បណ្ឌិត គិន ភា៖ ការផ្ទេរអំណាចឱ្យឯកឧត្តម ហ៊ុន ម៉ាណែត ជារឿងប្រវត្តិសាស្រ្តដ៏សំខាន់សម្រាប់កម្ពុជា

លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា និងជាអ្នកតាមដាននយោបាយនៅកម្ពុជា បានសរសេរសំណេរនៅលើហ្វេសប៊ុករបស់លោកថ្ងៃទី២៧ ខែកក្កដាថា៖«ការបន្តវេនរបស់ឯកឧត្តមបណ្ឌិត ហ៊ុន ម៉ាណែត ជាការផ្ទេរដំណាក់កាលប្រវត្តិសាស្ត្រដ៏សំខាន់បំផុតនៃប្រទេសកម្ពុជានាសតវត្សរ៍ទី២១»។

លោកបណ្ឌិតលើកឡើងបែបនេះ បន្ទាប់ពីសម្តេចតេជោ ហ៊ុន សែន នាយករដ្ឋមន្រ្តីកម្ពុជា ថ្លែងសារពិសេសមួយកាលពីថ្ងៃទី ២៦ ខែកក្កដា ឆ្នាំ២០២៣នេះ អំពីការផ្ទេរតំណែងឱ្យទៅ ឯកឧត្តម ហ៊ុន ម៉ាណែត ដែលជាកូនប្រុសច្បងរបស់ សម្តេច កាន់តំណែងជានាយករដ្ឋមន្ត្រីចាប់ពីអាណត្តិទី៧ ទៅ ពោល គឺសម្តេចតេជោ នឹងចាកចេញពីតំណែងនាយករដ្ឋមន្ត្រី នៅថ្ងៃទី២២ ខែសីហា ឆ្នាំ២០២៣ខាងមុខ។

ជុំវិញនឹងបញ្ហានេះ លោកបណ្ឌិត គិន ភា បានលើកឡើងថា ការអនុវត្តផែនការបន្តវេននេះ គឺជារឿងដ៏សំខាន់បំផុតសម្រាប់កម្ពុជា ក្នុងនាមសម្តេច ហ៊ុន សែន ជានាយករដ្ឋមន្ត្រីដំបូងគេក្នុងពិភពលោកដែលកាន់តំណែងយូរជាងគេ។ លោកថា ការរៀបចំនេះ ធ្វើឡើងយ៉ាងល្អឥតខ្ចោះរបស់គណបក្សប្រជាជនកម្ពុជា ដោយគោរពទៅតាមលក្ខន្តិកៈ និងបទបញ្ជាផ្ទៃក្នុងរបស់គណបក្សប្រជាជនកម្ពុជា និងគោលការណ៍ច្បាប់របស់ព្រះរាជាណាចក្រកម្ពុជា និងស្របតាមលិទ្ធិប្រជាធិបតេយ្យផងដែរ។

លោកបានសង្កត់ធ្ងន់ថា៖ «ក្នុងប្រវត្តិសាស្ត្រជាង ៥០០ឆ្នាំមកនេះ កម្ពុជាមិនដែលមានការផ្ទេរអំណាច ឬ ការបន្តវេនប្រកបដោយសន្តិភាព និងសេចក្តីស្ងប់សុខម្តងណាទេ។ ប្រទេសដ៏កំម្សត់មួយនេះ ជួបប្រទះតែសង្គ្រាមដណ្តើមអំណាច ចលាចលសង្គម ការបែកបាក់ជាតិ និងការរស់ក្រោមនឹមត្រួតត្រាបរទេស ដែលកើតមានស្ទើរគ្រប់ដំណាក់កាលនៃប្រវត្តិសាស្ត្រ»។

ជាមួយនឹងសង្គ្រាមនៅកម្ពុជានេះ សម្តេចតេជោបានស្តារប្រទេសជាតិឡើងវិញឱ្យរួចផុតពីសង្គ្រាម និងមានសន្តិភាពពេញលេញក្រោមយុទ្ធសាស្ត្រឈ្នះឈ្នះ។ ក្រោមការប្រកាសពីចាកចេញពីតំណែង និងការបន្តវេនរបស់ ឯកឧត្តម ហ៊ុន ម៉ាណែត បានធ្វើឱ្យមជ្ឈដ្ឋាននានា ក៏ដូចជាប្រជាជនកម្ពុជា មានការគាំទ្រយ៉ាងខ្លាំងចំពោះការបន្តវេនរបស់ឯកឧត្តម ហ៊ុន ម៉ាណែត ពីសម្តេចតេជោ ហ៊ុន សែន នាពេលខាងមុខនេះ។

សូបជម្រាបថា សម្តេចតេជោ ក៏បានលើកឡើងដែលថា ឯកឧត្តម ហ៊ុន ម៉ាណែត មិនមែនអាចបន្តវេនដោយគ្មានការឆ្លងកាត់អ្វីនោះទេ។ ពោលគឺ ឯកឧត្តម ហ៊ុន ម៉ាណែត មានសមត្ថភាពគ្រប់គ្រាន់ នឹងអាចឆ្លងកាត់ដំណាក់កាលសំខាន់ៗ ដោយឯកឧត្តមយ៉ាងជោគជ័យផងដែរ៕