អាជីវកម្ម​រុករក​រ៉ែមាស​ខុសច្បាប់​ កំពុង​កើត​ឡើង​​យ៉ាង​អាណាធិបតេយ្យ​នៅភូមិអូរត្រូន

ពលរដ្ឋ នៅក្នុងភូមិអូរត្រូន ឃុំក្បាលដំរី ស្រុកអូរគ្រៀងសែនជ័យ ខេត្តក្រចេះ បាននឹងកំពុងតែសម្រុកធ្វើសកម្មភាពយកមាសយ៉ាងអាណាធិបតេយ្យជាច្រើនទីតាំង នៅក្នុងភូមិសាស្ត្រនៃទឹកដីភូមិអូរត្រូន។

យោងតាមប្រភពពីប្រជាពលរដ្ឋ បានរាយការណ៍ឱ្យដឹងថា បច្ចុប្បន្នមានសកម្មភាពរុករករ៉ែមាសខុសច្បាប់ជាច្រើនកន្លែង កំពុងតែដំណើរការ ដោយមានទឹកគ្រប់គ្រាន់សម្រាប់ធ្វើសកម្មភាពបូម និងរែងយករ៉ែមាសយ៉ាងអនាធិបតេយ្យ។

លោក សុខ យឿន មេភូមិអូរត្រូន បានបញ្ជាក់ប្រាប់ថា ក្នុងមូលដ្ឋានរបស់លោក ពិតជាមានការធ្វើសកម្មភាពរុករករ៉ែមាសខុសច្បាប់ក៏ពិតមែន ប៉ុន្តែមិនមានការធ្វើសកម្មភាពធំនោះទេ គឺមានតែប្រជាពលរដ្ឋ ធ្វើសកម្មបន្តិចបន្តួចតែប៉ុណ្ណោះ។

លោក ក៏បានបញ្ជាក់បន្ថែមថា នៅតំបន់រ៉ែមាស បើមិនឱ្យប្រជាពលរដ្ឋទៅរុករករ៉ែមាស ឲ្យទៅធ្វើអ្វីវិញ ហើយលោក ក៏មិនអាចបញ្ឈប់សកម្មភាពរបស់ពួកគាត់បានទេ ព្រោះវាជាមុខរបររបស់ប្រជាពលរដ្ឋក្នុងតំបន់នេះ ដែលគ្មានការងារធ្វើពិតប្រាកដ។

ពាក់ព័ន្ធជុំវិញករណីរុករករ៉ែមាសខុសច្បាប់ពីសំណាក់ប្រជាពលរដ្ឋ លោក រ័ត្ន តុលា ប្រធានមន្ទីររ៉ែ និងថាមពល ខេត្តក្រចេះ បានឱ្យដឹងថា លោកបានទទួលព័ត៌មាននេះ ហើយលោក បានរៀបចំកម្លាំងចុះត្រួតពិនិត្យហើយ តែពុំទាន់បញ្ជាក់ពេលវេលាច្បាស់លាស់នោះទេ។

គួរបញ្ជាក់ថា ក្នុងមូលដ្ឋានខាងលើនេះ មន្ត្រីជំនាញតែងតែចុះទៅធ្វើកិច្ចសន្យាអប់រំណែនាំដល់ក្រុមរុករកធរ៉ែមាសទាំងអស់នេះ ជាច្រើនលើកច្រើនសារមកហើយ ប៉ុន្តែហាក់បីដូចជាមិនមានប្រសិទ្ធភាពទាល់តែសោះ៕

អត្ថបទ៖ ប្រុញ វិធិន