ក្រសួងអប់រំ បញ្ចប់ដំណើរការស្រង់បូកពិន្ទុដោយជោគជ័យត្រៀមប្រកាសលទ្ធផលបាក់ឌុបនៅថ្ងៃទី២០កញ្ញា

ក្រសួងអប់រំ យុវជន និងកីឡា បានបញ្ចប់ដំណើរការស្រង់ បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ ដោយជោគជ័យ និងត្រៀមប្រកាសលទ្ធផលនៅថ្ងៃទី២០ខែកញ្ញាឆ្នាំ២០២៥តាមការគ្រោងទុក។

លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានប្រាប់កម្ពុជាថ្មីថា ក្រសួងបានចាប់ផ្តើមដំណើរការ ស្រង់ បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ ចាប់ពីថ្ងៃទី ៧ ដល់ថ្ងៃទី ១៨ ខែកញ្ញា ឆ្នាំ ២០២៥ និងដំណើរការបោះពុម្ពលទ្ធផលប្រឡង ប្រព្រឹត្តទៅនៅថ្ងៃទី ១៩ ខែកញ្ញា ឆ្នាំ ២០២៥។ លោកស្រីបន្ថែមថា ក្រោយបញ្ចប់ដំណើរការទាំងនេះ ក្រសួងនឹងប្រកាសលទ្ធផលប្រឡងនៅថ្ងៃទី ២០ កញ្ញានៅទូទាំងប្រទេសតាមការគ្រោងទុក បន្ទាប់ពីដំណើរការកំណែសន្លឹកកិច្ចការបេក្ខជនដែលបានចាប់ផ្តើមពីថ្ងៃទី ៣១ សីហា រហូតដល់ថ្ងៃទី ៦ ខែកញ្ញា ឆ្នាំ ២០២៥ ។

ឆ្នាំនេះក្រសួងអប់រំ យុវជន និងកីឡា នឹងប្រកាសលទ្ធផលប្រឡងសញ្ញាបត្រមធ្យមសិក្សាទុតិយភូមិឬបាក់ឌុបនៅថ្ងៃតែមួយ ផ្ទុយពីរាល់ឆ្នាំដែលក្រសួងប្រកាសពីរថ្ងៃជាប់គ្នា ពោលនៅរាជធានីភ្នំពេញនិងខេត្តកណ្តាលក្នុងថ្ងៃទី១ និងថ្ងៃទី២ ប្រកាសលទ្ធផលនៅខេត្តផ្សេង។

លោកស្រី ឃួន វិច្ឆិកា បានបន្ថែមថាមូលហេតដែលក្រសួងប្រកាសលទ្ធផលប្រឡងបាក់ឌុបនៅថ្ងៃតែមួយពោលគឺនៅថ្ងៃទី២០ខែកញ្ញាខាងមុខនេះគឺក្នុងទិសដៅឱ្យប្អូនៗបេក្ខជននៅទូទាំងប្រទេសបានទទួលលទ្ធផលក្នុងពេលជាមួយគ្នាដោយមិនចាំបាច់រង់ចាំដូចរាល់ឆ្នាំ។

គួរបញ្ជាក់ថាសម្រាប់ឆ្នាំ២០២៥នេះមានបេក្ខជនចុះឈ្មោះប្រឡងបាក់ឌុបសរុប ១៤៦,៧២០នាក់ ស្រី ៨១,៤៤២នាក់ ក្នុងនោះបេក្ខជនថ្នាក់វិទ្យាសាស្ត្រ ៤០,៦៧៨នាក់ (ស្រី ២៤,៥១៩នាក់) បេក្ខជនថ្នាក់ វិទ្យាសាស្ត្រសង្គម ១០៦,០៤២នាក់ (ស្រី ៥៦,៩២៣នាក់)។ មណ្ឌលប្រឡងសរុប ២៤១មណ្ឌល ត្រូវជា ៥,៩២៤បន្ទប់ ក្នុងនោះថ្នាក់វិទ្យាសាស្ត្រ ៧២មណ្ឌល ត្រូវជា ១,៦៥៥បន្ទប់ និងថ្នាក់វិទ្យាសាស្ត្រសង្គ ម ១៦៩ មណ្ឌល ត្រូវជា ៤,២៦៩បន្ទប់និងគណៈមេប្រយោគទូទាំងប្រទេស និងគណៈកម្មការនានា នៅក្នុងដំណើរ ការសំណេរសរុប ៣១,២០៣នាក់៕

អត្ថបទ៖ សំអឿន