មន្រ្តីសុខាភិបាល និងអាជ្ញាធរខេត្តកោះកុង បង្កើនការផ្សព្វផ្សាយអប់រំពីជំងឺគ្រុនឈាម

មន្រ្តីសុខាភិបាល និងអាជ្ញាធរមូលដ្ឋានខេត្តកោះកុង បាននិងកំពុងបង្កើនការផ្សព្វផ្សាយអប់រំការយល់ដឹង និងបង្ការការពារពីជំងឺគ្រុនឈាមជូនដល់ប្រជាពលរដ្ឋនៅក្នុងសហគមន៍ ខណៈឆ្នាំ២០២៤កើតមានចំនួន២៦៦ករណី។

លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលខេត្តកោះកុង បានឱ្យ កម្ពុជាថ្មី ដឹងនៅរសៀលថ្ងៃទី៧ ខែកក្កដា ឆ្នាំ២០២៥នេះថា ក្រុមការងារសហការជាមួយអាជ្ញាធរមូលដ្ឋានរួមគ្នាផ្សព្វផ្សាយអប់រំយល់ដឹងកាន់តែច្រើនអំពីវិធីកម្ចាត់ប្រភពដែលនាំឱ្យកើតជំងឺគ្រុនឈាមនារដូវវស្សានេះ ដោយចែកជូនថ្នាំអាបែត ជំរុញឱ្យពលរដ្ឋលុបបំបាត់ជម្រកសត្វមូសខ្លា គេងដាក់មុង និងបាញ់ថ្នាំសម្លាប់មូលទៅតាមលំនៅដ្ឋានពលរដ្ឋ និងសាលារៀន។

លោកវេជ្ជបណ្ឌិតប្រធានមន្ទីរសុខាភិបាលខេត្ត គូសបញ្ជាក់ដែរថា នៅពាក់កណ្តាលឆ្នាំ២០២៥នេះ ខេត្តកោះកុង មានករណីជំងឺគ្រុនឈាមចំនួន១០៧ករណី តែមិនមានស្លាប់នោះទេ។ ជាក់ស្តែងក្រុមការងារជំនាញ បានដាក់ថ្នាំអាបែតនៅតាមភាជន៍ទឹក បានបាញ់ថ្នាំសំលាប់មូស និងចុះអប់រំសុខភាពពីជំងឺគ្រុនឈាមនៅតាមសហគមន៍។ បើធៀបនឹងរយៈពេលដូចគ្នាឆ្នាំ២០២៤ មាន១០៤ករណី និងឆ្នាំ២០២៥ មាន១០៧ករណី មានការកើនឡើង៣ករណី។

គួររំលឹកថា ឆ្នាំ២០២៤ ខេត្តកោះកុងមានករណីជំងឺគ្រុនឈាមសរុបចំនួន ២៦៦ករណី ក្នុងនោះមានស្លាប់២ករណី។ មន្ទីរសុខាភិបាលខេត្ត អះអាងថា រាល់ករណីមានជំងឺគ្រុនឈាម ក្រុមការងារសុខាភិបាលបានចុះតាមដានពិនិត្យ និងទប់ស្កាត់ភ្លាមៗផងដែរចំពោះយន្តការបាញ់ថ្នាំសម្លាប់មូស និងបញ្ជូនអ្នកជំងឺមកកាន់មន្ទីរពេទ្យរដ្ឋ ដោយមិនអនុញ្ញាត្តឱ្យគ្លិនិចឯកជនណាមួយទទួលពិនិត្យ និងព្យាបាលអ្នកជំងឺគ្រុនឈាមនោះទេ៕

អត្ថបទ៖ សិរីវឌ្ឍនៈ