រុស្ស៊ី ព្រមានលោកខាងលិចថា ខ្លួននឹងបើកការវាយប្រហារមុន បើចាំបាច់

ស្របពេលស្ថានការណ៍កំពុងតានតឹងនិងការដាក់សម្ពាធខ្លាំងឡើងៗលើរុស្ស៊ី អនុប្រធានក្រុមប្រឹក្សាសន្តិសុខរុស្ស៊ី Dmitry Medvedev បានព្រមានទៅបណ្តាប្រទេសលោកខាងលិចថា ទីក្រុងមូស្គូនឹងបើកការវាយប្រហារមុន (preemptive strike) ដ៏ភ្ញាក់ផ្អើលបើចាំបាច់ ប៉ុន្តែយ៉ាងណា ខ្លួនគ្មានផែនការវាយប្រហារសមាជិកអង្គការណាតូ ឬអឺរ៉ុបនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយសំដៅទៅព្រឹត្តិការណ៍នៅទីក្រុង Potsdam នៃប្រទេសអាល្លឺម៉ង់ ចាប់ពីថ្ងៃទី១៧ខែកក្កដា ដល់ថ្ងៃទី២ខែសីហា ឆ្នាំ១៩៤៥ រវាងមេដឹកនាំសម្ព័ន្ធមិត្តរួមមានសហភាពសូវៀត សហរដ្ឋអាមេរិក និងចក្រភពអង់គ្លេស ដើម្បីពិភាក្សាអំពីសណ្តាប់ធ្នាប់ពិភពលោកក្រោយសង្គ្រាមលោកលើកទី២, អតីតប្រធានាធិបតីរុស្ស៊ីរូបនេះបានថ្លែងប្រាប់សារព័ត៌មាន TASS កាលពីថ្ងៃព្រហស្បតិ៍ទី១៧ខែកក្កដាឆ្នាំ២០២៥ ថា «សន្និសីទ Potsdam បានបង្រៀនយើងថា យើងមិនគួរមានការបំភាន់ចំពោះទំនាក់ទំនងជាមួយប្រទេសលោកខាងលិចទេ។ លោកសេរីបរាជ័យក្នុងការរក្សាពាក្យសន្យារបស់ខ្លួន ដែលនាំឲ្យសន្និសីទ Potsdam មិនបានបើកផ្លូវឆ្ពោះទៅរកសន្តិភាពយូរអង្វែង ប៉ុន្តែបែរត្រួសត្រាយផ្លូវសម្រាប់សង្គ្រាមត្រជាក់ទៅវិញ»។

ស្របពេលជាមួយគ្នានោះ លោកបានរិះគន់ប្រទេសលោកខាងលិចថា «មិនគួរឲ្យទុកចិត្តទេ ហើយនៅតែប្រកាន់ខ្ជាប់នូវមនោគមវិជ្ជាបង្រ្គប់នៃឧត្តមភាព។ ហេតុដូច្នេះហើយ យើងត្រូវតែធ្វើសកម្មភាពឲ្យបានសមស្រប ត្រៀមខ្លួនឆ្លើយតបគ្រប់ជ្រុងជ្រោយ សូម្បីតែធ្វើការវាយប្រហារជាមុន ប្រសិនបើចាំបាច់»។

ពាក់ព័ន្ធរឿងនេះដែរ កាលពីខែ​មុន មហាអំណាចអឺរ៉ុប២ប្រទេសគឺអង់គ្លេសនិងអាល្លឺម៉ង់ សុទ្ធតែចេញការព្រមានអំពីសង្គ្រាមរបស់រុស្ស៊ីក្នុងប្លុកនេះ នារយៈពេលប៉ុន្មានឆ្នាំខាងមុខ ដោយអំពាវនាវឲ្យមានការត្រៀមខ្លួនឲ្យបានល្អ។

ក្នុងសុន្ទរកថាដ៏សំខាន់មួយ នាយករដ្ឋមន្ត្រីអង់គ្លេស Keir Starmer និយាយថា ទីក្រុងឡុងដ៍ត្រូវតែត្រៀមលក្ខណៈសម្រាប់សង្គ្រាមព្រោះតែការគំរាមកំហែងឥតឈប់ពីសំណាក់ប្រទេសរុស្ស៊ី។ លោក Starmer ក៏ស្តីបន្ទោសទីក្រុងមូស្គូផងដែរ ចំពោះអ្វីដែលលោកហៅថា ជាការបង្កហេតុឥតឈប់ ហើយចោទរុស្ស៊ីថា គំរាមកំហែងចក្រភពអង់គ្លេសនិងឈ្លានពានក្នុងដែនទឹករបស់អង់គ្លេសថែមទៀតផង។

ស្របពេលជាមួយគ្នានោះ នៅប្រទេសអាល្លឺម៉ង់ឯណោះ មេទ័ព Carsten Breuer ព្រមានថា រុស្ស៊ី អាចវាយប្រហារអង្គការណាតូ ក្នុងរយៈពេលត្រឹម៤ឆ្នាំទៀតប៉ុណ្ណោះ ព្រោះថា រុស្ស៊ីកំពុងខិតខំផលិតរថក្រោះខ្លាំងណាស់ ដោយមួយឆ្នាំៗផលិតបានរាប់ពាន់គ្រឿង ហើយអាចប្រើក្នុងការវាយប្រហារលើរដ្ឋណាតូនៅតំបន់បាល់ទិក ត្រឹមឆ្នាំ២០២៩ឬអាចមុននេះក៏ថាបាន។ ដូច្នេះសមាជិកនៃសម្ព័ន្ធភាពដឹកនាំដោយអាមេរិកនេះទាំងអស់ ត្រូវតែត្រៀមខ្លួនឲ្យមែនទែន សម្រាប់ការវាយប្រហារគ្រប់ទម្រង់។

លោកបន្ថែមថា រុស្ស៊ីក៏ផលិតបានគ្រាប់កាំភ្លើងធំ១៥២មិល្លីម៉ែត្រចំនួន៤លានគ្រាប់ក្នុងឆ្នាំ២០២៤ផងដែរ ហើយមិនមែនគ្រាប់ទាំងអស់ ត្រូវយកទៅប្រើនៅប្រទេសអ៊ុយក្រែននោះទេ៕

អត្ថបទ៖ សុខ សុវណ្ណ

ចុចអាន៖ Trump ផ្តាំទៅ Medvedev ឲ្យចេះប្រយ័ត្នសម្តី ពេលនិយាយពីអាវុធនុយក្លេអ៊ែរ