កម្ពុជា-ហ្វីលីពីន បន្តពង្រឹងកិច្ចសហប្រតិបត្តិការលើវិស័យការពារជាតិ

កម្ពុជា និងហ្វីលីពីន បន្តពង្រឹងកិច្ចសហប្រតិបត្តិការលើវិស័យការពារជាតិ ដោយផ្ដោតជាពិសេសលើការបណ្តុះបណ្តាលធនធានមនុស្ស។ នេះជាការអះអាងដោយសម្ដេចនាយករដ្ឋមន្ត្រី ហ៊ុន ម៉ាណែត និងលោកមេបញ្ជាការកងទ័ពជើងគោកហ្វីលីពីន ក្នុងជំនួបនារសៀលថ្ងៃទី១៨ ខែកក្កដា ឆ្នាំ២០២៥។

ឧត្តមសេនីយ៍ឯក Roy M. Galido បានសម្ដែងនូវការពេញចិត្តចំពោះការរីកចម្រើននៃទំនាក់ទំនងទ្វេភាគីហ្វីលីពីន និងកម្ពុជា ជាពិសេសកិច្ចសហប្រតិបត្តិការដ៏ល្អប្រសើររវាងកងទ័ពជើងគោកនៃប្រទេសទាំងពីរ ដែលត្រូវបានកសាងឡើងលើមូលដ្ឋាននៃមិត្តភាព និងការជឿទុកចិត្តគ្នាទៅវិញទៅមក។ លោកឧត្តមសេនីយ៍ឯក គូសបញ្ជាក់ថា ហ្វីលីពីននឹងបន្តផ្ដល់អាទិភាពខ្ពស់ចំពោះកិច្ចសហប្រតិបត្តិការលើការបណ្ដុះបណ្ដាលធនធានមនុស្ស និងការបន្តចែករំលែកបទពិសោធន៍ និងការបណ្ដុះបណ្ដាលជំនាញដល់កងទ័ពជើងគោកកម្ពុជា ព្រមទាំងបន្តរៀនសូត្រពីបទពិសោធន៍កម្ពុជាវិញ។

សម្ដេចធិបតី ហ៊ុន ម៉ាណែត នាយករដ្ឋមន្ត្រី បានវាយតម្លៃខ្ពស់ចំពោះភាពរីកចម្រើនប្រកបដោយផ្លែផ្កានៃទំនាក់ទំនង និងកិច្ចសហប្រតិបត្តិការរវាងកងទ័ពជើងគោកនៃប្រទេសទាំងពីរ។ ជាក់ស្ដែង ការបិទបញ្ចប់វគ្គហ្វឹកហ្វឺនថ្មីៗនេះគឺជាសក្ខីភាពមួយនៃទំនាក់ទំនង និងកិច្ចសហប្រតិបត្តិការដ៏ល្អប្រសើរនៃកងទ័ពជើងគោកប្រទេសទាំងពីរ។

តាមកិច្ចសហប្រតិបត្តិការដ៏ល្អ សម្តេចធិបតី សង្ឃឹមថា កងទ័ពប្រទេសទាំងពីរអាចពិនិត្យលទ្ធភាពដើម្បីពង្រីកកិច្ចសហប្រតិបត្តិការរវាងកងទ័ពជើងទឹក និងកងទ័ពអាកាសនៃប្រទេសទាំងពីរ។

សម្ដេចធិបតី បានសង្កត់ធ្ងន់ពីសារៈសំខាន់នៃការបណ្ដុះបណ្ដាលធនធានមនុស្ស ជាពិសេសការលើកកម្ពស់សមត្ថភាពកងទ័ព ដើម្បីរួមគ្នាប្រយុទ្ធប្រឆាំងឧក្រិដ្ឋកម្មឆ្លងដែន និងឧក្រិដ្ឋកម្មអ៊ីនធឺណិត ដែលកំពុងបន្តគំរាមកំហែងដល់សេដ្ឋកិច្ច និងសន្តិសុខក្នុងតំបន់ និងសកលលោក។ សម្ដេចលើកទឹកចិត្តឱ្យកងទ័ពជើងគោកនៃប្រទេសទាំងពីរបន្តសហការគ្នាឱ្យកាន់តែជិតស្និទ្ធថែមទៀត ដេីម្បីពង្រឹងពង្រីកកិច្ចសហប្រតិបត្តិការឱ្យកាន់តែរឹងមាំបន្ថែមទៀត។

ក្នុងជំនួបនោះ សម្ដេចធិបតី ក៏បញ្ជាក់ពីការទន្ទឹមរង់ចាំស្វាគមន៍ដំណើរទស្សនកិច្ចផ្លូវរដ្ឋរបស់ប្រធានាធិបតីហ្វីលីពីន លោក Ferdinand R. Marcos Jr. មកកាន់កម្ពុជា នាពេលខាងមុខផងដែរ៕