មជ្ឈមណ្ឌលអន្តេវាសិកនិស្សិតនារី ប្រកាសជ្រើសរើសនិស្សិតនារីក្រីក្រ ១២០នាក់ ឱ្យស្នាក់នៅឥតគិតថ្លៃ

ក្រសួងអប់រំ យុវជន និងកីឡា ប្រកាសជ្រើសរើសនិស្សិតនារីក្រីក្រ ឆ្នាំទី១ ចំនួន ១២០ នាក់ ឱ្យមកស្នាក់នៅបណ្តោះ​អាសន្នដោយឥតគិតថ្លៃ នៅមជ្ឈមណ្ឌលអន្តេវាសិកនិស្សិតនារី ក្នុងឆ្នាំសិក្សា២០២៥-២០២៦ ដើម្បីសម្រួលដល់ការសិក្សា និងការស្នាក់នៅរបស់និស្សិត។

យោងតាមសេចក្តីជូនដំណឹងក្រសួងអប់រំ ចុះថ្ងៃទី ២២ ខែសីហា ឆ្នាំ ២០២៥ ការប្រកាសនេះជ្រើសរើសចំពោះនិស្សិតនារីក្រីក្រ ដែលកំពុងសិក្សានៅតាមគ្រឹះស្ថានឧត្តមសិក្សាសាធារណៈទាំងអស់តាមរូបភាពអាហារូបករណ៍ និងបង់ថ្លៃសិក្សា។ តាមក្រសួងអប់រំ លក្ខខណ្ឌជ្រើសរើស ជានិស្សិតនារីក្រីក្រអាហារូបករណ៍ ឬបង់ថ្លៃសិក្សា ដែលកំពុងសិក្សាឆ្នាំទី១ នៅតាមគ្រឹះស្ថានឧត្តមសិក្សាសាធារណៈក្នុងរាជធានីភ្នំពេញ។

ជានិស្សិតនារីក្រីក្រ និងនិស្សិតនារី ដែលមានពិការភាព មកពីខេត្តនានា(សូមភ្ជាប់លិខិតបញ្ជាក់ពីមេភូមិ មេឃុំ) ជានិស្សិតនារីនៅលីវ មានវិន័យ និងសីលធម៌ល្អ។

សម្រាប់កាលបរិច្ឆេទ និងទីកន្លែងដាក់ពាក្យ បេក្ខជនត្រូវយកពាក្យស្នើសុំមកដាក់ដោយខ្លួនឯង នៅតាមគ្រឹះស្ថានឧត្តមសិក្សារបស់ខ្លួន ចាប់ពីថ្ងៃជូនដំណឹងនេះ រហូតដល់ថ្ងៃទី០១ ខែវិច្ឆិកា ឆ្នាំ២០២៥ ។ ចំណែក កាលបរិច្ឆេទប្រកាសលទ្ធផល នឹងត្រូវបិទផ្សាយនៅមជ្ឈមណ្ឌលអន្តេវាសិកនិស្សិតនារី និងតាមគេហទំព័រផ្លូវការរបស់ក្រសួង ក្រោយពីការសម្រេចរបស់គណៈកម្មការជ្រើសរើស នៃក្រសួងអប់រំ យុវជន និងកីឡា នៅថ្ងៃទី១០ ខែវិច្ឆិកា ឆ្នាំ២០២៥ ៕