សម្ដេចធិបតី បញ្ជាក់ជំហរមិនចរចា ដោយទុកឱ្យថៃបើកព្រំដែនមុនកម្ពុជា ព្រោះថៃជាអ្នកបិទជាឯកតោភាគីមុន

សម្ដេចនាយករដ្ឋមន្ត្រី ហ៊ុន ម៉ាណែត បានបញ្ជាក់ជំហរមិនចរចាជាមួយភាគីថៃ ពាក់ព័ន្ធនឹងការបិទបើកច្រកព្រំដែនរវាងប្រទេសទាំងពីរឡើយ ដោយសម្ដេច ប្រាប់ឱ្យថៃបើកច្រកព្រំដែនមុន ហើយកម្ពុជានឹងបើកតាមក្រោយ ព្រោះថៃជាអ្នកបិទជាឯកតោភាគីមុន។

សម្ដេចធិបតី បានគូសបញ្ជាកថា កម្ពុជាមានសិទ្ធិគ្រប់គ្រាន់ក្នុងការបិទព្រំដែនជាមួយថៃជាអចិន្រ្តៃយ៍ ប៉ុន្តែកម្ពុជាមិនធ្វើដូច្នោះទេ គឺកម្ពុជាធ្វើសម្បទានឱ្យថៃបើកវិញមុន កម្ពុជាក៏បើកព្រំដែនវិញដែរ។ ការបញ្ជាក់ជំហរជាថ្មីនេះ គឺបានធ្វើឡើងក្នុងពិធីបិទកិច្ចប្រជុំគណៈកម្មាធិការកណ្តាលសហភាពសហព័ន្ធយុវជនកម្ពុជា ដែលប្រារព្ធឡើងនៅខេត្តសៀមរាប នៅព្រឹកថ្ងៃទី២៣ ខែមិថុនា ឆ្នាំ២០២៥។

សម្តេចធិបតី ហ៊ុន ម៉ាណែត បានថ្លែងថា កម្ពុជា ចាំតែធ្វើតាមក្រោយភាគីថៃតែប៉ុណ្ណោះ ព្រោះថៃជាអ្នកបិទដោយឯកតោភាគីមុន។ ដូច្នេះការបើកព្រំដែនឡើងវិញ ក៏ត្រូវតែធ្វើឡើងជាឯកតោភាគីដូចគ្នាដែរទៅជាការស្រេច គឺមិនបាច់ចរចាអ្វីនោះទេ។ សម្ដេច ថ្លែងដូច្នេះថា៖ «កម្ពុជា ក៏មិនចង់បិទដែរ ប៉ុន្តែពេលថៃបិទមិនបានពិគ្រោះយោបល់ជាមួយកម្ពុជាទេ។ អ៊ីចឹង បើកមិនបាច់ពិគ្រោះយោបល់ទេ»។

ក្នុងន័យនេះ សម្ដេចធិបតី នាយករដ្ឋមន្ត្រីនៃកម្ពុជា ប្រាប់ភាគីថៃ ថា បើសិនជាថៃបើកមុន យ៉ាងយូរ៥ម៉ោងក្រោយ កម្ពុជានឹងបើកដូចគ្នានេះ។ សម្ដេចធិបតីលើកឡើងថា ការបើកឡើងវិញនូវច្រកព្រំដែនទាំងអស់ឱ្យវិលទៅរកប្រក្រតីភាពដូចដើម គឺជាការបង្ហាញនូវឆន្ទៈ និងជំនឿទុកចិត្តរបស់ភាគីទាំងពីរ។

តែដរាបណាភាគីថៃមិនព្រមបើកព្រំដែនមុនទេ សម្ដេចធិបតី ប្រកាសថា កុំនិយាយរឿងកិច្ចប្រជុំចរចាឱ្យសោះ ជាពិសេសកិច្ចប្រជុំគណៈកម្មាធិការព្រំដែនថ្នាក់ភូមិភាគកម្ពុជា-ថៃ (RBC) គឺកម្ពុជា មិនចរចាជាដាច់ខាត។

គួរជម្រាបថា មុនពេលមានបញ្ហាព្រំដែន ច្រកព្រំដែនរវាងកម្ពុជា និងថៃ ត្រូវបើកដំណើរការនៅម៉ោង៦ព្រឹក និងបិទនៅម៉ោង១០យប់។ តែបច្ចុប្បន្នថៃ បើកម៉ោង៨ព្រឹក កម្ពុជាបើកម៉ោង ៩ព្រឹក ហើយបិទម៉ោង៤រសៀលដូចគ្នា។ ការបើកនៅម៉ោង៩ព្រឹកពីភាគីកម្ពុជា គឺជាការឆ្លើយតបនឹងភាគីថៃ ដែលបានបិទដោយឯកតោភាគីមុន៕

ដោយ៖ ធឿន វ៉ាន់សុង