ចង្ក្រានបង្កើនថាមពលជាង ១ ៦០០ ត្រូវបានចែកជូនពលរដ្ឋរស់នៅតំបន់ភូមិភាគឦសាន

ដើម្បីរួមចំណែកដល់ការកាត់បន្ថយភាពក្រីក្រ និងលើកកម្ពស់ជីវភាពប្រជាពលរដ្ឋរស់នៅតំបន់ភូមិភាគឦសាន ក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានចែក “ចង្ក្រានព្រៃមាន់”បង្កើនថាមពលជូនពលរដ្ឋចំនួន
១ ៦២៧ គ្រួសារ។ ចង្ក្រាននេះមិនត្រឹមតែសម្រួលដល់ការដាំស្លប៉ុណ្ណោះទេ ថែមទាំងរួមចំណែកកាត់បន្ថយការបំពុលបរិស្ថានផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​នាពិធីចែកចង្ក្រាន កាលពីថ្ងៃទី ៣១ ខែសីហា ឆ្នាំ ២០២៥ លោក ហេង រត្នពិសិដ្ឋ អគ្គនាយកនៃអគ្គនាយកដ្ឋានសាធារណការ និងជាសមាជិកក្រុមការងាររាជរដ្ឋាភិបាលចុះមូលដ្ឋានខេត្តមណ្ឌលគិរី បានលើកឡើងពាក់ព័ន្ធនឹងបញ្ហាប្រឈមការរស់នៅចំអិនប្រចាំថ្ងៃរបស់បងប្អូនប្រជាពលរដ្ឋ ជាពិសេសជនជាតិដើមភាគតិចដែលរស់នៅតាមតំបន់ដាច់ស្រយាល ដែលបន្តប្រើប្រាស់ចង្រ្កានបែបប្រពៃណីមានសភាពហ៊ុយផ្សែងត្រលោមដែលអាចបង្កធ្វើឱ្យប៉ះពាល់បរិស្ថាន និងសុខភាពពលរដ្ឋ។

លោកសង្ឃឹមថា ចង្ក្រានបង្កើនថាមពល(ព្រៃមាន់)នេះ នឹងជួយសម្រួលដល់ជីវភាពពលរដ្ឋ និងកាត់បន្ថយភាពក្រីក្រមួយ​កម្រិតទៀត។ លោកថា៖« ការប្រើប្រាស់ចង្រ្កាន(ព្រៃមាន់)មានអត្ថប្រយោជន៍ច្រើន អាចបង្កើនកំដៅខ្លាំងជាងមុន ចំណេញពេលជាងចង្រ្កានធម្មតា អ្វីដែលពិសេស មិនសូវមានផ្សែងដូចចង្រ្កានធម្មតា និងមិនធ្វើឱ្យប៉ះពាល់ដល់បរិស្ថាននិងសុខភាពឡើយ»។

ឆ្លៀតក្នុងឱកាសនោះ លោក ហៀក សុផាន អភិបាលក្រុងសែនមនោរម្យ ថ្លែងអំណរគុណដល់ក្រុមការងាររាជរដ្ឋា​ភិបាលដែលបន្តយកចិត្តទុកដាក់ដល់ការរស់នៅប្រជាពលរដ្ឋ ជាពិសេសចែកចង្ក្រានជូនប្រជាពលរដ្ឋក្នុងមូលដ្ឋានខេត្តមណ្ឌលគិរី ដើម្បីប្រើប្រាស់ក្នុងគ្រួសារ លើកកម្ពស់សុខភាពប្រចាំថ្ងៃ កាត់បន្ថយការចំណាយ និងមិនប៉ះពាល់បរិស្ថាន។ ជាមួយគ្នានោះ លោកបានណែនាំឱ្យពលរដ្ឋដែលទទួលបានចង្ក្រានេះ យកទៅប្រើប្រាស់ដោយយកចិត្តទុកដាក់ និងចេះថែទាំ ដើម្បីប្រើប្រាស់បានយូរអង្វែង៕

អត្ថបទ៖ រៀម សុខហេង