ព័ត៌មានជាតិ

ភូមិព្រៃចាន់សមរភូមិក្តៅចម្ងាយជាង ៨ គីឡូម៉ែត្រពីភូមិជោគជ័យ ជីវភាពពលរដ្ឋពឹងអាស្រ័យការលក់កម្លាំងពលកម្ម

បានផុស

៨ ខែ មុន

នៅ

ថ្ងៃអង្គារ ៧ តុលា ២០២៥

ដោយ

ភូមិព្រៃចាន់ជាតំបន់សមភូមិជួរមុខមួយទៀតមានចម្ងាយតែប្រមាណ ៨ គីឡូម៉ែត្រពីភូមិជោគជ័យក្នុងឃុំអូរបីជាន់ ស្រុកអូរជ្រៅ ដែលពលរដ្ឋភាគច្រើនប្រកបរបរស៊ីឈ្នួលលក់កម្លាំងពលកម្ម ដើម្បីរកចំណូលទ្រទ្រង់ជីវភាពគ្រួសារ។ នេះបើតាមលោក ពៅ បឿន មេភូមិព្រៃចាន់ប្រាប់កម្ពុជាថ្មី។

លោក ពៅ បឿន មេភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានប្រាប់កម្ពុជាថ្មីថា មុនមិនទាន់មានជម្លោះជាមួយថៃរហូតឈានដល់ការបិទព្រំដែន ពលរដ្ឋក្នុងភូមិព្រៃចាន់គឺតែងតែចេញចូលទៅធ្វើការលក់កម្លាំងពលកម្មនៅប្រទេសថៃដូចជាទៅស៊ីឈ្នួលដាំអំពៅ និងដាំដំឡូងជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកថា «ជីវភាពពលរដ្ឋក្នុងភូមិគឺពឹងផ្អែកលើការលក់កម្លាំងពលកម្មទៅស៊ីឈ្នួលដាំដុះអំពៅ ដាំដំឡូងនៅប្រទេសថៃ ក្រៅពីធ្វើស្រែចម្ការបន្តិចបន្តួចក្នុងស្រុកកំណើត»។

យ៉ាងណាមិញ ក្រោយមានការគំរាមកំហែងពីអាជ្ញាធរថៃដែលដាក់ឱសានវាទបណ្តេញពលរដ្ឋខ្មែរចេញពីភូមិ ពលរដ្ឋបានបន្តស្នាក់នៅនិងរកការងារធ្វើបន្តិចបន្តួច ដោយមិនហ៊ានចាកឆ្ងាយចោលផ្ទះសម្បែងនោះទេ។

មេភូមិព្រៃចាន់ បានបញ្ជាក់ថា ពលរដ្ឋក្នុងភូមិបានងាកទៅរកការងារនៅក្នុងស្រុកវិញ។ ជាក់ស្តែងពលរដ្ឋមួយចំនួនបានចេញទៅធ្វើការនៅតំបន់សេដ្ឋកិច្ចអូរនាងដែលជាតំបន់ឧស្សាហកម្មប្រមូលផ្តុំរោងចក្រឧស្សាហកម្ម ដើម្បីរកចំណូលទ្រទ្រង់ជីវភាពរស់នៅ។

ភូមិព្រៃចាន់មានចម្ងាយប្រមាណ ៨ គីឡូម៉ែត្រពីភូមិជោគជ័យ និងប្រមាណ ៣០ គីឡូម៉ែត្រពីក្រុងប៉ោយប៉ែត។ បើធ្វើដំណើរតាមផ្លូវជាតិលេខ ៥៨ ពីទីប្រជុំជនក្រុងប៉ោយប៉ែតគឺនៅចន្លោះបង្គោលគីឡូម៉ែត្រលេខ ២៩ និង ៣០។ ក្នុងភូមិមានពលរដ្ឋរស់នៅប្រមាណ ២៥៥ គ្រួសារ។

ភូមិទាំងពីរនេះជាតំបន់សមភូមិក្តៅកំពុងរងការគំរាមកំហែមពីអាជ្ញាធរថៃ ដោយបានលើកកម្លាំងចូលមកទន្រ្ទានរាយបន្លាលួសព័ទ្ធយកដី និងផ្ទះរបស់ពលរដ្ឋខ្មែរ។

ខណៈជម្លោះព្រំដែនជាមួយថៃនៅបន្តអូសបន្លាយ លោក ពៅ បឿន បានបញ្ជាក់ថា កន្លងទៅក៏មានសប្បុរសជនបានជួយឧបត្ថម្ភដល់ពលរដ្ឋដើម្បីសម្រួលដល់ការរស់នៅប្រចាំថ្ងៃ ស្របពេលដែលស្ថានភាពប្រឈមជាមួយប្រទេសថៃមិនដឹងថានឹងមានដំណោះស្រាយ ឬបញ្ចប់នៅពេលណា៕