ព័ត៌មានជាតិ

នាវាចម្បាំងបារាំងនឹងចូលចតកំពង់ផែសមុទ្ររាមនៅឆ្នាំក្រោយ

បានផុស

១០ ខែ មុន

នៅ

ថ្ងៃសុក្រ ១៨ កក្កដា ២០២៥

ដោយ

ឯកអគ្គរដ្ឋទូតបារាំងបានជម្រាបប្រាប់ប្រធានសភាកម្ពុជាថា នៅឆ្នាំ២០២៦ខាងមុខនាវាចម្បាំងរបស់កងទ័ពជើងទឹកបារាំងនឹងចូលចតនៅមូលដ្ឋានសមុទ្ររាមជាផ្នែកមួយនៃកិច្ចសហការ និងពង្រឹងទំនាក់ទំនងកងទ័ពប្រទេសទាំងពីរ។

នាយកខុទ្ទកាល័យ និងជាអ្នកនាំពាក្យសម្ដេចប្រធានសភា លោក កែវ ពិសិដ្ឋ បានឱ្យដឹងថាការចូលមកនៃនាវាចម្បាំងបារាំងនេះជាផ្នែកមួយនៃកិច្ចសហប្រតិបត្តិការរវាងប្រទេសទាំងពីរ ខណៈកម្ពុជាបានបញ្ជាក់ពីការស្វាគមន៍រាល់នាវានៃប្រទេសជាមិត្តរបស់កម្ពុជាទាំងអស់មកកាន់កំពង់ផែសមុទ្ររាមនេះ។

លោកថា៖ «ទាក់ទងនឹងនាវាយើងរំពឹងថា(មក)នៅឆ្នាំក្រោយតែខែពិតប្រាកដយើងមិនទាន់បានបញ្ជាក់ច្បាស់នៅឡើយទេ! គ្រាន់តែយើងបានត្រៀមខ្លួននូវការទទួលពេលដែលនាវាមកដល់»។

កាលពីថ្ងៃទី១៧ ខែកក្កដា ឯកអគ្គរដ្ឋទូតបារាំងលោក ហ្សាក់ ប៉ឺឡេ (Jacques PELLET) បានជួបជាមួយប្រធានរដ្ឋសភាកម្ពុជា សម្ដេចសភាធិបតី ឃួន សុដារី ដោយបានពិភាក្សាជាច្រើនពាក់ព័ន្ធនឹងកិច្ចសហប្រតិបត្តិការនៃប្រទេសទាំងពីរ និងដំណឹងពីការធ្វើដំណើររបស់រដ្ឋមន្ត្រីពាណិជ្ជកម្មបារាំងនៅខែតុលា និងទស្សនកិច្ចរបស់ប្រធានាធិបតីបារាំងនៅឆ្នាំ២០២៦ខាងមុខផងដែរ។

ការចូលចតចុងក្រោយបង្អស់នៃវានាចម្បាំងបារាំងធ្វើឡើងកាលពី២ឆ្នាំមុន នៅថ្ងៃទី២៤ ខែមីនា ឆ្នាំ២០២៣ ដែលជាការចូលចតរបស់នាវា Prairial របស់កងទ័ពបារាំងនៅប៉ូលីនេស៊ី ដែលដឹកនាំដោយឧត្តមនាវី Geoffroy Andigné៕

(រូបភាពការចូលមកដល់នៃនាវាចម្បាំងបារាំងកាលពីឆ្នាំ២០២៣កន្លងទៅ)