គណបក្សហ៊្វុនស៊ិនប៉ិច គ្រោងបើកយុទ្ធនាការ ឃោសនាបោះឆ្នោតទ្រង់ទ្រាយធំ​ នៅថ្ងៃទី ២២ ឧសភា  

សម្រាប់ការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥នេះ គណបក្សហ៊្វុនស៊ិនប៉ិច គ្រោងបើកយុទ្ធនាការឃោសនាទ្រង់ទ្រាយធំ នៅថ្ងៃទី ២២ ខែឧសភា ឆ្នាំ ២០២២ខាងមុខ ដែលដឹកនាំដោយព្រះអង្គម្ចាស់ នរោត្តម ចក្រាវុធ ព្រះប្រធានគណបក្សហ៊្វុនស៊ិនប៉ិច តែម្ដង។​ នេះបើតាមការឲ្យដឹងពីអ្នកនាំពាក្យគណបក្សហ៊្វុនស៊ិនប៉ិច។

លោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច មានប្រសាសន៍ប្រាប់កម្ពុជាថ្មី នៅថ្ងៃទី ១៨ ខែឧសភានេះថា គណបក្សហ៊្វុនស៊ិនប៉ិច គ្រោងរៀបចំបើកយុទ្ធនាការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់ ទ្រង់ទ្រាយធំ នៅថ្ងៃអាទិត្យ ទី ២២ ខែឧសភា ឆ្នាំ ២០២២ នៅក្រុងតាខ្មៅ ខេត្តកណ្ដាល ដោយមានអ្នកចូលរួមប្រមាណពី ៥០០ ទៅ ១០០០នាក់។   

លោក ញឿន រ៉ាដែន បានបញ្ជាក់យ៉ាងដូច្នេះថា «គណបក្សហ៊្វុនស៊ិនប៉ិច យើងបានត្រៀមក្នុងការចូលរួមឃោសនាហ្នឹង នៅថ្ងៃទី ២២ ថ្ងៃអាទិត្យនេះ គឺយើងបើកយុទ្ធនាការធំ នៅក្រុងតាខ្មៅ ខេត្តកណ្ដាល យើងនឹងចាប់ផ្ដើមហែរចេញធំ ដោយ​​មានវត្តមានព្រះអង្គម្ចាស់ នរោត្តម ចក្រាវុធ លោកចូលរួម ហើយក្នុងនោះដែរ មានសមាជិក-សមាជិកា ចូលរួមនឹងប្រហែលជាខ្ទង់ ៥០០នាក់ ទៅ ១០០០នាក់ទេ»។

លោកបន្ថែមថា សម្រាប់ការបើកយុទ្ធនាការ ឃោសនាបោះឆ្នោតទ្រង់ទ្រាយធំនេះ គណបក្សហ៊្វុនស៊ិនប៉ិច នឹងប្រើប្រាស់រថយន្តប្រមាណជា ៥០គ្រឿង និងម៉ូតូប្រមាណជា ១០០គ្រឿង។ អ្នកនាំពាក្យគណបក្សហ៊្វុនស៊ិនប៉ិច បានគូសបញ្ជាក់ដែរថា គណបក្សរបស់ខ្លួន នឹងគោរពទៅតាមសេចក្ដីណែនាំ របស់គណៈកម្មាធិការជាតិរៀបចំការបោះឆ្នោត សម្រាប់ការឃោសនាបោះឆ្នោត ហើយក៏នឹងគោរពទៅតាមការណែនាំ របស់ក្រសួងសុខាភិបាល ដើម្បីបង្ការទប់ស្កាត់ការឆ្លងរាលដាលជំងឺកូវីដ-១៩ ផងដែរ។

សូមជម្រាបថា ការឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់អាណត្តិទី ៥ នឹងត្រូវធ្វើឡើងចាប់ពីថ្ងៃទី ២១ ខែឧសភា ដល់ថ្ងៃទី ៣ ខែមិថុនា ឆ្នាំ ២០២២។ ចំណែក​ឯការបោះឆ្នោត នឹងត្រូវធ្វើឡើងនៅថ្ងៃទី ៥ ខែមិថុនា ឆ្នាំ ២០២២ ដោយមានគណបក្សនយោ​បាយចំនួន ១៧ បានដាក់បេក្ខជនឈរឈ្មោះ ចូលរួមប្រកួតប្រជែង។

លោក ប្រាជ្ញ ចន្ទ ប្រធាន គ.ជ.ប កាលពីថ្ងៃទី ១៧ ខែឧសភា បានចេញសេចក្ដីអំពាវនាវមួយ ដល់បណ្ដាគណបក្សនយោបាយ ដែលត្រៀមឃោសនាបោះឆ្នោត នាពេលខាងមុខ។ តាមរយៈសេចក្ដីអំពាវនាវនេះ លោក ប្រាជ្ញ ចន្ទ បានលើកឡើងថា នៅក្នុងអំឡុងពេលឃោសនាបោះឆ្នោត ជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ ដែល​មាន​រយៈពេល ១៤ថ្ងៃ ចាប់ពីថ្ងៃទី ២១ ខែឧសភា រហូតដល់ថ្ងៃទី ៣ ខែមិថុនា ឆ្នាំ ២០២២ គណៈកម្មាធិការជាតិរៀប​ចំ​ការ​បោះឆ្នោត សូមអំពាវនាវដល់គណបក្សនយោបាយ បេក្ខជន អ្នកគាំទ្រនៃគណបក្សនយោបាយ​​​ទាំងអស់ ត្រូវតែគោរពតាមវិធាន បទប្បញ្ញត្តិ និងគោលការណ៍ ដែលចែងក្នុងច្បាប់ ស្តីពី ការបោះឆ្នោត​ជ្រើស​រើស​ក្រុមប្រឹក្សាឃុំ-សង្កាត់ គោរពតាមបទបញ្ជា និងនីតិវិធី ក្រមសីលធម៌ និងគោលការណ៍នានា​ ដែលបាន​កំណត់​ដោយ គ.ជ.ប ដើម្បីឲ្យការឃោសនាបោះឆ្នោត របស់គណបក្សនយោបាយប្រព្រឹត្តទៅ​ដោយសន្តិវិធី អហិង្សា សន្តិសុខ និង សុវត្ថិភាព៕

អត្ថបទ៖ ឃួន សុភ័ក្រ