កម្ពុជាស្នើឥណ្ឌាបន្តកិច្ចសហប្រតិបត្តិការយោធាបន្ថែមទៀត

កម្ពុជាស្នើឥណ្ឌាបន្តកិច្ចសហប្រតិបត្តិការយោធារវាងគ្នាឱ្យកាន់តែស៊ីជម្រៅបន្ថែមទៀត តាមរយៈការបណ្តុះបណ្តាល ការផ្លាស់ប្តូរទស្សនកិច្ចគ្រប់កម្រិត ការផ្លាស់ប្តូរព័ត៌មានទប់ស្កាត់អំពើភេរវកម្ម ឧក្រិដ្ឋកម្មឆ្លងដែន កិច្ចសហប្រតិបត្តិការមនុស្សធម៌ សង្គ្រោះគ្រោះមហន្តរាយ កិច្ចសហប្រតិបត្តិការរក្សាសន្តិភាព កិច្ចសហប្រតិបត្តិការប្រភេទទ័ពនិងប្រភេទទ័ព ការធ្វើលំហាត់សមយុទ្ធ។

ការស្នើរបស់កម្ពុជា បានធ្វើឡើងដោយអគ្គមេបញ្ជាការនៃកងយោធពលខេមរភូមិន្ទ នាយឧត្តមសេនីយ៍ វង្ស ពិសេន ក្នុងជំនួបពិភាក្សាការងារជាមួយលោកវរសេនីយ៍ឯក S. MUTHUKRISHNAN អនុព័ន្ធយោធាឥណ្ឌាប្រចាំកម្ពុជា ដែលមាននិវេសនដ្ឋាននៅវៀតណាម។

ជំនួបនាព្រឹកថ្ងៃទី១៦ ខែកញ្ញា ឆ្នាំ២០២៥ លោកនាយឧត្តមសេនីយ៍ វង្ស ពិសេន បានសម្តែងការស្វាគមន៍ចំពោះដំណើរបំពេញការងាររបស់លោកប្រធានការិយាល័យអនុព័ន្ធយោធាឥណ្ឌានៅកម្ពុជាពេលនេះ ថាពិតជាបាននាំមកនូវការពង្រឹងកិច្ចថែមទៀតនូវកិច្ចសហប្រតិបត្តិការរវាងកងទ័ពកម្ពុជា និងឥណ្ឌា។

នាយឧត្តមសេនីយ៍ អគ្គមេបញ្ជាការ បានថ្លែងអំណរគុណប្រទេសឥណ្ឌាដែលបានចូលរួមយ៉ាងសកម្មនៅក្នុងការស្វែងរកសន្តិភាពនៅកម្ពុជា នាទសវត្ស៩០ ហើយក្រោយពេលកម្ពុជាទទួលសន្តិភាពពេញលេញ ឥណ្ឌានៅតែបន្តជួយអភិវឌ្ឍន៍កម្ពុជាលើច្រើនវិស័យ ដូចជា សុខាភិបាល អប់រំ ការដោះមីនជាដើម។

លោកវរសេនីយ៍ឯក S. MUTHUKRISHNAN បានគូសបញ្ជាក់ពីកិច្ចសហប្រតិបត្តិការមួយចំនួននាពេលកន្លងមក រវាងកងទ័ពប្រទេសកម្ពុជា-ឥណ្ឌា ដែលក្នុងនោះមានការងារបណ្ដុះបណ្ដាល ការធ្វើសមយុទ្ធប្រចាំឆ្នាំរួមគ្នា ការដោះមីន និងយុទ្ធភ័ណ្ឌមិនទាន់ផ្ទុះ៕