ជនជាតិដើមភាគតិចក្នុងភូមិមួយ នាខេត្តរតនគិរី ស្នើអាជ្ញាធរយ៉ាងទទូចតភ្ជាប់បណ្តាញអគ្គិសនីប្រើប្រាស់

ប្រជាពលរដ្ឋដែលជាជនជាតិដើមភាគតិចរស់នៅក្នុងភូមិទៀមលើ ស្រុកវើនសៃ ក្នុងខេត្តរតនគិរី បានអំពាវយ៉ាងទទូចដល់អាជ្ញាធរក្នុងមូលដ្ឋាន ជួយអន្តរាគមន៍តបណ្តាញអគ្គិសនីចូលដល់ភូមិរបស់ពួកគេ ដើម្បីបង្កលក្ខណៈងាយស្រួលក្នុងការប្រកបអាជីវកម្ម និងរស់នៅប្រចាំថ្ងៃ។

ការអំពាវនាវជាថ្មីនេះ បន្ទាប់ពីពលរដ្ឋក្នុងមូលដ្ឋាន បានស្នើសុំជាច្រើនលើកច្រើនសារទៅកាន់អាជ្ញាធរ ប៉ុន្តែពុំទាន់មានដំណោះស្រាយណាមួយសម្រាប់ពួកគេឡើយ។ បច្ចុប្បន្ននេះ ទោះបីជានៅស្រុកវើនសៃ មានបណ្តាញអគ្គិសនីប្រើប្រាស់នៅក្នុងស្រុក ប៉ុន្តែពុំទាន់បានចែកចាយ ឬពង្រីកការផ្គត់ផ្គង់នៅតាមភូមិឱ្យបានគ្រប់គ្រាន់នៅឡើយទេ ជាពិសេសនៅតំបន់ជនជាតិដើមភាគតិច។

ជាស្តែងនៅក្នុងភូមិទៀមលើ ស្រុកវើនសៃ ផ្ទះជនជាតិដើមភាគតិច ដែលរស់នៅតាមដងផ្លូវប្រមាណ ៤០ គ្រួសារ ពុំមានអគ្គិសនីប្រើប្រាស់អស់រយៈពេលជាច្រើនឆ្នាំ ជួបបញ្ហាងងឹត និងមិនអាចប្រកបអាជីវកម្ម ឬលក់ដូរបានឡើយ។

លោក ប៊ុន ថាឡៃ ជាអ្នកភូមិខាងលើបានឱ្យដឹងថា តាមពិតទៅក្រៅពីធ្វើស្រែកចម្ការ ពលរដ្ឋចង់បង្កើតអាជីវកម្ម ឬលក់ដូរ ដើម្បីរកចំណូលបន្ថែមសម្រាប់ផ្គត់ផ្គង់ជីវភាពគ្រួសារ ប៉ុន្តែដោយសារពុំមានអគ្គិសនី ទើបមិនអាចបើកដំណើរការបាន។ តួយ៉ាងក្នុងនាមលោកមានគ្រួសារជាជាងកាត់ដេរ ពិតជាត្រូវការអគ្គិសនីប្រើប្រាស់ជាខ្លាំង ដើម្បីភ្ជាប់ជាមួយម៉ាស៊ីនដេរ និងប្រើប្រាស់ភ្លើងនាពេយប់។ លោករៀបរាប់ថា៖«ជនជាតិដើមភាគតិច នាំគ្នារអ៊ូរាល់ថ្ងៃ ពួកយើងចង់ឱ្យមានភ្លើងប្រើប្រាស់។ អ្នកភូមិខ្លះសង់ផ្ទះថ្មីរួចរាល់ ប៉ុន្តែមិនទាន់ទៅរស់បាន ដោយសារខ្វះអគ្គិសនី»។

ពាក់ព័ន្ធបញ្ហានេះ លោក ភឿក ហុង អភិបាលរងស្រុកវើនសៃ បានថ្លែងប្រាប់ថា នៅឆ្នាំ២០២៥ ខាងអគ្គិសនីមានគម្រោងតភ្ជាប់ជូនបណ្តាញជូនប្រជាពលរដ្ឋ ដើម្បីសម្រួលដល់ការប្រើប្រាស់ ដោយសារនៅតំបន់នោះមានការអភិវឌ្ឍដូចជា មានអនុវិទ្យាល័យកាចូន សាលាមឋមសិក្សាកាចូន និងមានផ្ទះប្រជាពលរដ្ឋ ។ លោកបញ្ជាក់ថា៖« ផ្ទះជនជាតិភាគតិច អាចមានភ្លើងអគ្គសនីប្រើប្រាស់នៅចុងឆ្នាំនេះ ស្របពេលមានការតភ្លើងនៅកន្លែងផ្សេងដែរ»។

យ៉ាងណាមិញ ជនជាតិដើមភាគតិចបញ្ជាក់ថា គិតត្រឹមថ្ងៃទី ០៣ ខែឧសភានេះ ពុំទាន់ឃើញមានមន្រ្តី ឬសកម្មភាពតបណ្តាញអគ្គិសនីចូលក្នុងតំបន់គាត់រស់នៅនោះទេ ឃើញតែបង្គោលភ្លើងប៉ុណ្ណោះ។

បើតាមរបាយការណ៍របស់អាជ្ញាធរអគ្គិសនីកម្ពុជា ក្នុងរយៈពេល ១៥ ឆ្នាំ គិតចាប់ពីឆ្នាំ ២០១០ ដល់ឆ្នាំ ២០២៥ លំនៅដ្ឋានពលរដ្ឋមានជាង ៩៥ ភាគរយ ទូទាំងប្រទេសបានតភ្ជាប់បណ្តាញអគ្គិសនីប្រើប្រាស់ ខណៈអាជ្ញាធរអគ្គិសនីបានដាក់ផែនការ ពង្រីកបណ្តាញការចែកចាយរបស់ខ្លួនទៅកាន់តំបន់ដាច់ស្រយាល និងភូមិ ឃុំ បន្ថែមទៀត៕

អត្ថបទ៖ ខៀវ ចាប