ខេត្តរតនគិរី នឹងរៀបចំព្រឹត្តិការណ៍ម្ហូប​«សម្លចាណាងឆ្នាំងយក្ស» ដើម្បីទាក់ទាញទេសចរជាតិ និងអន្តរជាតិ

រដ្ឋបាលខេត្តរតនគិរី សហការជាមួយមន្ទីរទេសចរណ៍ខេត្ត នឹងរៀបចំព្រឹត្តិការណ៍ធ្វើម្ហូប «សម្លចាណាង» ដែលជាអាហារប្រចាំតំបន់ និងតំណាងឲ្យជនជាតិដើមភាគតិច នៅថ្ងៃទី៣០ ខែមិថុនា ខាងមុខនេះ ដើម្បីទាក់ទាញភ្ញៀវទេសចរជាតិ​ និងអន្តរជាតិមកកម្សាន្ដ និងស្វែងយល់អំពីប្រពៃណីវប្បធម៌ របស់ជនជាតិដើមភាគតិច។

ព្រឹត្តិការណ៍ “សម្លចាណាងឆ្នាំងយក្ស” លើកទី១ ឆ្នាំ២០២៥ នឹងចាប់ផ្ដើមប្រព្រឹត្តទៅនៅវេលាម៉ោង២និង៣០នាទីរសៀល ថ្ងៃចន្ទ ទី៣០ ខែមិថុនា ឆ្នាំ២០២៥ នៅបរិវេណគ្រួសារដំរី មាត់បឹងកន្សែង ក្រុងបានលុង។

តាមការប្រកាសរបស់មន្ទីរទេសចរណ៍ខេត្តរតនគិរី ព្រឹត្តិការណ៍ “សម្លចាណាងឆ្នាំងយក្ស” នេះធ្វើឡើងដើម្បីបង្ហាញដល់ភ្ញៀវទេសចរជាតិ និងអន្តរជាតិ អំពីរបៀបធ្វើម្ហូបអាហាររបស់ជនជាតិដើមភាគតិច ហើយមិនត្រឹមតែបានយល់ដឹងពីមុខម្ហូបនេះនោះទេ អ្នកចូលរួមក៏អាចភ្លក្សរសជាតិផងដែរ។ ក្រៅពីព្រឹត្តិការណ៍ “សម្លចាណាងឆ្នាំងយក្ស” រដ្ឋបាលខេត្តក៏មានរៀបចំកម្មវិធី សិល្បៈ របាំប្រពៃណី ប្រគុំតន្ត្រី តាំងពិព័ណ៌ផ្លែឈើក្នុងស្រុកជាច្រើនដូចជា សាវម៉ាវ ទុរេន ប័រ ជាដើម។

គោលបំណងនេះ គឺដើម្បីទាក់ទាញភ្ញៀវទេសចរជាតិ និងអន្តរជាតិ មកទស្សនាកម្សាន្តតំបន់ទេសចរណ៍ និងស្វែងយល់អំពីប្រពៃណីវប្បធម៌ របស់ជនជាតិដើមភាគតិចនារដូវកាលបៃតង ក្នុងខេត្តរតនគិរី និងដើម្បីឱ្យព្រឹត្តិការណ៍កាន់តែមានភាពសប្បាយរីករាយ និងអធិកអធម ព្រមទាំងជំរុញចលនាប្រជាពលរដ្ឋ ភ្ញៀវទេសចរជាតិ និងអន្តរជាតិចូលរួមគាំទ្រ នូវផលិតផលរបស់ខេត្តរតនគិរី ភូមិភាគឦសាននារដូវកាលបៃតង៕

អត្ថបទ៖ ខៀវ ចាប