នាយករដ្ឋមន្ត្រីឱ្យពលរដ្ឋជឿជាក់លើរដ្ឋាភិបាល និងកងកម្លាំងដែលកំពុងតតាំងជាមួយទ័ពថៃឈ្លានពាន

នាយករដ្ឋមន្ត្រី សម្ដេចធិបតី នាយឧត្តមសេនីយ៍ ហ៊ុន ម៉ាណែត បានអំពាវនាវដល់ប្រជពលរដ្ឋត្រូវមានភាពជឿជាក់លើរាជរដ្ឋាភិបាល និងកងកម្លាំងកម្ពុជា ដែលកំពុងឈរជើងដ៏អង់អាចក្លាហាន ដើម្បីការពារដែនអធិបតេយ្យ និងបូរណភាពទឹកដី ពីការឈ្លានពានដោយកងទ័ពថៃ។

សម្ដេចធិបតី ហ៊ុន ម៉ាណែត អះអាងថា រាជរដ្ឋាភិបាលកម្ពុជា ក្រសួងស្ថាប័ន រដ្ឋបាលខេត្តពាក់ព័ន្ធ ជាពិសេសកងកម្លាំងប្រដាប់អាវុធរបស់កម្ពុជា បាននិងកំពុងធ្វើកិច្ចការយ៉ាងសកម្ម និងប្រកបដោយភាពក្លាហានមោះមុត ក្នុងកិច្ចការពារដែនអធិបតេយ្យជាតិ និងបូរណភាពទឹកដី ក៏ដូចជាឧត្តមប្រយោជន៍ជាតិ ទាំងលើសមរភូមិយោធា និងសមរភូមិការទូត ក៏ដូចជាជួយដល់ប្រជាពលរដ្ឋ ដែលរងផលប៉ះពាល់ដោយសារការឈ្លានពានរបស់កងទ័ពថៃនៅពេលនេះ។

សារសម្ដេចធិបតី តាមរយៈបណ្ដាញទំនាក់ទំនងសង្គម នាថ្ងៃនេះ «សូមឱ្យបងប្អូនប្រជាពលរដ្ឋខ្មែរយើងទាំងអស់ជឿជាក់លើរាជរដ្ឋាភិបាលនិងកងកម្លាំងប្រដាប់អាវុធរបស់យើងដែលកំពុងឈរជើងការពារបូរណភាពទឹកដីនៅជួរមុខ»។ សម្ដេចនាយករដ្ឋមន្ត្រី ក៏ទទូចឱ្យពលរដ្ឋរក្សាភាពស្ងាត់ស្ងៀម និងមានលំនឹងក្នុងចិត្ត ហើយបន្តការងារប្រចាំថ្ងៃជាប្រក្រតី។

តាមការអះអាងរបស់សម្ដេចនាយករដ្ឋមន្ត្រី ហ៊ុន ម៉ាណែត ការវាយប្រហារដោយកងទ័ពថៃមកលើទីតាំងឈរជើងរបស់កងទ័ពកម្ពុជា បានកើតឡើងនៅប្រាសាទតាមាន់ធំ ប្រាសាទតាក្របី ក្នុងខេត្តឧត្តរមានជ័យ និងបានពង្រីកភូមិសាស្ត្រនៃការវាយប្រហារទៅដល់តំបន់មុំបី។

«កម្ពុជាតែងតែប្រកាន់ជំហរចង់ដោះស្រាយបញ្ហាដោយសន្តិវិធី ប៉ុន្តែក្នុងករណីនេះយើងគ្មានជម្រើសអ្វីក្រៅពីការឆ្លើយតបដោយកម្លាំងប្រដាប់អាវុធប្រឆាំងនឹងការឈ្លានពានដោយប្រដាប់អាវុធនោះទេ»។ សម្ដេចធិបតី បញ្ជាក់យ៉ាងដូច្នេះ៕

ដោយ៖ ធឿន វ៉ាន់សុង