អភិបាល​ខេត្តក្រចេះអះអាង​ថា បទល្មើស​ព្រៃឈើ​ ប្រើប្រាស់​ពលរដ្ឋ​ជាខែល​​​នៅ​បន្ត​កើត​មាន​

លោក វ៉ា ថន អភិបាលខេត្តក្រចេះមានប្រសាសន៍ថា កន្លងមកក៏ដូចជាបច្ចុប្បន្នខេត្តក្រចេះបានជួបប្រទះការ​ប្រឈមជាច្រើនក្នុង​បញ្ហាបទល្មើស​ព្រៃ​ឈើ តាមរយៈការ​កាប់រាន ដុត ឈូសឆាយដីព្រៃឈើ ដើម្បីវាតយកដី​របស់រដ្ឋធ្វើ​កម្មសិទ្ធិ​ ដោយ​ប្រើ​ប្រា​ស់​​ប្រជាពលរដ្ឋធ្វើជាខែល​តាមរយៈការជួល​ផ្ទាល់ ឬទិញបន្ត​ក្នុងតម្លៃថោក។

អភិបាលខេត្តក្រចេះ មានប្រសាសន៍លើកឡើងបែបនេះនៅក្នុងពិធី​បុណ្យ “រុក្ខទិវា” ដែលបានប្រារព្ធធ្វើឡើង​នៅសាលាបឋម​សិក្សា​​​សំបូរ ស្ថិតនៅភូមិសំបូរ ឃុំសំបូរ ស្រុកសំបូរ នាព្រឹកថ្ងៃទី ៣ ខែកក្កដា ឆ្នាំ២០២៥។

លោក វ៉ា ថន បាន​ឲ្យ​ដឹង​ថា អាជ្ញាធរខេត្ត​តែងតែ​​យកចិត្ដទុកដាក់ លើ​ដំណើរការកែទម្រង់វិស័យ​ព្រៃឈើ​ជា​បន្ត​​​​បន្ទាប់រហូតមកដល់ពេលបច្ចុប្បន្ននេះ។ ដើម្បីចូលរួមអនុវត្ត និងសម្រេច​ឱ្យបាន​ជោគជ័យលើការកែទម្រង់វិស័យព្រៃឈើ ការ​ខិតខំលើកកម្ពស់កិត្យានុភាពប្រសិទ្ធភាព​នៃការអនុវត្តច្បាប់ ទាំងមន្ដ្រីរា​ជកា​រ ទាំងប្រជាពលរដ្ឋ ត្រូវតែ​គោរព​ប្រតិបត្ដិស្មើៗគ្នា។​

បើតាមលោកអភិបាល​ខេត្ត ការ​លើកតម្កើងសេចក្ដីថ្លៃថ្នូររបស់ជាតិ ប្រសិទ្ធភាពច្បាប់ យុត្ដិធម៌ និងនីតិរដ្ឋ​ជា​បច្ច័យនាំឱ្យមានការអភិវឌ្ឍជាតិឆ្ពោះទៅរកអនាគតដ៏រុងរឿង។

ពាក់ព័ន្ធ​ការ​រៀបចំ​ទិវាពលកម្មដាំកូនឈើហៅថា “រុក្ខទិវា” ថ្ងៃទី០៩ ខែកក្កដា លោក វ៉ា ថន អភិបាលខេត្តក្រចេះ បាន​បញ្ជាក់ថា គឺ​ធ្វើ​ឡើង​ក្នុង​គោលបំណង​បំផុស​ស្មារតី​ឱ្យប្រជាពលរដ្ឋ​ចេះស្រឡាញ់ព្រៃឈើ លើកកម្ពស់ស្មារតី​ថែរក្សាការពារ​ព្រៃ​​ឈើ​ដែ​ល​មាន​ស្រា​​ប់​ និង​ចូលរួមក្នុងការដាំកូនឈើឡើងវិញ ដើម្បីជាសុភមង្គលនិងសេចក្ដីសុខ​ចំរើន​​នៃ​ប្រទេ​ស​ជាតិ៕

អត្ថបទ៖ ប្រុញ វិធិន