បណ្ឌិត ឈត ប៊ុនថង៖ ជម្លោះព្រំដែនកម្ពុជា-ថៃពេលនេះ គឺធំជាងរាល់ដង គួររកដំណោះស្រាយបញ្ចប់កុំឱ្យរាលដាលបន្ថែម

អ្នកតាមដានកិច្ចការសង្គម នៃរាជបណ្ឌិត្យសភាកម្ពុជា លោកបណ្ឌិត ឈត ប៊ុនថង បានសរសេរលើហ្វេសប៊ុក នៅព្រឹកថ្ងៃទី១៨ ខែសីហា ឆ្នាំ២០២៥ថា ជម្លោះប្រដាប់អាវុធដែលថៃឈ្លានពានកម្ពុជា ក្នុងឆ្នាំ២០២៥នេះ គឺមានទំហំធំជាងមុន អាវុធសាហាវៗជាងមុន និងមានមនុស្សស្លាប់ច្រើនជាងមុន បើធៀបនឹងជម្លោះព្រំដែនឆ្នាំ២០០៨ និងឆ្នាំ២០១១ កន្លងមក ដោយមិនគិតពីជម្លោះយូរលង់ពីអតីតកាលឡើយ។

ចំពោះការឈ្លានពានពីភាគីថៃ លើកម្ពុជាឆ្នាំ២០២៥នេះ ក្រៅពីមានទំហំធំជាងមុន លោកបណ្ឌិត ឈត ប៊ុនថង ក៏បានលើកឡើងដែរថា បញ្ហានេះ ក៏មានការចាប់អារម្មណ៍ និងចូលរួមច្រើនជាងមុន ពីអន្តរជាតិ ដូចជាប្រទេសមហាអំណាច ប្រធានអាស៊ាន ប្រទេសក្នុង និងក្រៅតំបន់ ស្ថាប័នអន្តរជាតិ សហគមន៍អន្តរជាតិ និងតួអង្គពាក់ព័ន្ធផ្សេងទៀត។ ដើម្បីកុំឱ្យបញ្ហាបន្តរីករាលដាលកាន់តែធំ លោកបណ្ឌិត ថា គួរតែយកឱកាសនេះ ដោះស្រាយបញ្ហាព្រំដែនកម្ពុជា-ថៃ ឱ្យចប់ដាច់ស្រេចតែម្តងទៅ។

បណ្ឌិត ឈត ប៊ុនថង ថា៖ “ខ្ញុំគិតថាម្តងនេះគួរឆក់ឱកាសនេះ ដើម្បីឈានទៅរកដំណោះស្រាយបញ្ហាព្រំដែនកម្ពុជា និងថៃ ប្រវែងជាង៨០០គីឡូម៉ែត្រឱ្យដាច់ស្រេចតែម្តងទៅ។ បើមិនដូច្នោះទេ ជម្លោះនេះនៅតែបន្តរ៉ាំរ៉ៃ ហើយអាចនឹងផ្ទុះសង្គ្រាមលើកក្រោយដែលកាន់តែធំជាងនេះ និងកាន់តែមានភាពសាហាវជាងនេះ និងអាចបង្កមហន្តរាយកាន់តែធំជាងនេះទ្វេដង”។

សូមជម្រាបថា ថៃ បានប្រើប្រាស់អាវុធធន់ធ្ងន់ជាច្រើនប្រភេទ វាយប្រហារឈ្លានពានបូរណភាពទឹកដីកម្ពុជា កាលពីថ្ងៃទី២៤ ខែកក្កដា ដល់ថ្ងៃទី២៨ ខែកក្កដា ឆ្នាំ២០២៥ រហូតមានបទឈប់បាញ់ក្រោមការសម្របសម្រួលពីអាមេរិក ចិន និងម៉ាឡេស៊ី។ ចំពោះការវាយប្រហារនេះ ធ្វើឱ្យទាហាន និងជនស៊ីវិលនៃប្រទេសទាំង២បាត់បង់ជីវិតច្រើន រួមទាំងខូចខាតហេដ្ឋារចនាសម្ព័ន្ធ វត្តអារាម សាលារៀន និងប្រាសាទព្រះវិហាររបស់កម្ពុជាផងដែរ។

បន្ទាប់ពីបទឈប់បាញ់ចូលជាធរមាន នៅយប់ថ្ងៃទី២៨ ខែកក្កដា ទាហានថៃ បានចាប់ទាហានខ្មែរដោយខុសច្បាប់ នាព្រឹកថ្ងៃទី២៩ ខែសីហា ឆ្នាំ២០២៥ រហូតមកដល់ថ្ងៃទី១៩ ខែសីហា ឆ្នាំ២០២៥ នេះ មានរយៈពេល២១ថ្ងៃហើយ ទាហានថៃមិនទាន់ដោះលែងទាហានកម្ពុជាទាំង១៨រូបមកវិញឡើយ។ កម្ពុជា នៅតែបន្តអំពាវនាវឱ្យថៃ ដោះលែងទាហានខ្មែរដែលខ្លួនចាប់ទៅដោយខុសច្បាប់មកវិញ និងទាមទារឱ្យថៃគោរពបទឈប់បាញ់ផងដែរ៕