ឆ្លើយតបក្ដីបារម្ភរឿងព្រំដែន សម្ដេចធិបតី ប្រាប់ពលរដ្ឋខ្មែរនៅបារាំងពីការប្ដេជ្ញាការពារបូរណភាពទឹកដីមិនឱ្យបាត់ឡើយ

មុនការវិលត្រលប់មកកម្ពុជា បន្ទាប់ពីបញ្ចប់ទស្សនកិច្ចការងារនៅប្រទេសបារាំង សម្តេចធិបតី ហ៊ុន ម៉ាណែត និងលោកជំទាវ បានអញ្ជើញទទួលទានអាហារពេលល្ងាចនៅភោជនីយដ្ឋាន ដែលជារបស់ពលរដ្ឋខ្មែរនៅទីក្រុងនីស។ ក្នុងគ្រាចុះប្រាស្រ័យដោយផ្ទាល់នេះ ពលរដ្ឋខ្មែរនៅទីនោះ បានលើកឡើងពីក្ដីបារម្ភចំពោះបញ្ហាព្រំដែន ដែលកំពុងកើតមានឡើងរវាងកម្ពុជា និងថៃ តែជាការឆ្លើយតប សម្ដេចធិបតី បញ្ជាក់ពីការប្ដេជ្ញាចិត្តយ៉ាងមុតមាំបំផុតចំពោះកិច្ចការពារបូរណភាពទឹកដី និងអធិបតេយ្យភាពជាតិ។

បើតាមសម្តេចធិបតី អមដោយវីដេអូជួបសំណេះសំណាល និងសួរសុខទុក្ខជាមួយប្រជាពលរដ្ឋខ្មែរមួយចំនួន ដែលកំពុងរស់នៅ និងប្រកបមុខរបរនៅទីក្រុងនីស ប្រទេសបារាំង បានបញ្ជាក់ឱ្យដឹងថា ពលរដ្ឋខ្មែរនៅបរទេស នៅតែមានចិត្តនឹកចំពោះស្រុកកំណើត និងបានបង្ហាញក្តីបារម្ភចំពោះបញ្ហាព្រំដែន ហើយជាមួយគ្នានេះ សហគមន៍ខ្មែរបានលើកទឹកចិត្តឱ្យរាជរដ្ឋាភិបាលបន្តអភិវឌ្ឍប្រទេសឱ្យកាន់តែរីកចម្រើន និងធានារក្សាឱ្យបាននូវសន្តិភាព។

សំណេររបស់សម្ដេចធិបតី៖ «ទោះបីជាបងប្អូនរស់នៅឆ្ងាយពីស្រុកកំណើតយ៉ាងណាក៏ដោយ ក៏ការគិតគូរពីស្រុកកំណើតរបស់ខ្លួនមានជាប់ជាប្រចាំ។ ពួកគាត់ប្រាប់ខ្ញុំថា សម្តេចធ្វើយ៉ាងណាអភិវឌ្ឍន៍ប្រទេសយើងឱ្យកាន់តែរីកចម្រើន ហើយកុំឱ្យមានសង្គ្រាមទៀតអី ជាពិសេសពួកគាត់តាមដានដោយក្តីបារម្ភពីបញ្ហាព្រំដែនដែលកំពុងក្តៅ»។

ឆ្លើយតបនឹងក្ដីបារម្ភខាងលើ សម្តេចធិបតី នាយករដ្ឋមន្ត្រី បានអះអាងទៅកាន់ប្រជាពលរដ្ឋនៅទីនោះ ថា រាជរដ្ឋាភិបាលកម្ពុជាប្តេជ្ញាដាច់ខាតក្នុងការការពារបូរណភាពទឹកដី និងស្វែងរកដំណោះស្រាយតាមសន្តិវិធី ដើម្បីជៀសវាងសង្គ្រាម និងការពារផលប្រយោជន៍ជាតិ និងប្រជាជនខ្មែរ។

ថ្លែងក្នុងសមាជសភា កាលពីព្រឹកថ្ងៃទី២ ខែមិថុនា ឆ្នាំ២០២៥នេះ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ពីជំហររបស់កម្ពុជា ដែលតែងប្រកាន់ខ្ជាប់ជានិច្ចនូវគោលជំហររក្សាសន្តិភាព មិត្តភាព និងកិច្ចសហប្រតិបត្តិការល្អជាមួយថៃ ហើយសម្រាប់ដំណោះស្រាយពាក់ព័ន្ធនឹងបញ្ហាព្រំដែន គឺកម្ពុជាប្រកាន់ជំហរដោះស្រាយដោយសន្តិវិធី តាមរយៈការប្រើប្រាស់យន្តការបច្ចេកទេស និងច្បាប់អន្តរជាតិ ជាគោល។

ក្នុងន័យនេះ កម្ពុជា នៅតែរក្សាជំហរនាំយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ដែលកំពុងកើតមានឡើងដ៏ក្ដៅគគុកពេលនេះ ទៅដោះស្រាយនៅតុលាការយុត្តិធម៌អន្តរជាតិ (ICJ) តែម្ដង ដើម្បីបញ្ចប់បញ្ហាព្រំដែនច្រំដែលនេះជាមួយប្រទេសថៃ ជាជាងបន្សល់ទុកបញ្ហាឱ្យនៅបន្តស្រពិចស្រពិលរយៈពេលវែង ដែលអាចបង្កឱ្យកើតមានជាជម្លោះប្រដាប់អាវុធសារជាថ្មី។  

បន្ថែមពីនេះ កម្ពុជា ក៏បន្តសហការជាមួយភាគីថៃដើម្បីជំរុញការវាស់វែង ខ័ណ្ឌសីមា និងបោះបង្គោលព្រំដែនរវាងប្រទេសទាំងពីរដែលនៅសេសសល់ (ក្រៅពីតំបន់ទាំង៤ខាងលើ) ដោយប្រើប្រាស់យន្តការគណៈកម្មការព្រំដែនចម្រុះ (JBC) កម្ពុជា-ថៃ។

ជាការកត់សម្គាល់ សម្ដេចធិបតី ហ៊ុន ម៉ាណែត ក៏បាននាំយករឿងកងទ័ពថៃឈ្លានពានដែនអធិបតេយ្យរបស់កម្ពុជាទៅទៅប្រាប់ប្រធានាធិបតីបារាំង លោក អេម៉ានុយអែល ម៉ាក្រុង ផងដែរ និងបានបញ្ជាក់ពីគោលជំហររបស់កម្ពុជា ក្នុងការបន្តរក្សាសន្តិភាព មិនចង់ធ្វើសង្គ្រាម និងការដោះស្រាយវិវាទ តាមផ្លូវតុលាការយុត្តិធម៌អន្តរជាតិ៕

ដោយ៖ ធឿន វ៉ាន់សុង