មេបញ្ជការអាវុធហត្ថកំពង់ស្ពឺ ឱ្យកងកម្លាំងត្រៀមខ្លួន២៤ម៉ោងរងចាំបទបញ្ជាបម្រើពលរដ្ឋ ហាមដាក់ច្បាប់

មេបញ្ជាការកងរាជអាវុធហត្ថខេត្តកំពង់ស្ពឺ លោកឧត្តមសេនីយ៍ត្រី ម៉េង ស្រ៊ុន បានប្រាប់ដល់កម្លាំងអាវុធហត្ថខេត្តកំពង់ស្ពឺទាំងអស់ថា ចាប់ពីពេលនេះតទៅ កម្លាំងទាំងអស់នឹងមិនត្រូវបានអនុញ្ញាតឱ្យដាក់ច្បាប់សម្រាកនោះទេ ពោលគឺ កម្លាំងទាំងអស់ត្រូវត្រៀមខ្លួននៅចំណុចខ្ពស់ ២៤ម៉ោងលើ២៤ម៉ោង រង់ចាំបទបញ្ជាថ្នាក់លើតែប៉ុណ្ណោះ។ ការលើកឡើងដូចនេះ ពេលត្រួតពិនិត្យកម្លាំងជាក់ស្តែងដោយផ្ទាល់ នៅទីបញ្ជាការដ្ឋានកងរាជអាវុធហត្ថខេត្តកំពង់ស្ពឺ ដោយមានការចូលរួមពី លោកវរសេនីយ៍ឯក មេបញ្ជាការរងផងដែរ នៅថ្ងៃទី២៣ ខែមិថុនា ឆ្នាំ២០២៥។

លោកឧត្តមសេនីយ៍ត្រី ម៉េង ស្រ៊ុន បានបញ្ជាក់ថា ការដាក់ចេញនូវវិធានការនេះ ដោយអនុវត្តតាមបទបញ្ជារបស់ លោកនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស លោកបានដាក់ចេញនូវបទបញ្ជាឱ្យកម្លាំងកងរាជអាវុធហត្ថលើផ្ទៃប្រទេសទាំងអស់ ត្រៀមខ្លួនចំណុចខ្ពស់ ២៤ម៉ោងលើ២៤ម៉ោង រង់ចាំបទបញ្ជាពីថ្នាក់លើ។

លោកឧត្តមសេនីយ៍ត្រីមេបញ្ជាការ ក៏បានបញ្ជាក់ទៀតថា ក្នុងនាមជាកងកម្លាំងត្រូវអនុវត្តតាមបទបញ្ជារបស់ថ្នាក់លើជាដាច់ខាត និងបន្តគោរពវិន័យក្នុងអង្គភាព ត្រូវមានសាមគ្គីភាព ចេះគោរពស្រលាញ់ និងឲ្យតម្លៃគ្នាទៅវិញទៅមក ព្រោះម្នាក់ៗសុទ្ធតែពាក់ឯកសណ្ឋានតែមួយ ធ្វើការក្នុងអង្គភាពតែមួយ សាមគ្គីភាពជាការងារស្នូលដែលនាំឲ្យយើងទាំងអស់គ្នា សម្រចជោគជ័យនូវភារកិច្ចដែលថ្នាក់លើដាក់ជូនកន្លងមក។

លោកឧត្តមសេនីយ៍ត្រីមេបញ្ជាការ ក៏បានកោតសរសើរដល់នាយទាហាន នាយទាហានរង នៃកងរាជអាវុធហត្ថខេត្តកំពង់ស្ពឺទាំងអស់ដែលបានបំពេញភារកិច្ចកន្លងមកប្រកបដោយប្រសិទ្ធភាព ទាំងនេះជាការខិតខំប្រឹងប្រែង ដែលបានលះបង់នូវកម្លាំងកាយ កម្លាំងចិត្ត ជាពិសេសបានលះបង់នូវសេចក្តីសុខផ្ទាល់ខ្លួន ដើម្បីការពារសន្តិសុខ សណ្តាប់ ជូនសង្គមជាត ។ សម្រាប់នាយទាហាន នាយទាហានរង ដែលធ្វើមិនបានល្អកន្លងមក បន្តខិតខំប្រឹងប្រែងបន្ថែមទៀត និងមើលគំរូក្រុមការងារដែលគាត់ធ្វើបានល្អជាគំរូរ ដើម្បីអង្គភាពទាំងអស់គ្នា៕