ព័ត៌មានជាតិ

រដ្ឋបាលខណ្ឌដូនពេញ ផ្លាស់ប្ដូរលូចាស់ដាក់លូថ្មី រំដោះទឹកធ្លាប់ជន់លិចកន្លងមក

បានផុស

៣ ម៉ោង មុន

នៅ

ថ្ងៃអង្គារ ១៥ កក្កដា ២០២៥

ដោយ

រដ្ឋបាលខណ្ឌដូនពេញ បន្តអភិវឌ្ឍន៍ ផ្លាស់ប្ដូរលូធំជាងមុន ដើម្បីរំដោះប្រព័ន្ធលំហូរទឹក បង្កើនល្បឿនលឿនជាងមុន និងការពារការជន់លិចនារដូវវស្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងការអភិវឌ្ឍប្រព័ន្ធលូនេះមានប្រវែង ៨០០ ម៉ែត្រ គិតចាប់ពីចំណុចផ្លូវលេខ ៥១ កែង ១៧៨ រហូតដល់ផ្លូវលេខ ១១៤ ក្នុងសង្កាត់ផ្សារថ្មីទី ០៣ ខណ្ឌដូនពេញ រាជធានីភ្នំពេញ។

លោក ហាក់ ជាប្រជាពលរដ្ឋ បានលើកឡើងថា កាលពីមុនចំណុចបណ្ដោយផ្លូវនេះ ធ្លាប់ជន់លិចដែរ ប៉ុន្តែដោយសារតែអាជ្ញាធរចុះស្តារ និងរៀបចំប្រព័ន្ធលូបានញឹកញាប់ ទើបមិនសូវជាទឹកលិចយូរម៉ោងនោះឡើយ។

លោកបន្តថា ក្នុងនាមប្រជាពលរដ្ឋ សូមអរគុណ និងសាទរចំពោះអាជ្ញាធរជាខ្លាំង បន្ទាប់ពីធ្វើការអភិវឌ្ឍន៍ប្រព័ន្ធលូឲ្យធំជាងមុន ដើម្បីរំដោះទឹកលិច នារដូវវស្សានេះ និងដូចជាបានដោះស្រាយបញ្ហារាល់ផលលំបាកដែលពួកគាត់តែងតែជួបការលិចទឹក ពិបាករស់នៅ ក៏ដូចជាប្រកបអាជីវកម្មចិញ្ចឹមជីវិត។

ចំពោះបញ្ហានេះ លោក សឿង កុសល ចៅសង្កាត់ផ្សារថ្មីទី ០៣ បានឲ្យកម្ពុជាថ្មីដឹងថា បញ្ហានេះ ជះផលប៉ះពាល់ខ្លាំងដល់ប្រជាពលរដ្ឋរស់នៅអមសងខាង ដោយសារតែកន្លងមក តាមបណ្តោយផ្លូវលេខ ៥១ នេះ មិនមានប្រព័ន្ធលូសម្រាប់រំដោះទឹកនោះឡើយ។

លោកបន្តថា បើមានភ្លៀងខ្លាំងមកម្តងៗ រង់ចាំរហូតដល់ ១ ម៉ោង ទៅ ២ ម៉ោង ទើបស្រកអស់។ បើមានទឹកជន់លិច ដឹងតែចូលពេញផ្ទះប្រជាពលរដ្ឋតែម្ដង។ ដូច្នេះហើយ ទើបអាជ្ញាធរខណ្ឌដូនពេញ បានធ្វើការដាក់ប្រព័ន្ធលូថ្មី ប្រវែង ៨០០ ម៉ែត្រ ដែលមានទំហំមុខកាត់ ១ ម៉ែត្រ សម្រាប់រំដោះទឹក ពេលជន់លិច ដើម្បីសម្រួលកុំឲ្យផលលំបាកទាំងអស់នេះជះផលប៉ះពាល់ពលរដ្ឋក្នុងមូលដ្ឋានបន្តទៀត។

លោកចៅសង្កាត់ផ្សារថ្មីទី ០៣ បានសំណូមពរ ក៏ដូចជាស្នើសុំពលរដ្ឋទាំងអស់ ត្រូវចូលរួមថែរក្សាអនាម័យសណ្ដាប់ធ្នាប់សាធារណៈកុំបីខាន ត្រូវចេះវេចខ្ចប់សំរាមឲ្យបានល្អ និងបញ្ចេញសំរាមតាមម៉ោងកំណត់ ដើម្បីកុំឲ្យសំរាមហូរចូលលូ ដែលងាយស្ទះប្រព័ន្ធលំហូរទឹក៕

អត្ថបទ ៖ ម៉េង