វិវាទព្រំដែន៖ នាយករដ្ឋមន្ត្រី ថា កម្ពុជាមិនបានទាត់ចោលយន្តការទ្វេភាគីទេ ក្រៅពីតំបន់បួនដែលប្ដឹងទៅ ICJ

នាយករដ្ឋមន្ត្រី សម្ដេច ហ៊ុន ម៉ាណែត នៅព្រឹកថ្ងៃទី១៤ ខែកក្កដានេះ បញ្ជាក់ជាថ្មីថា កម្ពុជាមិនបានទាត់ចោលនូវយន្តការចរចាជាទ្វេភាគីជាមួយប្រទេសថៃឡើយពាក់ព័ន្ធនឹងវិវាទព្រំដែនរវាងប្រទេសទាំងពីរ លើកលែងតែប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី គឺត្រូវតែដោះស្រាយតាមយន្តការតុលាការយុត្តិធម៌អន្តរជាតិ។

នេះជាការឆ្លើយតបរបស់នាយករដ្ឋមន្រ្តីកម្ពុជា ទៅនឹងសំណួររបស់ថ្នាក់ដឹកនាំបរទេសមួយចំនួនដែលសួរថាតើកម្ពុជាបានដើរចេញពីយន្តការជាទ្វេភាគីហើយឬនៅក្នុងការដោះស្រាយវិវាទព្រំដែនជាមួយប្រទេសជិតខាង? សម្ដេច ហ៊ុន ម៉ាណែត គូសបញ្ជាក់ដូច្នេះថា៖ «កម្ពុជាមិនដែលដើរចោលនោះទេនូវកន្លែងដែលយើងដោះស្រាយបានជាក់ស្ដែងជាមួយប្រទេសថៃ ដោះស្រាយ ៨០០គីឡួម៉ែត្រនេះ លើកលែងតែតំបន់៤នេះ ដែលយើងយកទៅ ICJ គឺនៅបន្តប្រើប្រាស់យន្តការទ្វេភាគី JBC និងអនុលោមតាមកិច្ចព្រមព្រៀងដែលបានអនុវត្ត គឺMOU២០០០ ដើម្បីបញ្ចប់ភាពស្រពិចស្រពិល និងហានិភ័យនៃការប៉ះទង្គិចគ្នា»។

ថ្លែងនៅក្នុងពិធីអបអរសាទរខួប៣២ឆ្នាំនៃថ្ងៃកំណើតកងរាជអាវុធហត្ថ នៅថ្ងៃនេះពីខេត្តកំពង់ឆ្នាំង សម្ដេចនាយករដ្ឋមន្រ្តី ហ៊ុន ម៉ាណែត អះអាងថា កម្ពុជានៅតែបើកទ្វារចំហសម្រាប់កិច្ចសហការជាមួយប្រទេសថៃ ក្នុងការវាស់វែងខណ្ឌសីមា និងបោះបង្គោលព្រំដែនរវាងប្រទេសទាំងពីរ ដែលនៅសេសសល់ ផ្អែកតាមកិច្ចព្រមព្រៀង និងអនុស្សរណៈនៃការយោគយល់គ្នា ចុះថ្ងៃទី១៤ ខែមិថុនា ឆ្នាំ២០០០ ស្តីពីការវាស់វែងនិងខណ្ឌសីមាព្រំដែនគោករវាងរាជរដ្ឋាភិបាលកម្ពុជា និងរាជរដ្ឋាភិបាលថៃ ហៅកាត់ថា MOU ឆ្នាំ២០០០ ដែលអនុវត្តដោយគណៈកម្មការចម្រុះព្រំដែនJBC លើកលែងតែចំណុច៤ ខាងលើ គឺយកទៅតុលាការយុត្តិធម៌អន្តរជាតិ ដើម្បីដោះស្រាយ ព្រោះភាគីថៃប្រកាសថា តំបន់ទាំងនោះជារបស់ខ្លួនរួចទៅហើយ។

ការយកបញ្ហាប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅដោះស្រាយតាមរយៈយន្តការតុលាការអន្តជាតិនេះ សម្ដេចនាយករដ្ឋមន្ត្រី ហ៊ុន ម៉ាណែត បញ្ជាក់ថា គឺដោយសារកម្ពុជាយល់ថា«ការព្យាយាមដោះស្រាយតាមយន្តការទ្វេភាគី គឺមិនអាចទៅមុខរួច ផ្ទុយទៅវិញវានឹងនៅជាប់គាំងក្នុងរយៈពេលវែងហើយប្រឈមជាមួយនឹងហានិភ័យនៃការប៉ះទង្គិចដោយប្រដាប់អាវុធ មិនចេះចប់មិនចេះហើយ»។

សម្ដេចធិបតី សង្កត់ធ្ងន់អំពីគោលជំហររបស់រាជរដ្ឋាភិបាលកម្ពុជាក្នុងការដោះស្រាយវិវាទព្រំដែន ក៏ដូចជាការខិតខំជំរុញការវាស់វែង ខណ្ឌសីមា និងបោះបង្គោលព្រំដែនជាមួយប្រទេសជិតខាង រួមទាំងប្រទេសថៃផងដែរ ដោយធ្វើយ៉ាងណាគឺប្រែក្លាយព្រំដែន ជាព្រំដែនសន្តិភាព មិត្តភាព កិច្ចសហប្រតិបត្តិការល្អ និងការអភិវឌ្ឍ៕

ដោយ៖ ធឿន វ៉ាន់សុង