ក្រសួងការពារជាតិកម្ពុជា ថាសារព័ត៌មានថៃខ្លះផ្សាយព័ត៌មានមិនពិត បញ្ឆេះភ្លើងសង្គ្រាម, ប្រភពព័ត៌មានពិតគឺក្រសួងការពារជាតិកម្ពុជា-ថៃ

ក្រសួងការពារជាតិកម្ពុជា កត់សម្គាល់ឃើញថា សារព័ត៌មានក្នុងប្រទេសថៃ បានចេញផ្សាយព័ត៌មានក្លែងក្លាយ ក្នុងចេតនាផ្លុំភ្លើង ផ្លុំផ្សែង ធ្វើយ៉ាងណាឱ្យស្ថានការណ៍ប្រឈមមុខគ្នានៅព្រំដែនកម្ពុជា-ថៃ ក្លាយទៅជម្លោះជាតិសាសន៍ បញ្ឆេះភ្លើងសង្គ្រាម។ ក្រសួងការពារជាតិកម្ពុជា អះអាងដូច្នេះ តាមរយៈសេចក្ដីប្រកាសព័ត៌មានផ្សាយទំព័រហ្វេសប៊ុកផ្លូវការនាព្រឹកថ្ងៃទី០៩ ខែមិថុនា នេះ។

ក្រសួងការពារជាតិកម្ពុជា សរសរក្នុងសេចក្ដីប្រកាសព័ត៌មានដូច្នេះ៖«ក្នុងរយៈពេលប៉ុន្មានថ្ងៃកន្លងទៅនេះ មានស្ថាប័នសារព័ត៌មានថៃ និងបណ្តាញសង្គមក្នុងស្រុកមួយចំនួនបានផ្សព្វផ្សាយព័ត៌មានមិនពិតនាំឱ្យមានការយល់ច្រឡំ ដែលអាចបញ្ឆេះកំហឹងជាតិសាសន៍ និងរុញច្រានឱ្យស្ថានការណ៍រឹតតែតានតឹង។»។

ក្នុងន័យនេះ ក្រសួងការពារជាតិកម្ពុជា ប្រាប់ និងអំពាវនាវឱ្យជនរួមជាតិទាំងអស់  ជឿជាក់តែព័ត៌មានដែលមានប្រភពច្បាស់លាស់ ជាពិសេសព័ត៌មានដែលចេញដោយរាជរដ្ឋាភិបាល និងពីក្រសួងការពារជាតិនៃប្រទេសទាំងពីរ ទើបជាប្រភពព័ត៌មានផ្លូវការ ពិត និងត្រឹមត្រូវ ជឿទុកចិត្តបាន។

ជាការកត់សម្គាល់ ក្រសួងការពារជាតិកម្ពុជា វាយតម្លៃថាសារព័ត៌មានថៃផ្សព្វផ្សាយព័ត៌មានមិនពិត បញ្ឆេះភ្លើងសង្គ្រាមដូច្នេះ បន្ទាប់ពីថ្មីនេះ សារព័ត៌មានក្នុងប្រទេសថៃខ្លះបាន​ចុះផ្សាយបែបកេងចំណេញ​ថា​  កងទ័ពកម្ពុជាស្លាប់ និងរបួសច្រើននាក់ ក្នុងហេតុការណ៍ផ្ទុះអាវុធកាលពីថ្ងៃទី២៨ ខែឧសភា  និងចុងក្រោយបង្អស់កាលពីល្ងាចថ្ងៃទី០៨ បានផ្សាយថា «កម្ពុជា ដកទ័ព និងលុបលេណដ្ឋានពីទីតាំងប្រឈមមុខខ្លាំង» ទាំងដែលក្រសួងការពារជាតិកម្ពុជា បញ្ជាក់ថាមានតែទាហានខ្មែរម្នាក់គត់ដែលស្លាប់ ចំណែកការផ្សាយថា«កម្ពុជាដកទ័ពចេញពីទីតាំងប្រឈម» វិញ គឺប្រមុខការពារជាតិកម្ពុជា នាយឧត្ដមសេនីយ៍ ទៀ សីហា និងនាយករដ្ឋមន្ត្រីថៃ លោកស្រី ផែថងថាន ពន្យល់ថា ភាគីទាំងពីរឯកភាពសម្រួលកងទ័ពចេញពីទីតាំងប្រឈមខ្លាំង។

ជាមួយគ្នាចំពោះរឿងរ៉ាវសារព័ត៌មានថៃ​ចុះផ្សាយបែបកេងចំណេញ​​ ថា «កម្ពុជាដកទ័ពចេញពីទីតាំងប្រឈម» នេះដែរ សម្ដេចតេជោ ហ៊ុន សែន នាយឧត្ដមសេនីយ៍ផុតលេខ ផ្កាយមាស៥ ចេញមកបញ្ជាក់ថា កម្ពុជា មិនដកកងទ័ពចេញពីដែនដីខ្លួនឯងឡើយ  គឺគ្រាន់តែសម្រួលទីតាំងឈរជើងបន្តិចប៉ុណ្ណោះ ហើយកម្ពុជា នៅតែបន្តប្ដឹងរឿងតំបន់ក្ដៅទាំង៤ ដូចជាតំបន់មុំបី ប្រាសាទតាមាន់តូច ប្រាសាទតាមាន់ធំ និងប្រាសាទតាក្របីទៅតុលាការអន្តរជាតិ នៅទីក្រុងឡាអែដដែល។  ជាមួយគ្នា ទន្ទឹមនឹងការសម្រួលទីតាំងឈរជើងរបស់កងទ័ពកម្ពុជា សម្ដេចតេជោ ប្រាប់ទៅពលរដ្ឋខ្មែរ ថាសត្រូវលបលួចបាញ់កងទ័ពកម្ពុជាមុន នោះកងទ័ពកម្ពុជា នឹងបាញ់ត្រឡប់ទៅវិញ ដើម្បីការខ្លួន និងទឹកដីកម្ពុជា តែរដ្ឋាភិបាលកម្ពុជា ហាមកងទ័ពខ្លួនដាច់ខាតមិនឲ្យបាញ់ប្រហារភាគីម្ខាងទៀតមុន ឬចូលក្នុងទឹកដីរបស់គេឡើយ។

ចំណែកលោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា  នៅព្រឹកថ្ងៃទី០៩ ខែមិថុនា នេះ អះអាងថា តាំងពីសម័យលង្វែកមក  ថៃតែងតែផ្សាយដំណឹង ឬព័ត៌មានបំភ្លៃការពិត លក្ខណៈសង្គ្រាមចិត្តសាស្ត្រ បំបែកបំបាក់ខ្មែរឱ្យអស់ជំនឿលើរដ្ឋាភិបាល អ្នកដឹកនាំប្រទេស ដើម្បីយកឈ្នះសង្គ្រាមដោយងាយ។

លោកបណ្ឌិត យង់ ពៅ សរសេរលើគណនីហ្វេសប៊ុកដូច្នេះ៖«កាសែតថៃ តែងផ្សាយបំភាន់ដើម្បីឱ្យខ្មែរលែងទុកចិត្តគ្នា រវាងសាធារណជន និងរដ្ឋាភិបាលកម្ពុជា ក្នុងន័យធ្វើសង្គ្រាមចិត្តសាស្ត្រ។ សូមប្រុងប្រយ័ត្នខ្ពស់បំផុត នេះជារបៀបសៀមធ្លាប់ធ្វើតាំងពីសម័យលង្វែកតរៀងរហូតមក។»។

កាលពីថ្ងៃទី៣១ ខែឧសភា កន្លងទៅ សម្ដេចធិបតី នាយឧត្តមសេនីយ៍ ហ៊ុន ម៉ាណែត នាយករដ្ឋមន្ត្រីកម្ពុជា ក៏ធ្លាប់វាយតម្លៃថា កាសែតថៃខ្លះផ្សាយបំប៉ោងពីខ្មែរថាទាហានខ្មែរមានរបួស និងស្លាប់ ផ្ទុយពីការពិតជាក់ស្ដែង ក្នុងចេតនាបំបាក់ស្មារតីកងទ័ពខ្មែរឲ្យដាក់អាវុធចុះ រត់ចោលសមរភូមិ៕

ដោយ៖ង៉ិល ណារ៉ាត់