ខេត្តរតនគិរី! មន្ទីររៀបចំដែនដី ក្រើនរំលឹកពលរដ្ឋនៅស្រុកបរកែវ ផ្តល់ឯកសារវាស់វែងដីធ្លីជូនក្រុមងារត្រឹមថ្ងៃទី ២២ សីហា

ការិយាល័យរៀបចំដែនដី នគរូបនីយកម្ម សំណង់ និងភូមិបាលស្រុកបរកែវ នៃខេត្តរតនគិរី ក្រើនរំលឹកពលរដ្ឋរស់នៅក្នុងភូមិនៃឃុំកក់ ឃុំកិះចុង និងឃុំលុងឃុង ដែលបានចូលរួមវាស់វែង តែមិនទាន់ផ្តល់ឯកសារមកជូនក្រុមការងារវិនិច្ឆ័យ សូមយកឯកសារមកជូនក្រុមការងារចាប់ពីថ្ងៃជូនដំណឹង ដល់ថ្ងៃទី២២ ខែសីហា ឆ្នាំ២០២៥ នៅនៅរៀងរាល់ម៉ោងធ្វើការ។

សេចក្តីជូនដំណឹងរបស់មន្ទីររៀបចំដែនដី សង្កត់ធ្ងន់ថា ផុតកំណត់រយៈពេលខាងលើ ក្រុមការងារចាត់ទុកថាក្បាលដីរបស់លោកអ្នក គ្មានទិន្នន័យ និងមិនអាចចេញប័ណ្ណជូនបានទេ។ ការក្រើនរំលឹកនេះ ស្របដែលខេត្តរតនគិរី កំពុងពន្លឿនការចុះបញ្ជីដីធ្លីជាលក្ខណៈប្រព័ន្ធជូនដល់ប្រជាពលរដ្ឋ​នៅតាមភូមិឋាន និងត្រៀមចេញបណ្ណកម្មសិទ្ធិសម្គាល់ក្បាលដី។

លោក ទឹម មុន្នីរ័ត្ន អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តរតនគិរី បានឱ្យដឹងថា ការវាស់វែងដីធ្លីនេះ បានបែងចែកជាច្រើនដំណាក់កាល រួមមានការជូនដំណឹង ការពិនិត្យផ្ទៀងផ្ទាត់ និងការប្រកាសជាសាធារណៈ។  បន្ទាប់ពីវាស់វែងរួចរាល់ ក្រុមការងារនឹងតម្កល់ឯកសារ និងបិទផ្សាយជាសាធារណៈនៅសាលាឃុំ-សង្កាត់ ឬនៅកន្លែងដែលងាយស្រួលមើល ដើម្បីឱ្យប្រជាពលរដ្ឋអាចពិនិត្យផ្ទៀងផ្ទាត់ទិន្នន័យរបស់ខ្លួនឡើងវិញមុននឹងឈានដល់ការចុះបញ្ជី។ លោកបញ្ជាក់ថា៖« ការចុះបញ្ជី និងការសម្រេច ក្រុមការងារនឹងពិនិត្យ និងសម្រេចលើពាក្យស្នើសុំចុះបញ្ជី។ ប្រសិនបើពុំមានបញ្ហា ឬវិវាទទេ ក្រុមការងារនឹងរៀបចំឯកសារចុះបញ្ជីជាស្ថាពរ»។

លោក សោម កុសល អនុប្រធានការិយាល័យវាស់វែងដីស្រុកបរកែវ បានប្រាប់ថា លោកបានដឹកនាំយុវជនស្ម័គ្រចិត្រវាស់វែងដីធ្លី​ចាប់ពី ឃុំកិះចុង នៅខែ មករា ទៅដល់ខែ កុម្ភៈ បន្ទាប់ពីវាស់វែងរួច បន្តទៅ ឃុំលុងឃុង ខែ ឧសភា ហើយបន្តទៅឃុំកក់នៅ អំឡុងខែ វិច្ឆិកា ដល់ ខែ ធ្នូ ក្នុងការវាស់វែងដី  ។ លោកបន្តទៀតថា ការវាស់វែងដីធ្លីនេះ នៅតាមឃុំនីមួយៗ បន្ទាប់ពីវាស់វែងរួច នៅរយៈពេល ១ ទៅ ២ សប្ដាហ៍ ពលរដ្ឋដែលជាម្ចាស់ក្បាលដីវាស់វែងដីរួច ត្រូវយកបង្កាន់ដៃក្បាលដី ឯកសារពាក់ព័ន្ធ ជូនមន្រ្តីវិនិច្ឆ័យ និងការផ្តិតមេដៃ។ លោកបញ្ជាក់ថា នៅពេលការចុះបញ្ជីត្រូវបានអនុម័តរួចរាល់ អាជ្ញាធរនឹងចេញប័ណ្ណកម្មសិទ្ធិ (ប័ណ្ណសម្គាល់ម្ចាស់អចលនវត្ថុ) ដើម្បីបញ្ជាក់ពីសិទ្ធិកាន់កាប់ស្របច្បាប់ជូនម្ចាស់ដី។

បើតាមលោក សោម កុសល ប្រសិនបើប្រជាពលរដ្ឋ ពុំមានឯកសារគ្រប់គ្រាន់ប្រគល់ជូនទៅមន្ត្រីវិនិច្ឆ័យទេ បើទោះបីជាបានវាស់វែងក្បាលដីរួចហើយ និងមានបង្កាន់ដៃហើយក៏ដោយ ក៏មិនទាន់មានលក្ខណៈគ្រប់គ្រាន់ដើម្បីទទួលបានប្លឹងរឹងដែរ៕

អត្ថបទ៖ ខៀវ ចាប