ព័ត៌មានជាតិ

ក្រសួងការងារ នាំយកក្រុមហ៊ុនធំៗ ទៅសម្ភាសន៍ពលករខ្មែរមកពីថៃ នៅច្រកព្រំដែន ដើម្បីផ្តល់ឱកាសការងារភ្លាមៗ

បានផុស

១ year មុន

នៅ

ថ្ងៃពុធ ២ កក្កដា ២០២៥

ដោយ

ក្រសួងការងារ និងបណ្ដុះបណ្ដាលវិជ្ជាជីវៈ បានសហការជាមួយតំបន់សេដ្ឋកិច្ចពិសេសភ្នំពេញ (PPSEZ) តំបន់សេដ្ឋកិច្ចពិសេស ចេ ជាង (Zhejiang) សមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) និងរោងចក្រ Spot Tech ដើម្បីផ្តល់ឱកាសការងារភ្លាមៗ ជូនពលករខ្មែរដែលត្រឡប់មកពីប្រទេសថៃតាមច្រកព្រំដែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ក្នុងដំណើរចុះសួរសុខទុក្ខពលករខ្មែរមកពីប្រទេសថៃ កាលពីថ្ងៃទី ២៩ ខែមិថុនា ឆ្នាំ ២០២៥ ថា ក្រសួង បានរៀបចំស្តង់ពិព័រណ៍ការងារសម្រាប់តំបន់ PPSEZ , តំបន់ Zhejiang , សមាគម TAFTAC និងរោងចក្រ Spot Tech ដើម្បីផ្សព្វផ្សាយព័ត៌មានជ្រើសរើសកម្លាំងពលកម្មនៅតាមព្រំដែនកម្ពុជា-ថៃ។

លោករដ្ឋមន្ត្រី បញ្ជាក់ថា «យើងមាន PPSEZ , Zhejiang , TAFTAC និងរោងចក្រ Spot Tech សុទ្ធតែត្រូវការកម្លាំងពលកម្មច្រើនណាស់ បើសរុបទៅ ក្នុងមួយសប្ដាហ៍ យើងរើសកម្លាំងពលកម្ម ២៥ ម៉ឺនកន្លែង។ ក្នុងនោះ ការងារក្នុងរោងចក្រមានចំនួន ២១ ម៉ឺនកន្លែង ហើយការងាររោងចក្រយើងក៏មានលក្ខខណ្ឌការងារល្អដែរ គឺមានទាំងការថែទាំសុខភាព អត្ថប្រយោជន៍ផ្សេងៗ និងមានទាំងប្រាក់សោធននិវត្តន៍ផងដែរ»។

លោករដ្ឋមន្ត្រី បានគូសបញ្ជាក់ថា ការនាំយកក្រុមហ៊ុនធំៗ ទៅសម្ភាសន៍ផ្តល់ការងារភ្លាមៗ នេះ គឺជាការយកចិត្តទុកដាក់ដល់ពលករដែលត្រឡប់ពីប្រទេសថៃ ដើម្បីទទួលបានការងារភ្លាមៗ។

សូមបញ្ជាក់ថា មន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ដែលរួមមាន ទីភ្នាក់ងារជាតិមុខរបរ និងការងារ (NEA) បេឡាជាតិសន្តិសុខសង្គម (ប.ស.ស) មន្ទីរការងារ និងបណ្ដុះបណ្ដាលវិជ្ជាជីវៈ និងអាជ្ញាធរមូលដ្ឋាន បាននិងកំពុងរង់ចាំទទួលស្វាគមន៍ និងផ្ដល់ព័ត៌មានស្ដីអំពីឱកាសការងារដ៏សម្បូរបែប ការអប់រំបណ្ដុះបណ្ដាលបច្ចេកទេស និងវិជ្ជាជីវៈ និងអត្ថប្រយោជន៍របស់ ប.ស.ស ដល់ប្រជាពលរដ្ឋ ជាពិសេសពលករខ្មែរដែលបានវិលត្រឡប់មកស្រុកកំណើតវិញ៕