ព័ត៌មានជាតិ

នគរបាលខណ្ឌបឹងកេងកង ចុះថតអត្តសញ្ញាណប័ណ្ណប្រគេនព្រះសង្ឃ នៅវត្តមហាមន្ត្រី

បានផុស

១ year មុន

នៅ

ថ្ងៃចន្ទ ២៣ មិថុនា ២០២៥

ដោយ

កាលពីព្រឹកថ្ងៃទី ២៣ ខែមិថុនា ឆ្នាំ ២០២៥ នេះ នគរបាល នៃអធិការដ្ឋាននគរបាលខណ្ឌបឹងកេងកង សហការជាមួយ នគរបាលជំនាញផែនការិយាល័យអត្តសញ្ញាណប័ណ្ណ នៃស្នងការដ្ឋាននគរបាលរាជធានីភ្នំពេញ បានចុះថតអត្តសញ្ញាណប័ណ្ណសញ្ជាតិខ្មែរប្រគេនដល់ព្រះសង្ឃនៅវត្តមហាមន្ត្រី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ទោ វុឌ្ឍ ផូសារវ័ន្ត អធិការនគរបាលខណ្ឌបឹងកេងកង បានឲ្យដឹងថា ក្នុងយុទ្ធនាការចុះថតអត្តសញ្ញាណប័ណ្ណប្រគេនដល់ព្រះសង្ឃនេះ ដោយយោងតាមសេចក្ដីប្រកាសរបស់ក្រសួងមហាផ្ទៃ និងមានការអនុញ្ញាតពីថ្នាក់ដឹកនាំ តម្រូវឲ្យប៉ុស្តិ៍នគរបាលទូទាំងប្រទេសថតអត្តសញ្ញាណប័ណ្ណប្រគេនព្រះសង្ឃ។

លោកអធិការបញ្ជាក់ថា កន្លងទៅ នគរបាល ថតតែអត្តសញ្ញាណប័ណ្ណជូនប្រជាពលរដ្ឋទូទៅ តែពេលនេះ ចុះថតប្រគេនជូនព្រះសង្ឃ។ មុនឈានដល់ការចុះថតអត្តសញ្ញាណប័ណ្ណប្រគេនជូនព្រះសង្ឃបាន ព្រះសង្ឃ ត្រូវបញ្ជាក់ពីកន្លែងស្នាក់នៅអចិន្ត្រៃយ៍ជាមុនសិន និងមានសំបុត្រកំណើតផងដែរ ពេលដែលបញ្ជាក់រួចរាល់ មន្ត្រីនគរបាលប៉ុស្តិ៍ អាចថតអត្តសញ្ញាណប័ណ្ណសញ្ជាតិខ្មែរប្រគេនជូនព្រះអង្គបាន។

ព្រះសង្ឃគង់នៅវត្តមហាមន្ត្រី បានមានសង្ឃដីកាថា ព្រះសង្ឃគ្រប់អង្គមានការសប្បាយចិត្តរីករាយនៅពេលដែលអាជ្ញាធរផ្ដល់ជូនអត្តសញ្ញាណប័ណ្ណព្រះសង្ឃយ៉ាងដូច្នេះ គឺមានភាពងាយស្រួលដល់ព្រះសង្ឃ ពេលធ្វើដំណើរទៅណាមកណា និងមានអាស្រ័យស្នាក់នៅច្បាស់ពិតប្រាកដ។ កន្លងទៅ ព្រះសង្ឃគ្រប់អង្គមានតែកាតព្រះឆាយាល័ក្ខណ៍ប៉ុណ្ណោះ ពេលនេះមានអត្តសញ្ញាណប័ណ្ណ ព្រះសង្ឃអាចធ្វើការងារ ឬឯកសារតាមតម្រូវការរបស់ព្រះសង្ឃបាន។

គួរបញ្ជាក់ថា ការផ្តល់សេវាលើការធ្វើអត្តសញ្ញាណប័ណ្ណ , សៀវស្នាក់នៅ និងសៀវភៅគ្រួសារជាដើម គឺ នគរបាលនៅតាមបណ្តាមូលដ្ឋានប៉ុស្តិ៍រដ្ឋបាលទាំង ១០៥ ក្នុងរាជធានីភ្នំពេញ តែងយកចិត្តទុកដាក់ជានិច្ចក្នុងការចុះធ្វើជាប្រចាំជូនប្រជាពលរដ្ឋ ដើម្បីអាចឲ្យពលរដ្ឋទទួលយកទៅប្រើប្រាស់តាមសេវាតម្រូវការចាំបាច់ និងជាក់ស្ដែងរៀងៗ ខ្លួន៕

អត្ថបទ ៖ សុភា