បុរសជនជាតិដើមភាគតិចម្នាក់ ត្រូវក្របីវាត់ធ្លាយពោះរងរបួសធ្ងន់បញ្ជូនទៅសង្គ្រោះដល់ប្រទេសវៀតណាម

បុរសជនជាតិដើមភាគតិចម្នាក់ រស់នៅខេត្តរតនគិរី ត្រូវបានសត្វក្របីវាត់ធ្លាយពោះរងរបួសធ្ងន់ និងត្រូវបានក្រុមគ្រួសារបញ្ជូនទៅសង្គ្រោះបន្ទាន់ដល់ប្រទេសវៀតណាម។

តាមការឲ្យដឹងពីលោក ហ៊ាន ប៊ុនទន់ នាយប៉ុស្តិ៍នគរបាលរដ្ឋបាល កោះប៉ង បានឲ្យដឹងថា ករណីនេះកើតឡើងនៅវេលាម៉ោង០៣និង០០រសៀល ថ្ងៃទី១៦ ខែកក្កដា ឆ្នាំ២០២៥។ នាយប៉ុស្តិ៍ កោះប៉ង បន្ថែមថា ជនរងគ្រោះមានឈ្មោះ រស់ កាឡង់ ភេទប្រុស អាយុ២៤ឆ្នាំ មានទីលំនៅភូមិប៉ាហយ ឃុំកោះប៉ង់ ខេត្តរតនគិរី ត្រូវបានក្របីវាត់នឹងស្នែងបណ្ដាលឲ្យត្រូវចំពោះធ្លាយពោះវៀនរងរបួសធ្ងន់ ហើយត្រូវបានបញ្ជូនទៅសង្គ្រោះភ្លាមៗនៅមន្ទីរពេលបង្អែកកាចូន និងបញ្ជូនបន្តទៅមន្ទីរពេទ្យបង្អែកខេត្តរតនគិរី តែដោយស្ថានភាពធ្ងន់ធ្ងរពេកទើបក្រុមគ្រួសារបញ្ជូនបន្តទៅប្រទេសវៀតណាម។

បើតាមការបញ្ជាក់ពីលោកនាយប៉ុស្ដិ៍ មូលហេតុដែលនាំឲ្យក្របីវាត់រហូតរងរបួសនេះ មុនកើតហេតុជនរងគ្រោះ និងមិត្តភក្ដិផ្សេងទៀតកំពុងអង្គុយផឹកស្រានៅក្រោមផ្ទះ ហើយម្ចាស់ក្របីបានហៅឲ្យជួចាប់ដោយសារក្របីផ្អើលចាប់មិនបាន។ លុះពេលនាំគ្នាចូលទៅចាប់ សត្វក្របីក៏បានវាត់ចំជនរងគ្រោះរងរបួសធ្ងន់តែម្ដង៕

អត្ថបទ៖ ខៀវ ចាប