីធ្លីរបស់ប្រជាពលរដ្ឋតាមមូលដ្ឋាន រដ្ឋបាលខេត្តក៏ដូចជាលោកអភិបាលខេត្ត តែងយកចិត្តទុកដាក់ ដើម្បីដោះស្រាយបញ្ចប់វិវាទក្រៅប្រព័ន្ធតុលាការ ជៀសវាងវិវាទនេះក្លាយជាករណីរាំរ៉ៃរហូត​ឈាន​ការប្តឹងផ្តល់គ្នារាប់ខែឆ្នាំ ធ្វើឲ្យប៉ះពាល់ដល់ជីវិភាពគ្រួសារធ្ងន់ធ្ងររបស់ប្រជាពលរដ្ឋ។

បើតាមរដ្ឋបាលខេត្តបាត់ដំបង ក្នុងខែឧសភា ឆ្នាំ២០២៥នេះ រដ្ឋបាលខេត្តទទួលបានសំណុំរឿងពីបងប្អូនប្រជាពលរដ្ឋ និង ដោះស្រាយបញ្ចប់ដោយជោគជ័យ នូវវិវាទចំនួន១២ករណី។ ហើយករណីវិវាទនេះ បើគិតចាប់តាំងពី ខែតុលា ឆ្នាំ​២០២២ រដ្ឋបាលខេត្តបានដោះស្រាយសរុបចំនួន៤៤២ករណី។ ហើយរដ្ឋបាលខេត្តនឹងបន្តខិតខំជួយដោះស្រាយ​ជូនបងប្អូនប្រជាពលរដ្ឋបន្ថែមទៀត ខណះពួកគាត់បានផ្តល់សំណុំរឿងដល់រដ្ឋបាលខេត្ត៕

អត្ថបទ៖ សៅ សារិទ្ធ