កម្ពុជា-ថៃ បានបើកកិច្ចប្រជុំគណៈកម្មាធិការព្រំដែនថ្នាក់យោធភូមិភាគ​ នាថ្ងៃនេះ ក្នុងខេត្តត្រាត

កិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) បានចាប់ផ្តើមហើយនៅថ្ងៃសុក្រ ទី១៥ ខែសីហា ឆ្នាំ២០២៥នេះ ដែលរៀបចំធ្វើឡើងនៅខេត្តត្រាត ប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងឱ្យដឹងដោយអ្នកនាំពាក្យក្រសួងការពារជាតិកម្ពុជា លោកស្រី ម៉ាលី សុជាតា កិច្ចប្រជុំនៅថ្ងៃនេះជាកិច្ចប្រជុំវិសាមញ្ញរបស់ក្រុមលេខានៃគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) លើកទី២៧ រវាងយោធភូមិភាគទី៣ របស់កម្ពុជា និងបញ្ជាការដ្ឋានការពារព្រំដែនចាន់បុរី-ត្រាត របស់ថៃ។

ការចាប់ផ្តើមកិច្ចប្រជុំថ្នាក់យោធភូមិភាគនេះ គឺបានកើតចេញពីលទ្ធផលនៃកិច្ចប្រជុំពិសេសកម្ពុជា និងថៃ ដែលបានធ្វើឡើងកាលពីថ្ងៃទី២៨ ខែកក្កដា ឆ្នាំ២០២៥ និងស្របតាមស្មារតីឯកភាពគ្នាដោយភាគីទាំងពីរ ក្នុងកិច្ចប្រជុំវិសាមញ្ញនៃគណៈកម្មាធិការព្រំដែនទូទៅ ​(GBC) កាលពីថ្ងៃទី៧ ខែសីហា ឆ្នាំ២០២៥កន្លងទៅ នៅប្រទេសម៉ាឡេស៊ី។

ជាការគូសបញ្ជាក់ យោងស្មារតីនៃកិច្ចប្រជុំ GBC ដែលមានការចូលរួមសង្កេតការណ៍ដោយប្រទេសម៉ាឡេស៊ី តំណាងសហរដ្ឋអាមេរិក និងប្រទេសចិន គឺភាគីកម្ពុជា និងថៃ បានឯកភាពគ្នាលើលក្ខខណ្ឌជាច្រើននៃបទឈប់បាញ់ និងការរៀបចំយន្តការតាមដានសម្រាប់ការអនុវត្តលើបទឈប់បាញ់នេះ ពិសេសការបង្កើនការប្រាស្រ័យទាក់ទងគ្នារវាងកងទ័ពប្រទេសទាំងពីរ។

ក្នុងនោះ ភាគីទាំងពីរ បានឯកភាពរៀបចំកិច្ចប្រជុំរួមនៃគណៈកម្មាធិការព្រំដែនថ្នាក់យោធភូមិភាគ (RBC) ក្នុងរង្វង់ពីរសប្តាហ៍បន្ទាប់ពីកិច្ចប្រជុំវិសាមញ្ញគណៈកម្មាធិការព្រំដែនទូទៅ ថ្ងៃទី៧ ខែសីហា ឆ្នាំ២០២៥  ដែលទីតាំងកិច្ចប្រជុំនឹងត្រូវកំណត់ស្របទៅតាមការធ្វើជាម្ចាស់ផ្ទះប្តូរវេនជាទៀងទាត់៕

ដោយ៖ ធឿន វ៉ាន់សុង